ឆ្នាំ២០២៥ ថៃ ជួបគ្រោះធម្មជាតិដ៏មហន្តរាយចំនួន២ ផ្តាច់ជីវិតមនុស្សរាប់រយនាក់

ឆ្នាំ២០២៦ បានឈានចូលមកដល់នៅថ្ងៃព្រហស្បតិ៍នេះ ប៉ុន្តែប្រទេសថៃ នៅមិនទាន់បាត់ភាពឈឺចាប់ដោយសារគ្រោះធម្មជាតិដ៏មហន្តរាយដែលផ្តាច់ជីវិតមនុស្សយ៉ាងច្រើនក្នុងឆ្នាំ២០២៥នៅឡើយទេ។

គ្រោះធម្មជាតិដ៏ធំទីមួយ គឺរញ្ជួយដីកម្រិត៧.៧រ៉ិចទ័រ ដែលមានចំណុចកណ្តាលនៅមីយ៉ាន់ម៉ា ប៉ុន្តែឥទ្ធិពលរបស់វាបានជះដល់ប្រទេសថៃ ធ្វើឲ្យទីក្រុងបាងកកញ័រខ្លាំង។

រញ្ជួយដីនៅថ្ងៃទី២៨ ខែមីនា ឆ្នាំ២០២៥ មានចំណុចកណ្តាលនៅទីក្រុង ម៉ាន់ដាឡាយ បានបណ្តាលឲ្យអគារកម្ពស់ ៣០ ជាន់កំពុងសាងសង់ក្នុងខណ្ឌ ចតុចក្រ នៃទីក្រុងបាងកក ដួលរលំ ឆក់យកជីវិតមនុស្ស ៩១នាក់ និងច្រើននាក់ទៀតរងរបួស។

នៅក្នុងទិដ្ឋភាពដែលនៅតែលងបន្លាចជនជាតិថៃ, អ្នកក្រុងបាងកកបានរត់ចេញពីអគារទាំងព្រលឹងចុងសក់ អ្នកខ្លះទួញសោក ឯអ្នកខ្លះទៀតយំស្រែក ស្វែងរកមនុស្សជាទីស្រឡាញ់ដែលបាត់ខ្លួន។

គ្រោះមហន្តរាយទីពីរគឺ ជំនន់ដ៏សាហាវនៅភាគខាងត្បូងខែវិច្ឆិកា។ វាជាគ្រោះទឹកជំនន់ដ៏អាក្រក់បំផុតក្នុងរយៈពេល៣០០ឆ្នាំ ដែលបង្កឡើងដោយព្យុះស៊ីក្លូន Senyar និងខ្យល់មូសុងឥណ្ឌូចិន។

ស្ទើរតែទាំងស្រុងនៃស្រុក Hat Yai នៃខេត្ត Songkhla ស្ទើរតែទាំងមូលត្រូវលិចលង់ក្នុងទឹក។ កម្រិតទឹកភ្លៀងត្រូវបានកត់ត្រាទុកថាមានរហូតដល់ ៣៣៥ មីលីម៉ែត្រ ក្នុងរយៈពេលតែមួយថ្ងៃពោលគឺថ្ងៃទី ២១ វិច្ឆិកា។

តួលេខផ្លូវការពីរដ្ឋាភិបាលទីក្រុងបាងកកបង្ហាញថា មនុស្សចំនួន២៦៣នាក់ បានបាត់បង់ជីវិត ដ្បិតមានការសង្ស័យថា រដ្ឋលាក់បាំងតួលេខ និងប៉ាន់ស្មានថា មនុស្សស្លាប់អាចឈានដល់ខ្ទង់ពាន់នាក់ក៏ដោយ។

ក្រៅពីមនុស្សស្លាប់ មនុស្សជាង ៣.៦លាននាក់ទៀត បានរងផលប៉ះពាល់ទូទាំង២០ ខេត្តក្នុងប្រទេសថៃ ខណៈប្រជាជនរាប់ម៉ឺននាក់ត្រូវជម្លៀសទៅកាន់ទីទួលសុវត្ថិភាព៕

អត្ថបទ៖ សុខ សុវណ្ណ