ព័ត៌មានអន្ដរជាតិ

អ៊ីរ៉ង់ពន្យល់ពីចំណង់មិត្តភាពជាមួយចិន

បានផុស

២ years មុន

នៅ

ថ្ងៃព្រហស្បតិ៍ ២៨ មេសា ២០២២

ដោយ

ប្រទេសអ៉ីរ៉ង់មើលឃើញការទំនាក់ទំនងរបស់ខ្លួនជាមួយប្រទសចិនជាផ្នែកមួយនៃកិច្ចខិតខំប្រឹងប្រែងក្នុងការពង្រឹងឥទ្ធិពលដើម្បីប្រឈមនឹងអំណាចឯកតោភាគរបស់សហរដ្ឋអាមេរិក និងដើម្បីបង្កើតស្ថិរភាព និងសណ្តាប់ធ្នាប់។ លោកប្រធានាធិបតីអ៉ីរ៉ង់ Ebrahim Raisi បានប្រាប់រដ្ឋមន្ត្រីក្រសួងការពារជាតិរបស់ចិន លោក Wei Fenghe កាលពីថ្ងៃពុធម្សិលមិញ។

យោងតាមសារព័ត៌មានរដ្ឋបានផ្សាយថា លោក Raisi បានលើកឡើងថា ការអនុវត្តប្រកបដោយជោគជ័យនៃកិច្ចព្រមព្រៀងនៃសហប្រតិបត្តិការយុទ្ធសាស្ត្ររយៈពេល២៥ឆ្នាំរវាងប្រទេសទាំងពីរ ដែលបានចុះហត្ថលេខាកាលពីឆ្នាំ២០២១ គឺជាអាទិភាពសម្រាប់រដ្ឋាភិបាលទីក្រុងតេហេរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«បញ្ហាប្រឈមនឹងឯកតោភាគីនិយម និងការបង្កើតស្ថិរភាព និងសណ្តាប់ធ្នាប់គឺអាចទៅរួច តាមរយៈកិច្ចសហប្រតិបត្តិការឯករាជ្យ និងអំណាចដែលមានគំនិតដូចគ្នា»។ លោក Raisi ត្រូវបានស្រងសំដីដោយកាសែត IRNA និងបានបន្ថែមថា «ការវិវត្តក្នុងតំបន់ និងសកលបង្ហាញពីតម្លៃនៃកិច្ចសហប្រតិបត្តិការយុទ្ធសាស្ត្រអ៉ីរ៉ង់-ចិន»។

លោក Wei មានប្រសាសន៍ថា ដំណើរទស្សនកិច្ចរបស់លោកទនៅអ៉ីរ៉ង់គឺដើម្បីធ្វើឲ្យប្រសើរឡើងនូវកិច្ចសហប្រតិបត្តិការការពារជាតិជាយុទ្ធសាស្ត្ររវាងទីក្រុងតេហេរ៉ង់ និងប៉េកាំង ដែលមានឥទ្ធិពលគួរឲ្យកត់សំគាល់លើការប្រយុទ្ធភេរវកម្ម និងការលុបបំបាត់លទ្ធិឯកតោភាគី ជាពិសេសនៅក្នុងស្ថានភាពតានតឹង និងសំខាន់នាពេលបច្ចុប្បន្ន។

យោងតាមសេចក្តីថ្លែងការណ៍របស់ក្រសួងការពារជាតិអ៉ីរ៉ង់ថា លោក Wei ក៏បានជួបរដ្ឋមន្ត្រីក្រសួងការពារជាតិអ៉ីរ៉ង់ លោក Mohammad Reza Ashtiani និងមានសេចក្តីរាយការណ៍ថា ត្រូវបានអញ្ជើញទៅឲ្យទៅធ្វើទស្សនកិច្ចនៅប្រទេសចិន។ ក្នុងជំនួបនេះ លោក Ashtiani បានសង្កត់ធ្ងន់ថា ៖«តម្រូវការដើម្បីទប់ទល់នឹងអនុត្តរភាពអាមេរិកនៅក្នុងពិភពលោកគឺតាមរយៈការពង្រីកពហុភាគីនិយម»។

លោក Ashtiani ក៏បានរិះគន់វត្តមានយោធាធាមេរិកនៅមជ្ឈិមបូព៌ា និងកន្លែងផ្សេងទៀតដោយបាននិយាយថា ៖«កន្លែងណាដែលមានវត្តមានយោធាអាមេរិក វាបានបង្កើតរលកនៃអសន្តិសុខ អស្ថិរភាព ការរប្រេះឆា សង្គ្រាម ការបំផ្លិចបំផ្លាញ និងការផ្លាស់ទី»។

លោកអគ្គមេបញ្ជាការ Mohammad Bagheri ប្រធានកងកម្លាំងប្រដាប់អាវុធអ៉ីរ៉ង់ក៏បានជួបរដ្ឋមន្ត្រីក្រសួងការពារជាតិចិនដែរ និងបាននិយាយថា ៖«យើងឯកភាពដើម្បីពង្រីកកិច្ចសហប្រតិបត្តិការទ្វេភាគីក្នុងការធ្វើសមយុទ្ធយោធារួមគ្នា ការផ្លាស់ប្តូរយុទ្ធសាស្ត្រ បញ្ហាហ្វឹកហ្វឺន និងវិស័យរួមផ្សេងៗទៀតរវាងកម្លាំងប្រដាប់អាវុធរបស់ប្រទេសទាំងពីរ ដូច្នេះយើងអាចផ្តល់សន្តិសុខកាន់តែល្អប្រសើរសម្រាប់ប្រទេសទាំងពីរ»៕

ប្រែសម្រួល៖ វីរបុត្រ
ប្រភព៖ RT