ព័ត៌មានអន្ដរជាតិ

អតីតប្រធានាធិបតី ប៊ូគីណាហ្វាសូ ត្រូវបានកាត់ទោសជាប់គុកមួយជីវិតពីបទឃាតកម្ម

បានផុស

៤ years មុន

នៅ

ថ្ងៃព្រហស្បតិ៍ ៧ មេសា ២០២២

ដោយ

អតីតប្រធានាធិបតី ប៊ូគីណាហ្វាសូ លោក Blaise Compaore អាយុ៧១ឆ្នាំត្រូវបានកាត់ទោសកំបាំងមុខឲ្យជាប់ពន្ធនាគារអស់មួយជីវិតពីបទឃាតកម្មឆ្នាំ១៩៨៧លើប្រធានាធិបតីមុនលោក Thomas Sankara ក្នុងរដ្ឋប្រហារមួយ។ នេះបើយោងតាមតុលាការយោធាបានសម្រេចកាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sankara ជាបុគ្គលបដិវត្តន៍ដ៏ល្បីល្បាញ និងលេចធ្លោ ត្រូវបានគេបាញ់សម្លាប់នៅរដ្ឋធានី Ouagadougou របស់ប្រទេសអាហ្វ្រិកខាងលិចមួយក្នុងវ័យ៣៧ឆ្នាំ រយៈពេល៤ឆ្នាំ បន្ទាប់ពីលោកបានកាន់អំណាចតាមរយៈរដ្ឋប្រហារដែរ។

អតីតសហការីកំពូលរបស់លោក Compaore ពីរនាក់គឺលោក Hyacinthe Kafando និងលោក Gilbert Diendere ក៏ត្រូវបានកាត់ទោសឲ្យជាប់ពន្ធនាគារអស់មួយជីវិតផងដែរ។

បុគ្គលទាំង៣រូបបានបដិសេធពាក់ព័ន្ធនឹងការស្លាប់របស់លោក Sankara រួមជាមួយនឹងចុងចោទ១១រូបផ្សេងទៀតដែលត្រូវបានចោទប្រកាន់ពាក់ព័ន្ធនឹងអំពើឃាតកម្មដែលបានគ្រោងទុក។ ៣នាក់ក្នុងចំណោម១១នាក់ត្រូវបានប្រកាសគ្មានកំហុស ខណៈអ្នកផ្សេងទៀតត្រូវបានកាត់ទោសឲ្យជាប់ពន្ធនាគារចន្លោះពី៣ទៅ២០ឆ្នាំ។

តុលាការបាននិយាយក្នុងសម្រេចថា លោក Compaore ក៏ត្រូវបានរកឃើញមានពិរុទ្ធពីការវាយប្រហារលើសន្តិសុខរដ្ឋ ការផ្សំគំនិតក្នុងឃាតកម្ម និងការលាក់បាំងសាកសព។

លោកបានបន្តគ្រប់គ្រងប្រទេសអស់រយៈពេល២៧ឆ្នាំមុនពេលត្រូវបានបណ្តេញចេញដោយរដ្ឋប្រហារមួយទៀតក្នុងឆ្នាំ២០១៤ និងភៀសខ្លួនទៅប្រទេស កូតឌីវ័រ ជាកន្លែងដែលត្រូវបានគេជឿថា លោកកំពុងរស់នៅទីនោះ៕

ប្រែសម្រួល៖ វីរបុត្រ
ប្រភព៖ CNN

Related Topics:ប្រទេស ប៊ូគីណា ហ្វាសូ