វៀតណាម ចាប់ដៃ​ហុងកុង និងជប៉ុន បោះទុនធំ បង្កើតមជ្ឈមណ្ឌលជួសជុលយន្តហោះខ្នាតយក្ស

ក្រុមហ៊ុនសម្ព័ន្ធអន្តរជាតិធំៗ បានឈានដល់ការចុះកិច្ចព្រមព្រៀងរួមគ្នាមួយ ក្នុងការសាងសង់មជ្ឈមណ្ឌលថែទាំ និងជួសជុលយន្តហោះខ្នាតយក្ស ដែលមាន​ទំហំ​ទឹកប្រាក់រហូតដល់ ៣៦០លានដុល្លារ នៅលើ​ទឹកដី​ប្រទេសវៀតណាម។ នេះ​បើ​យោងតាម​ការ​ចុះ​ផ្សាយរបស់​សារព័ត៌មាន Nikkei Asia កាល​ពី​ថ្ងៃទី​​១៦ ខែមិថុនា ឆ្នាំ​២០២៦។

មជ្ឈមណ្ឌលនេះ នឹងត្រូវសាងសង់ឡើង នៅក្នុងព្រលានយន្តហោះអន្តរជាតិ Van Don ស្ថិតក្នុងខេត្តក្វាងនីញ (Quang Ninh) ប្រទេសវៀតណាម។ ព្រឹត្តិការណ៍នេះ បានក្លាយជាប្រវត្តិសាស្ត្រថ្មីមួយ សម្រាប់វៀតណាម ដោយសារតែអាកាសយានដ្ឋាន Van Don គឺជាព្រលានយន្តហោះឯកជនដំបូងគេបង្អស់នៅក្នុងស្រុក ដែលមានសមត្ថភាពទាក់ទាញការវិនិយោគបង្កើតមជ្ឈមណ្ឌលជួសជុលយន្តហោះកម្រិតអន្តរជាតិបែបនេះ។

គម្រោងដើម​ទុន​ធំ​មួយនេះ កើតចេញពីការចាប់ដៃគ្នារវាងក្រុមហ៊ុនយក្សមកពីបីប្រទេសផ្សេងគ្នា។ ភាគីខាងប្រទេសវៀតណាម គឺក្រុមហ៊ុន Sun Group ដែលជាសម្ព័ន្ធក្រុមហ៊ុនអចលនទ្រព្យ និងហេដ្ឋារចនាសម្ព័ន្ធដ៏ល្បីល្បាញ ហើយក៏ជាអ្នកអភិវឌ្ឍន៍ព្រលានយន្តហោះ Van Don ផ្ទាល់តែម្តង។ ចំណែកឯភាគីហុងកុង គឺក្រុមហ៊ុន HAECO ដែលជាបុត្រសម្ព័ន្ធផ្នែកវិស្វកម្មអាកាសចរណ៍របស់ក្រុមហ៊ុន Swire Pacific រីឯភាគីខាងប្រទេសជប៉ុនវិញ គឺមានការចូលរួមពីក្រុមហ៊ុនអាកាសចរណ៍លំដាប់ជាតិ Japan Airlines (JAL) សហការជាមួយក្រុមហ៊ុនពាណិជ្ជកម្មខ្នាតយក្ស Toyota Tsusho Corporation។

បើផ្អែកលើប្លង់មេនៃគម្រោង មជ្ឈមណ្ឌលនេះ នឹងត្រូវសាងសង់នៅលើផ្ទៃដីធំល្វឹងល្វើយរហូតដល់ទៅជាង ២០ហិចតា នៅក្នុងតំបន់ព្រលានយន្តហោះ។ សម្រាប់ដំណាក់កាលដំបូង គេនឹងផ្តោតលើការសាងសង់រោងជាងជួសជុលដ៏ធំមួយ ដែលមានសមត្ថភាពអាចដាក់យន្តហោះខ្នាតធំ ចំនួន ៤គ្រឿង និងយន្តហោះខ្នាតតូច ចំនួន ២គ្រឿងចូលជួសជុលក្នុងពេលតែមួយ។ បើមិនមានអ្វីប្រែប្រួលទេ មជ្ឈមណ្ឌលនេះ នឹងចាប់ផ្តើមបើកដំណើរការជាផ្លូវការនៅក្នុងឆ្នាំ២០២៨ ខាងមុខ បន្ទាប់ពីទទួលបានការអនុម័តច្បាប់ពីរដ្ឋាភិបាល។ គម្រោងនេះ មិនត្រឹមតែជួយជំរុញ​សេដ្ឋកិច្ចនោះទេ ប៉ុន្តែវាក៏នឹងបង្កើតឱកាសការងារដល់ប្រជាជនក្នុងស្រុកប្រមាណ ១ ០០០នាក់ រួមទាំងការនាំចូលអ្នកជំនាញអាកាសចរណ៍បរទេសប្រហែល ២០០នាក់ផងដែរ។ អ្វីដែលពិសេសនោះ គឺហេដ្ឋារចនាសម្ព័ន្ធទាំងមូល នឹងត្រូវរៀបចំឡើងតាមស្តង់ដារបៃតង ដោយមានប្រព័ន្ធគ្រប់គ្រងថាមពលវៃឆ្លាត ការប្រើប្រាស់អំពូល LED និងឧបករណ៍បម្រើការលើដី ដែលដើរដោយថាមពលអគ្គិសនី ដើម្បីកាត់បន្ថយការបំពុលបរិស្ថាន។

ការបង្កើតមជ្ឈមណ្ឌលជួសជុលយន្តហោះនេះ គឺជាយុទ្ធសាស្ត្រដ៏ឈ្លាសវៃមួយ ព្រោះទីផ្សារថែទាំយន្តហោះនៅក្នុងប្រទេសវៀតណាម ត្រូវបានគេព្យាករថានឹងមានតម្លៃហក់ឡើងដល់ ៧,៤ពាន់លានដុល្លារនៅត្រឹមឆ្នាំ២០៣០។ កន្លងមក សេវាកម្មជួសជុលក្នុងស្រុករបស់វៀតណាម មិនទាន់អាចឆ្លើយតបនឹងការកើនឡើងយ៉ាងគំហុគនៃចំនួនយន្តហោះនៅក្នុងតំបន់អាស៊ីអាគ្នេយ៍នៅឡើយទេ។ ដូច្នេះ ការលេច​ចេញនូវមជ្ឈមណ្ឌលកម្រិតអន្តរជាតិនេះ នឹងជួយកាត់បន្ថយការនាំយន្តហោះទៅជួសជុលនៅបរទេសរបស់ក្រុមហ៊ុនអាកាសចរណ៍ក្នុងស្រុកយ៉ាងច្រើនសន្ធឹកសន្ធាប់ ដែលជួយកាត់បន្ថយការចំណាយផង និងជួយរុញច្រានឱ្យប្រទេសវៀតណាមមានឈ្មោះបោះសំឡេងកាន់តែខ្លាំង នៅក្នុងខ្សែសង្វាក់​ផ្គត់ផ្គង់វិស័យអាកាសចរណ៍ពិភពលោកផងដែរ៕

ប្រែសម្រួល៖ ឈាង