ព័ត៌មានអន្ដរជាតិ

អ្នកវិទ្យាសាស្ត្រពន្យល់ Omicron ឆ្លងខ្លាំង តែស្ថានភាពខុសពីកូវីដមុនៗ

បានផុស

៥ years មុន

នៅ

ថ្ងៃពុធ ២៩ ធ្នូ ២០២១

ដោយ

អ្នកវិទ្យាសាស្ត្រជំនាញភាពស៊ាំឈានមុខគេបាននិយាយថា ៖«វីរុសបំប្លែងខ្លួនថ្មី Omicron មិនមែនជាជំងឺដូចកូវីដដែលយើងបានជួបកាលពីមួយឆ្នាំមុនទេ ហើយអត្រាស្លាប់ដោយកូវីដខ្ពស់នៅចក្រភពអង់គ្លេសឥឡូវនេះជាប្រវត្តិ»។

លោក John Bell សាស្ត្រាចារ្យវេជ្ជសាស្ត្រនៅសាកលវិទ្យាល័យ Oxford និងជាទីប្រឹក្សាជីវវិទ្យាសាស្ត្ររបស់រដ្ឋាភិបាលអង់គ្លេសបានលើកឡើងថា បើទោះជាមន្ទីរពេទ្យកំពុងកើនឡើងចំនួនអ្នកជំងឺថ្មីប៉ុន្មានសប្តាហ៍ចុងក្រោយដោយសារវីរុស Omicron រាលដាលយ៉ាងខ្លាំង ក៏ជំងឺនេះទំនងជាស្រាល ហើយអ្នកឆ្លងភាគច្រើនចំណាយពេលខ្លីនៅមន្ទីរពេទ្យ។

លោកបញ្ជាក់ថា អ្នកជំងឺតិចជាងមុនដែលត្រូវការអុកស៊ីសែន ហើយរយៈពេលស្នាក់នៅមន្ទីរពេទ្យជាមធ្យមគឺ៣ថ្ងៃប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិទ្យាសាស្ត្រមួយចំនួនបានរិះគន់ការសម្រេចចិត្តរបស់រដ្ឋាភិបាលអង់គ្លេសដែលមិនដាក់បំរាមកូវីដមុនពេលបុណ្យចូលឆ្នាំសកល។ អ្នកវិទ្យាសាស្ត្របានអធិប្បាយថា ភាពខុសគ្នាខ្លាំងបំផុតរវាងដំបូន្មានរបស់អ្នកវិទ្យាសាស្ត្រ និងច្បាប់ ចាប់តាំងពីកូវីដចាប់ផ្តើមកើនមានឡើង។

ពួកគេបានសម្តែងការព្រួយបារម្ភថា នៅពេលវីរុសបំប្លែងខ្លួនថ្មី Omicron ទំនងជាស្រាល ប៉ុន្តែវាកើតមានការឆ្លងខ្ពស់ ដូច្នេះមានន័យថា ចំនួនចូលមន្ទីរពេទ្យច្រើន ហើយករណីស្លាប់ក៏អាចកើតមានខ្ពស់។

នាយកប្រតិបត្តិសេវាសុខភាពជាតិ(NHS) លោក Chris Hopson បានលើកឡើងថា វានៅតែមិនច្បាស់ទេថា អ្វីដែលអាចកើតមាននៅពេលអត្រាឆ្លងលើមនុស្សចាស់ចាប់ផ្តើមកើនឡើង។

«យើងមានលាយចម្រុះគ្នាច្រើនណាស់ក្នុងឱកាសបុណ្យណូអែល ដូច្នេះយើងទាំងអស់គ្នានៅតែកំពុងរង់ចាំមើល តើយើងនឹងឃើញចំនួនកើនឡើងច្រើនចំពោះអ្នកជំងឺនៅមន្ទីរពេទ្យដែលធ្ងន់ធ្ងរដោយវីរុស Omicron ឬយ៉ាងណា»។

លោក George Eustice រដ្ឋមន្ត្រីក្រសួងបរិស្ថានបាននិយាយថា រដ្ឋាភិបាលបានកំពុងតាមដានកម្រិតនៃអ្នកជំងឺកូវីដចូលមន្ទីរពេទ្យស្ថិតក្រោមការត្រួតពិនិត្យយ៉ាងដិតដល់។

លោក John Bell បាននិយាយថា ៖«ទិដ្ឋភាពដ៏រន្ធត់ដែលយើងឃើញកាលពីមួយឆ្នាំមុននៅបន្ទប់សង្គ្រោះបន្ទាន់គឺពេញ។ មនុស្សច្រើនណាស់បានស្លាប់មុនអាយុ។ ក្នុងគំនិតខ្ញុំនោះគឺជាប្រវត្តិឥឡូវនេះ ហើយខ្ញុំគិតថា យើងគួរតែធានាថា នោះទំនងជាបន្តទៀត»។

លោកបន្តថា ក្នុងពេលពេលរលកជាច្រើននៃកូវីដក្នុងនោះមានវីរុស Delta និង Omicron «ភស្តុងតាងនៃការឈឺធ្ងន់ធ្ងរ និងស្លាប់ពីជំងឺនេះជាមូលដ្ឋានមិនផ្លាស់ប្តូរទេចាប់តាំងពីយើងបានចាក់វ៉ាក់សាំង»។

លោកបន្ថែមថា នៅតាមផ្លូវមនុស្សជាច្រើនក្នុងរយៈពេល២សប្តាហ៍ចុងក្រោយនេះឃើញថា មនុស្សច្រើនណាស់បានទទួលខុសត្រូវខ្ពស់ក្នុងការការពារខ្លួនឯង។

និយាយកាលពីថ្ងៃអង្គារ៍ លោក Paul Hunter សាស្ត្រាចារ្យវេជ្ជសាស្ត្រនៅសាកលវិទ្យាល័យ East Anglia បាននិយាយថា មនុស្សដែលមានជំងឺកូវីដគួរតែត្រូវបានអនុញ្ញាតឲ្យរស់នៅក្នុងជីវិតធម្មតាដូចជាមនុស្សមានជំងឺផ្តាសាយ។

«នេះជាជំងឺដែលមិនទៅណាឆ្ងាយទេ។ ទីបំផុត យើងនឹងអនុញ្ញាតឲ្យមនុស្សដែលឆ្លងកូវីដរស់នៅធម្មតាដូចជាមនុស្សដែលមានជំងឺផ្តាសាយ»។ លោកបានបន្ថែម។

លោកបន្តថា ៖«កូវីដគ្រាន់តែជាជំងឺតពូជនៃវីរុសកូរ៉ូណា ហើយវីរុសចាស់កន្លងផុតទៅ កើតមានវីរុសថ្មីដែលយូរៗទៅវាដូចជាជំងឺផ្តាសាយធម្មតា»៕

ប្រែសម្រួល៖ វីរបុត្រ
ប្រភព៖ BBC

Related Topics:កូវីដ-១៩