អាមេរិក ឲ្យអឺរ៉ុបប្រាប់ចំៗអាវុធដែល អ៊ុយក្រែន ត្រូវការ ដើម្បីងាយស្រួលផលិត

ប្រធានក្រុមហ៊ុនអាមេរិក Northrop Grumman លោកស្រី Kathy Warden បានជំរុញឲ្យបណ្តាប្រទេសនៅអឺរ៉ុបបញ្ជាក់ឲ្យច្បាស់ថាតើអាវុធអ្វីខ្លះដែលអ៊ុយក្រែនត្រូវការ ដើម្បីឲ្យខាងក្រុមហ៊ុនងាយស្រួលផលិត និងផ្តល់ឲ្យរដ្ឋាភិបាលទីក្រុងកៀវប្រកបដោយប្រសិទ្ធភាព និងចំគោលដៅ ។

លោកស្រី Warden បាននិយាយនៅក្នុងបទសម្ភាសន៍ជាមួយសារព័ត៌មាន Financial Times ថា “អ្វីដែលសំខាន់បំផុតនៅពេលនេះគឺការទទួលបានសញ្ញា ឬការបញ្ជាក់ច្បាស់លាស់អំពីកម្រិត ក៏ដូចជាប្រភេទអាវុធដែលយើងត្រូវយកចេញពីឃ្លាំងផ្ដល់ឲ្យអ៊ុយក្រែន” ។

លោកស្រី Warden បាននិយាយថា បញ្ហាខ្សែសង្វាក់ផ្គត់ផ្គង់សកលបានកើនឡើងទ្វេដង ឬ ៣ ដងនៅក្នុងករណីមួយចំនួន ប៉ុន្តែចំពោះក្រុមហ៊ុន Northrop Grumman ត្រៀមខ្លួនជាស្រេចក្នុងការវិនិយោគ ក៏ដូចជាពង្រីកផលិតកម្មរហូតដល់មានកិច្ចសន្យាថ្មីជាមួយអ៊ុយក្រែន ប៉ុន្តែឧស្សាហកម្មក៏ត្រូវការទទួលបានសញ្ញាបញ្ជាក់ច្បាស់លាស់ផងដែរថា អាវុធបែបណាសម្រាប់តម្រូវការរបស់អ៊ុយក្រែន ។

កាសែតបានកត់សម្គាល់ថា ក្រុមហ៊ុនការពារជាតិមួយផ្សេងទៀតក៏បានចាប់ផ្តើមទិញសមាសធាតុចាំបាច់រួចទៅហើយ ក្នុងការរំពឹងទុកនៃកិច្ចសន្យាសម្រាប់ផ្ដល់អាវុធបន្ថែមទៀតដល់អ៊ុយក្រែន ប៉ុន្តែវាក៏មានហានិភ័យផងដែរ នៅពេលអាវុធដែលផលិតរួចហើយមិនត្រូវបានប្រើប្រាស់នៅកន្លែងណាមួយនោះ ។

ជាចុងក្រោយកាសែត Financial Times បញ្ជាក់ថា អ្នកម៉ៅការសំខាន់ៗរបស់សហរដ្ឋអាមេរិកក៏បានជួបជាមួយអ្នកតំណាងមន្ទីរបញ្ចកោណជាច្រើនដងក្នុងមួយសប្តាហ៍ដើម្បីពិភាក្សាអំពីអាវុធដែលកំពុងត្រូវបានបញ្ជូនទៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ថា រុស្ស៊ី​ គ្រោងកាត់យក​ទឹកដី​អ៊ុយក្រែនបន្ថែមទៀត ​បញ្ចូលជាឧបសម្ព័ន្ធ