លោក Putin នឹងជួបពិភាក្សាដោយផ្ទាល់ជាមួយលោក Zelensky តែមានលក្ខខណ្ឌមួយ

ប្រធានាធិបតីរុស្ស៊ី លោក Vladimir Putin បានប្រាប់ប្រធានក្រុមប្រឹក្សាអឺរ៉ុប លោក Charles Michel ថា លោកនឹងជួបពិភាក្សាដោយផ្ទាល់ជាមួយប្រធានាធិបតីអ៊ុយក្រែន លោក Volodymyr Zelensky ប្រសិនបើការពិភាក្សាបង្កើតលទ្ធផលជាក់ស្តែង។

លោក Putin បាននិយាយថា រដ្ឋាភិបាលទីក្រុង កៀវ មិនទាន់ត្រៀមខ្លួនហើយស្រេច ក្នុងការស្វែងរកដំណោះស្រាយដែលអាចទទួលយកបានទៅវិញទៅមកទេ ហើយអ៊ុយក្រែន កំពុងបង្ហាញភាពមិនស៊ីសង្វាក់គ្នាក្នុងកិច្ចចរចា។

លោកបានបន្ថែមថា ជំនួបដោយផ្ទាល់ជាមួយលោក Zelenskyy គឺអាស្រ័យលើវឌ្ឍនភាពក្នុងកិច្ចពិភាក្សារវាងមន្ត្រីនៃភាគីទាំងពីរ ដែលលើកចុងក្រោយបានធ្វើឡើងដោយផ្ទាល់ក្នុងប្រទេសតួកគីកាលពីថ្ងៃទី២៩ខែមីនា មុនពេលទីក្រុងមូស្គូ ចាប់ផ្តើមការវាយលុកថ្មីនៅភាគខាងកើតប្រទេសអ៊ុយក្រែន។

គួរបញ្ជាក់ថា កាលពីដើមសប្តាហ៍នេះ អ្នកនាំពាក្យរបស់វិមានក្រឹមឡាំង លោក Dmitry Peskov បាននិយាយថា ប្រទេសរុស្ស៊ីបានប្រគល់ឯកសារសំខាន់ៗទៅឲ្យអ៊ុយក្រែនរួចហើយ ដើម្បីឈានទៅរកកិច្ចចរចាសន្តិភាព ហើយបាល់គឺស្ថិតនៅក្នុងទីលានរបស់អ៊ុយក្រែន។

ប៉ុន្តែក្រោយមក លោក Zelensky និយាយថា អ៊ុយក្រែនមិនបានទទួលឯកសារណាមួយពីរុស្ស៊ីទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ សព្វាវុធ រាប់ ពាន់ តោន របស់ អ៊ុយក្រែន ធ្លាក់ក្នុងដៃ រុស្ស៊ី