នរណានឹងក្លាយជាប្រធានាធិបតីអាហ្វហ្គានីស្ថាន ពេលក្រុមតាលីបង់​ ឡើងកាន់កាប់?

ប្រធានាធិបតីអាហ្វហ្គានីស្ថាន លោក Ashraf Ghani ត្រូវបានគេគិតថា លាលែងពីតំណែងនៅពេលដែលរដ្ឋាភិបាលបានចុះចាញ់កងកម្លាំងតាលីបង់ក្នុងទីក្រុងកាប៊ុលកាលពីថ្ងៃអាទិត្យ។

ក្រុមតាលីបង់បានចូលទៅដល់វិមានប្រធានាធិបតីអាហ្វហ្គានីស្ថាន ដើម្បីរៀបចំការផ្ទេរអំណាច។ បន្ទាប់ពីកិច្ចចរចារវាងរដ្ឋាភិបាលអាហ្វហ្គានីស្ថាននិងក្រុមតាលីបង់ រដ្ឋាភិបាលបណ្តោះអាសន្នដឹកនាំដោយក្រុមតាលីបង់ត្រូវបានប្រកាស។

រដ្ឋាភិបាលអាហ្វហ្កានីស្ថានថ្មី នឹងត្រូវដឹកនាំដោយមេដឹកនាំកំពូលតាលីបង់លោក Mullah Abdul Ghani Baradar។ យោងតាមប្រភពព័ត៌មាននានា បានឲ្យដឹងថា លោក Mullah Baradar មានការគាំទ្រពីប្រទេសកាតា ដែលបានជួយក្រុមតាលីបង់និង រដ្ឋាភិបាលអាហ្វហ្គានីស្ថានឲ្យចរចាគ្នា។

បន្ទាប់ពីចូលដល់ជាយក្រុងកាប៊ុល ក្រុមតាលីបង់បានចេញសេចក្តីថ្លែងការណ៍មួយដោយនិយាយថា ពួកគេគ្មានគម្រោងដណ្តើមយករដ្ឋធានីអាហ្វហ្គានីស្ថានដោយកម្លាំងឡើយ។

ក្រុមតាលីបង់បានប្រកាសថា សង្គ្រាមនៅក្នុងប្រទេសអាហ្វហ្គានីស្ថាន បានបញ្ចប់ហើយ ខណៈលោកប្រធានាធិបតី Ashraf Ghani បានភៀសខ្លួនចេញពីប្រទេស។

លោក Ghani និយាយថា លោកចង់បញ្ចៀសការបង្ហូរឈាម ទើបចាកចេញពីប្រទេស៕

ប្រែសម្រួល៖ Vann Vann

ប្រភព៖ Republic World 

ចុចអាន៖ អតីតទីប្រឹក្សា៖ ប្រធានាធិបតីអាហ្វហ្គានីស្ថាន ធ្វើរឿងដ៏អាម៉ាស់ រត់ចេញពីប្រទេស ទុកប្រជាជនចោល