អាមេរិក ថា រុស្ស៊ី​ គ្រោងកាត់យក​ទឹកដី​អ៊ុយក្រែនបន្ថែមទៀត ​បញ្ចូលជាឧបសម្ព័ន្ធ 

រុស្ស៊ី​ គ្រោង​នឹងកាត់យកទឹកដី​អ៊ុយក្រែន​បន្ថែម​ទៀត ​បញ្ចូលជាឧបសម្ព័ន្ធ ដោយ​ប្រើយុទ្ធសាស្រ្ត​ស្រដៀងទៅ​នឹង​ការកាត់យកតំបន់ Crimea។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយលើកឡើងពីព័ត៌មានសម្ងាត់របស់សហរដ្ឋអាមេរិក, អ្នកនាំពាក្យក្រុមប្រឹក្សាសន្តិសុខជាតិ លោក John Kirby បាននិយាយថា ប្រទេសរុស្ស៊ីកំពុងដាក់មូលដ្ឋានគ្រឹះ សម្រាប់ការកាត់បញ្ចូលជាឧបសម្ព័ន្ធរួចទៅហើយ។

លោក​​និយាយ​ថា ​តំបន់​ដែល​កាន់កាប់នៅ​អ៊ុយក្រែន ​អាច​ធ្វើ​ប្រជាមតិ លើ​ការ​ចូលរួម​ជាមួយ​រុស្ស៊ី​ យ៉ាងយូរនៅ​ខែ​កញ្ញា។

លោក Kirby ប្រាប់អ្នកយកព័ត៌មានថា “យើងចង់បញ្ជាក់យ៉ាងសាមញ្ញចំពោះប្រជាជនអាមេរិក។ គ្មាននរណាម្នាក់ ត្រូវបានបោកបញ្ឆោតដោយរឿងនេះទេ។ ប្រធានាធិបតីរុស្ស៊ី លោក វ្ល៉ាឌីមៀរ ពូទីន កំពុងប្រើយុទ្ធសាស្រ្តដូចកាលឆ្នាំ២០១៤”។

ស្របពេលជាមួយគ្នានោះដែរ លោកបានចោទប្រកាន់រុស្ស៊ីថា បានតែងតាំងមន្ត្រីគាំទ្ររុស្ស៊ីខុសច្បាប់ ឲ្យទៅគ្រប់គ្រងតំបន់កាន់កាប់នៅអ៊ុយក្រែន ក្នុងគោលបំណងរៀបចំធ្វើប្រជាមតិលើការក្លាយជាផ្នែកមួយនៃប្រទេសរុស្ស៊ី។

គួរបញ្ជាក់ថា តំបន់ Crimea ត្រូវបានបញ្ចូលដោយរុស្ស៊ីក្នុងឆ្នាំ ២០១៤ បន្ទាប់ពីការធ្វើប្រជាមតិដែលបានរៀបចំយ៉ាងប្រញាប់ប្រញាល់ ហើយត្រូវបានសហគមន៍អន្តរជាតិចាត់ទុកថា ខុសច្បាប់។

អ្នកគាំទ្រទីក្រុងកៀវជាច្រើន បានធ្វើពហិការចូលរួមការបោះឆ្នោត ហើយយុទ្ធនាការនោះ មិនសេរី និងយុត្តិធម៌ឡើយ។

ការបោះឆ្នោតស្រដៀងគ្នានេះ ដែលបានធ្វើឡើងនៅផ្នែកផ្សេងទៀតនៃប្រទេសអ៊ុយក្រែន គឺស្ទើរតែបញ្ជាក់ឲ្យឃើញពីស្ថានភាពស្រដៀងគ្នា៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី ថា នឹងសម្រេចគោលដៅជាមុនសិន ទើបកំណត់លក្ខខណ្ឌសម្រាប់កិច្ចព្រមព្រៀងសន្តិភាព តាមក្រោយ