ជប៉ុន ផលិតម៉ាសប្រើកោសិកាសត្វអូទ្រីស អាចដឹងអ្នកឆ្លងកូវីដ

ក្រុមអ្នកស្រាវជ្រាវជនជាតិជប៉ុនបានបង្កើតម៉ាសដែលប្រើអង់ទីគ័ររបស់សត្វអូទ្រីសដើម្បីរកមើលមេរោគកូវីដ ១៩ នៅ ក្រោមពន្លឺអ៊ុលត្រាវីយូឡេ (UV) ។

នៅ ក្នុងការសិក្សាមួយ អ្នកធ្វើតេស្តបានពាក់ម៉ាស ហើយបន្ទាប់ពីរយៈពេល ៨ ម៉ោង តម្រងម៉ាសនោះត្រូវបានដកចេញ និងបាញ់ដោយសារធាតុគីមីនៅ ក្រោមពន្លឺ UV ហើយប្រសិនបើមេរោគមានវត្តមាន វានឹងបញ្ចេញពន្លឺជុំវិញតំបន់ច្រមុះ និងមាត់របស់អ្នកឆ្លងកូវីដ ។

ក្រុមអ្នកស្រាវជ្រាវបាននិយាយនៅ ក្នុងសេចក្តីប្រកាសព័ត៌មានមួយថា ការរកឃើញដោយលោក Yasuhiro Tsukamoto និងក្រុមការងារនៅ សាកលវិទ្យាល័យ Kyoto Prefectural នៅ ភាគខាងលិចប្រទេសជប៉ុន អាចផ្តល់ការធ្វើតេស្តរកមេរោគនៅ ផ្ទះ និងចំណាយតិច ។

អ្នកវិទ្យាសាស្ត្របានចាប់ផ្តើមបង្កើតតម្រងម៉ាសដែលស្រោបដោយអង់ទីគ័ររបស់សត្វអូទ្រីសសំដៅ ទៅ លើកូវីដ ខណៈការស្រាវជ្រាវពីមុនបង្ហាញថា សត្វស្លាបមានភាពធន់ទ្រាំខ្លាំងចំពោះជំងឺ ។

ទន្ទឹមនោះ ក្រុមអ្នកស្រាវជ្រាវសង្ឃឹមថានឹងអភិវឌ្ឍម៉ាសនេះបន្ថែមទៀត ដោយឲ្យវាបញ្ចេញពន្លឺដោយស្វ័យប្រវត្តិ មិនចាំបាច់ដាក់ក្រោមពន្លឺ UV ប្រសិនបើរកឃើញមេរោគ ។

គួរបញ្ជាក់ថា លោក Tsukamoto ជាសាស្ត្រាចារ្យពេទ្យសត្វ និងជាប្រធានសាកលវិទ្យាល័យ បានសិក្សាអំពីសត្វអូទ្រីសអស់ជាច្រើនឆ្នាំមកហើយ ដោយស្វែងរកវិធីដើម្បីសម្របខ្លួនប្រាណដើម្បីទប់ទល់នឹងជំងឺផ្តាសាយបក្សី អាឡ័កស៊ី និងជំងឺផ្សេងៗទៀតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វៀតណាម ត្រៀមដឹកពលរដ្ឋខ្លួននៅ កម្ពុជា និងប្រទេសផ្សេងទៀត ទៅ វិញ មុនចូលឆ្នាំសកល