ប្រទេសអាស៊ីអាគ្នេយ៍ចំនួន ៣ បង្ហាញទស្សនៈផ្ទុយគ្នាចំពោះកិច្ចព្រមព្រៀង AUKUS

ប្រទេសហ្វីលីពីន បានបង្ហាញការគាំទ្រដល់ ភាពជាដៃគូការពារជាតិថ្មី រវាងសហរដ្ឋអាមេរិក អង់គ្លេសនិងអូស្ត្រាលី ដោយសង្ឃឹមថា កិច្ចព្រមព្រៀងនេះ អាចរក្សាតុល្យភាពអំណាចនៅក្នុងតំបន់ឥណ្ឌូ-ប៉ាស៊ីហ្វិក ទោះទស្សនៈបែបនេះ ផ្ទុយស្រឡះពីប្រទេសជិតខាងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀង AUKUS នឹងធ្វើឲ្យប្រទេសអូស្ត្រាលី ទទួលបានបច្ចេកវិទ្យាដើម្បីដាក់ពង្រាយនាវាមុជទឹកដើរដោយថាមពលនុយក្លេអ៊ែរ ហើយវាជាផ្នែកមួយនៃកិច្ចព្រមព្រៀងដែលមានបំណងឆ្លើយតបទៅនឹងការកើនឡើងនៃអំណាចរបស់ ចិន។

រដ្ឋមន្ត្រីក្រសួងការបរទេសហ្វីលីពីនលោក Teodoro Locsin បាននិយាយនៅក្នុងសេចក្តីថ្លែងការណ៍មួយនៅថ្ងៃអង្គារទី ២១ ខែកញ្ញានេះថា ការពង្រឹងសមត្ថភាពសម្ព័ន្ធមិត្តដើម្បីបង្ហាញអំណាច គួរតែស្តារនិងរក្សាតុល្យភាពជាជាងធ្វើឲ្យអស្ថិរភាព។

សុន្ទរកថារបស់លោក Locsin គឺផ្ទុយពីជំហររបស់ឥណ្ឌូណេស៊ី និងម៉ាឡេស៊ីដែលបានបង្ហាញការព្រួយបារម្ភអំពីនាវាមុជទឹកដើរដោយថាមពលនុយក្លេអ៊ែរ ចំពេលមានការប្រកួតប្រជែងមហាអំណាចនៅអាស៊ីអាគ្នេយ៍។

លោក Locsin និយាយថា បើគ្មានវត្តមានអាវុធនុយក្លេអ៊ែរពិតប្រាកដទេ ចលនា AUKUS នឹងមិនរំលោភលើសន្ធិសញ្ញាឆ្នាំ១៩៩៥ ក្នុងការរក្សាអាវុធនុយក្លេអ៊ែរចេញពីអាស៊ីអាគ្នេយ៍ឡើយ។

សមុទ្រចិនខាងត្បូង នៅតែជាប្រភពនៃភាពតានតឹង ដោយសហរដ្ឋអាមេរិកដែលជាដៃគូសន្ធិសញ្ញាការពារជាតិរបស់ហ្វីលីពីននិងសម្ព័ន្ធមិត្តលោកខាងលិច តែងតែធ្វើប្រតិបត្តិការ “សេរីភាពនៃការធ្វើនាវាចរណ៍” ដែលចិនបានប្រតិកម្មដោយកំហឹង។

ប្រទេសចិនចាត់ទុកប្រតិបត្តិការនោះថា ជាការជ្រៀតជ្រែកពីអ្នកខាងក្រៅ នៅក្នុងដែនទឹកដែលខ្លួនអះអាងថាជារបស់ខ្លួន នៅក្នុងជម្លោះជាមួយរដ្ឋនៅតាមតំបន់ឆ្នេរផ្សេងទៀតដូចជា ហ្វីលីពីននិងវៀតណាមជាដើម៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើងព្រមាន កិច្ចព្រមព្រៀង Aukus នឹងបង្កឲ្យមានការប្រកួតប្រជែងអាវុធនុយក្លេអ៊ែរ