ចាក់វ៉ាក់សាំង​កូវីដ ស្លាប់មនុស្ស ៦ នាក់ Pfizer ចេញ​បញ្ជាក់​ការពិត

អ្នកប្រើប្រាស់បណ្តាញសង្គមជាច្រើនបានស៊ែរនូវការបង្ហោះមួយអំពីផលប៉ះពាល់សុខភាពធ្ងន់ធ្ងរពីវ៉ាក់សាំងកូវីដរបស់ក្រុមហ៊ុនអាមេរិក Pfizer-BioNTech រួមទាំងមនុស្ស ៦ នាក់បានស្លាប់ក្នុងអំឡុងការសាកល្បងដំណាក់កាលចុងក្រោយ ។

ការអះអាងទាំងនេះគឺជាព័ត៌មានមិនពិត ។ មនុស្ស ៦ នាក់ដែលបានស្លាប់នោះគឺមានតែ ២ នាក់ប៉ុណ្ណោះដែលទទួលធ្វើតេស្តវ៉ាក់សាំង Pfizer-BioNTech ខណៈមនុស្ស ៤ នាក់ផ្សេងទៀតមិនជាប់ទាក់ទងនឹងធ្វើតេស្តវ៉ាក់សាំងនេះនោះទេ ។

ទន្ទឹមនោះមនុស្សទីមួយដែលបានចាក់វ៉ាក់សាំង Pfizer-BioNTech នៅចក្រភពអង់គ្លេសគឺលោកយាយ Margaret Keenan អាយុ ៩០ ឆ្នាំមិនស្ថិតក្នុងស្ថានភាពធ្ងន់ធ្ងរនោះទេ ។ ប៉ុន្តែក្រោយមកបុគ្គលិកសុខាភិបាលអង់គ្លេស ២ នាក់ត្រូវបានរាយការណ៍ថាមានប្រតិកម្មអាឡ័កស៊ីក្រោយចាក់វ៉ាក់សាំង Pfizer-BioNTech កាលពីថ្ងៃទី ៨ ខែធ្នូ ។

ស្របពេលជាមួយគ្នានេះនិយ័តករចក្រភពអង់គ្លេសបានចេញការព្រមានថា អ្នកដែលមានប្រវតិ្តប្រតិកម្មអាឡ័កស៊ីមិនគួរទទួលវ៉ាក់សាំងកូវីដរបស់ក្រុមហ៊ុន Pfizer-BioNTech នាពេលបច្ចុប្បន្ននេះទេ ។

គួរបញ្ជាក់ថា អង់គ្លេសគឺជាប្រទេសទីមួយដែលទទួលការចាក់វ៉ាក់សាំង Pfizer-BioNTech ក្រោយក្រុមហ៊ុនផលិតឱសថមួយនេះបង្ហាញពីប្រសិទ្ធភាពការពារមនុស្សពីជំងឺកូវីដ ១៩ ចំនួន ៩៥ ភាគរយ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ មនុស្សពីរនាក់មានប្រតិកម្មអាឡ័កស៊ីក្រោយចាក់វ៉ាក់សាំងកូវីដនៅអង់គ្លេស

ចុចអាន ៖ ក្រុមមនុស្ស៣ប្រភេទដែលមិនគួរចាក់វ៉ាក់សាំងកូវីដ