ព័ត៌មានអន្ដរជាតិ

សៀវភៅជិតចេញផ្សាយមួយថា លោក ត្រាំ នៅតែបន្តទាក់ទងលោក គីម ជុងអ៊ុន

បានផុស

២ years មុន

នៅ

ថ្ងៃសុក្រ ១១ កុម្ភៈ ២០២២

ដោយ

អតីតប្រធានាធិបតីអាមេរិក លោក ដូណាល់ ត្រាំ បានប្រាប់សហការីថា លោកនៅតែបន្តទំនាក់ទំនងជាមួយមេដឹកនាំកូរ៉េខាងជើង លោក គីម ជុងអ៊ុន ដដែល ចាប់តាំងពីលោកចាកចេញពីសេតវិមាន។ នេះបើយោងតាមការផ្សាយមួយកាលពីថ្ងៃទី១០ ខែកុម្ភៈ ចំពេលភាពតានតឹងនៅកូរ៉េខាងជើងជុំវិញការបាញ់សាកល្បងមីស៊ីលបន្តបន្ទាប់។

អ្នកកាសែតនៅ New York Times ស្ត្រីឈ្មោះ Maggie Haberman បាននិយាយថា ៖«ដូចយើងដឹងអីចឹង លោកនៅមានទំនាក់ទំនងនេះ»។ ព័ត៌មាននេះត្រូវបានសរសេរនៅក្នុងសៀវភៅថ្មីរបស់អ្នកកាសែតរូបនេះស្តីពីលោក ត្រាំ ដែលមានចំណងជើងថា «The Confidence Man (បុរសមានទំនុកចិត្ត)»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានប្រកាសយ៉ាងល្បីល្បាញកាលពីឆ្នាំ២០១៨ថា លោក និង លោក គីម ធ្លាក់ក្នុងអន្លងស្នេហ៍ បន្ទាប់ពីមានលិខិតឆ្លើយឆ្លងជាបន្តបន្ទាប់ ប៉ុន្តែការជួបគ្នា៣ដងជាមួយមេដឹកនាំកូរ៉េខាងជើងបានបរាជ័យក្នុងការបញ្ចុះបញ្ចូលឲ្យលះបង់ចោលអាវុធនុយក្លេអ៊ែរ និងមីស៊ីល។

ស្ត្រីអ្នកកាសែត Haberman បាននិយាយថា ការអះអាងរបស់លោក ត្រាំ មិនអាចផ្ទៀងផ្ទាត់បានទេ ហើយប្រហែលជាមិនពិតក៏ថាបាន។

អ្នកស្រីមានប្រសាសន៍ថា ៖«អ្វីដែលលោក ត្រាំ មានប្រសាសន៍ និងអ្វីកំពុងកើតឡើងពិតប្រាកដមិនមែនជារឿងដែលតែងតែរីករាយនោះទេ ប៉ុន្តែលោកបានកំពុងប្រាប់ប្រជាជនថា លោកនៅតែរក្សាការឆ្លើយឆ្លង ឬពិភាក្សាមួយចំនួនជាមួយ លោក គីម ជុងអ៊ុន»។

ប្រការនេះមានន័យថា ជាមេដឹកនាំបរទេសតែម្នាក់គឺលោក ត្រាំ ដែលបាននិយាយថា លោកនៅបន្តទំនាក់ទំនងជាមួយ។ អ្នកស្រីបានបន្ថែម។

ជាមួយគ្នានេះ ក្រសួងការបរទេសអាមេរិកបានបដិសេធធ្វើអត្ថាធិប្បាយជុំវិញការលើកឡើងខាងលើ និងនៅពេលសួរថា តើបានដឹងពីការទំនាក់ទំនងនោះទេ? សេតវិមានមិនឆ្លើយតបភ្លាមៗទេ។ ចំណែកតំណាងលោក ត្រាំ ម្នាក់ក៏មិនអាចទាក់ទងដើម្បីបំភ្លឺដែរ។

ច្បាប់ Logan ឆ្នាំ១៧៩៩បានហាមពលរដ្ឋអាមេរិកពីការចរចាជាលក្ខណៈឯកជនជាមួយរដ្ឋាភិបាលបរទេសដោយគ្មានច្បាប់អនុញ្ញាតត្រឹមត្រូវ។

អ្នកស្រី Jenny Town នាយកគម្រោង 38 North ស្តីពីកូរ៉េខាងជើងដែលមានមូលដ្ឋាននៅទីក្រុងវ៉ាស៊ីនតោន បាននិយាយថា លោក ត្រាំ ល្បីខាងបំផ្លើស ហើយសារណាមួយដែលលោកបញ្ជូនទៅគ្រាន់តែជាការស្វាគមន៍ និងប្រហែលជាមិនត្រូវបានទទួលផង៕

ប្រែសម្រួល៖ វីរបុត្រ
ប្រភព៖ Reuters