នៅប្រទេសថៃ កាលពីម្សិលមិញនេះ មានការភ្ញាក់ផ្អើលមួយបានកើតឡើង នៅជាយទីក្រុងបាងកក រហូតធ្វើឲ្យប្រជាពលរដ្ឋមកចោមរោមមើល ខណ:ឃើញតម្រួតចូលទៅនាំខ្លួនព្រះសង្ឃមួយអង្គ ចេញពីសណ្ឋាគារទាំងកណ្តាលអាធ្រាត្រ។

ម្ចាស់ភោជនីយដ្ឋាន និងខារាអូខេ មួយកន្លែង បាននិយាយថា នៅព្រលប់កើតហេតុ មានបុរសម្នាក់(គ្មានសក់) បានចូលទៅផឹកស៊ីក្នុងបន្ទប់ខារាអូខេរបស់លោក ដោយបានកុម្មង់ម្ហូប និងផឹកស្រាបៀរ ឆាង អស់រហូតដល់២កែស។ បុរសម្ចាស់ហាងបានបន្តថា ជាទូទៅ នៅម៉ោង១០ និង ៣០ នាទីយប់ ហាងរបស់លោកត្រូវបិទ ដូច្នេះ បុគ្គលិករបស់លោកតែងតែសុំភ្ញៀវគិតលុយ។ ដោយឡែកបុរសម្នាក់នេះ ក៏ដូចគេដែរ ប៉ុន្តែគេបែរជានិយាយថា ចាំទៅដកលុយចេញពីទូរ ATM សិន ចាំយកមកចាយឲ្យ រួចហើយគេក៏ចាកចេញទៅ ដោយសារមិនទុកចិត្តលោកឲ្យបុគ្គលិកម្នាក់ទៅតាម ដើម្បីយកលុយ។

នៅទីបំផុត បុរសម្នាក់នោះ បានដើរចូលទៅក្នុងបន្ទប់សណ្ឋាគារ លេងចេញមកខាងក្រៅ ទើបលោកសម្រេចចិត្តប្តឹងទៅសមត្ថកិច្ចតែម្តង ដើម្បីឲ្យជួយអន្តរាគមន៍។ ផ្ទុយទៅវិញ ពេលបើកទ្វារបន្ទប់សណ្ឋា​គារ បែរជាឃើញព្រះសង្ឃសឹងធ្វើព្រងើយ ហាក់អត់ដឹងអីទាល់តែសោះ។ នៅពេលនោះដែរ សមត្ថកិច្ចបាននាំខ្លួនសង្ឃអង្គនេះ ទៅកាន់ស្ថានីយ៍តម្រួតដើម្បីសាកសួរ ទីបំផុតសង្ឃកំហូចនេះព្រមឆ្លើយ នៅពេលដែលម្ចាស់ហាងលើកឡើងចំៗថា អស់ស្រាបៀរ ២កែស និងម្ហូប សរុបចំនួន ៣ ០២៥ បាត។ ព្រះតេជគុណ មេគណ បានចុះទៅផ្សឹកទាំងយប់ ដើម្បីប្រគល់ឲ្យសមត្ថកិច្ចធ្វើការតាមផ្លូវច្បាប់៕

អត្ថបទ ៖ សោ និយមរ័ត្ន