អ៊ីរ៉ង់​ នឹង​ក្លាយ​ជា​សមាជិក​នៃ​ អង្គការ​កិច្ចសហប្រតិបត្តិការ​សៀងហៃ ​ក្នុង​ឆ្នាំ​នេះ

ប្រទេសអ៊ីរ៉ង់ នឹងត្រូវបានអនុញ្ញាតឲ្យចូលរួមក្នុង អង្គការកិច្ចសហប្រតិបត្តិការសៀងហៃ (SCO) ឬត្រូវបានគេស្គាល់ថា កតិកាសញ្ញាសៀងហៃ ក្នុងនាមជារដ្ឋសង្កេតការណ៍ មុនដាច់ឆ្នាំនេះ។ នេះបើយោងតាមសេចក្តីថ្លែងការណ៍កាលពីថ្ងៃចន្ទទី១១ខែកក្កដា ដោយក្រសួងការបរទេសអ៊ូសបេគីស្ថាន។

រដ្ឋមន្ត្រីការបរទេសស្តីទីរបស់អ៊ូសបេគីស្ថាន លោក Vladimir Norov បាននិយាយក្នុងកិច្ចប្រជុំនៅទីក្រុងមូស្គូថា “នៅឆ្នាំនេះ ក្នុងឋានៈជាប្រធានរបស់អ៊ូសបេគីស្ថាន, ប្រទេសអ៊ីរ៉ង់នឹងត្រូវបានបញ្ចូលទៅក្នុង SCO ក្នុងនាមជារដ្ឋសង្កេតការណ៍”។

ការទទួលយកទីក្រុង តេហេរ៉ង់ ត្រូវបានឯកភាពនៅក្នុងកិច្ចប្រជុំកំពូល Dushanbe កាលពីឆ្នាំមុន នៅពេលប្រទេស តាហ្ស៊ីគីស្ថាន គឺជាប្រធានប្តូរវេនរបស់ កតិកាសញ្ញាសៀងហៃ។ ទោះបីជាយ៉ាងណាក៏ដោយ ដើម្បីបញ្ចប់ដំណើរការនេះអាច ចំណាយពេលពីរឆ្នាំ។

គួរបញ្ជាក់ថា SCO ត្រូវបានបង្កើតឡើងក្នុងឆ្នាំ ២០០១ ហើយសព្វថ្ងៃនេះ មានសមាជិកចំនួន ៩ ប្រទេសគឺ ចិន កាហ្សាក់ស្ថាន កៀហ្ស៊ីស៊ីស្ថាន រុស្ស៊ី តាហ្ស៊ីគីស្ថាន អ៊ូសបេគីស្ថាន ឥណ្ឌា និងប៉ាគីស្ថាន។

បូករួមទាំងអស់ ពួកគេស្មើនឹង ៤០% នៃចំនួនប្រជាជនពិភពលោក និង ២៨% នៃផលិតផលក្នុងស្រុកសរុប (GDP)។ រដ្ឋសង្កេតការណ៍រួមមាន អាហ្វហ្គានីស្ថាន បេឡារុស និងម៉ុងហ្គោលី។

កាល​ពី​ខែ​មុន រដ្ឋមន្ត្រី​ការ​បរទេស​អ៊ីរ៉ង់​ទទួល​បន្ទុក​ការទូត​សេដ្ឋកិច្ច​ លោក Mehdi Safari បាន​ស្នើ​ប្លុក​នេះ ឲ្យ​អនុម័ត​រូបិយប័ណ្ណ​សកលមួយ ​ដើម្បី​សម្រួល​សមាហរណកម្ម​សេដ្ឋកិច្ច​របស់​ខ្លួន។

កាលពីពេលថ្មីៗនេះ ទីក្រុងតេហេរ៉ង់ ក៏បានដាក់ពាក្យចូលរួមជាមួយក្រុម BRICS ដែលសមាជិកបីប្រទេសក្នុងចំណោមនោះ ក៏ជាផ្នែកមួយនៃកិច្ចព្រមព្រៀងសៀងហៃផងដែរគឺ ឥណ្ឌា រុស្ស៊ី និងចិន៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អ៊ីរ៉ង់ ពន្យល់ពីចំណងមិត្តភាពជាមួយ ចិន