ដុំភ្លើងចម្លែក ត្រូវគេប្រទះឃើញហោះលើមេឃនៅ ជប៉ុន (មានវីដេអូ)

យោងតាមសារព័ត៌មានក្នុងស្រុកបានឲ្យដឹងថា ដុំភ្លើងដ៏ចម្លែក ត្រូវបានគេឃើញហោះលើខេត្តអូគីណាវ៉ារបស់ប្រទេសជប៉ុន កាលពីយប់ថ្ងៃពុធទី១០ខែឧសភា ហើយមនុស្សជាច្រើននាក់បានថតជាប់ជាវីដេអូ រួចយកទៅបង្ហោះក្នុងប្រព័ន្ធផ្សព្វផ្សាយសង្គម។

វីដេអូដែលថតដោយអ្នកយកព័ត៌មាន NHK នៅម៉ោង៨:៣០នាទីយប់ បានបង្ហាញពីវត្ថុដែលកំពុងឆេះពេញផ្ទៃមេឃ ជិតទីក្រុង Naha ក្នុងតំបន់ចុងភាគខាងត្បូងរបស់ប្រទេសជប៉ុន។ អ្នក​កាសែតរូបនេះ​និយាយ​ថា ពួក​គេ​​ភ្ញាក់​ផ្អើល​ចំពោះអ្វីដែល​ឃើញ ដោយដំបូង​គិត​ថា​វា​ជា​កាំជ្រួច ប៉ុន្តែ​គាត់មិនបាន​ឮ​សំឡេង​ទេ ហើយ​វាហោះទៅ​ត្រង់​។

ក្រោយមក ក្រុមអង្កេតតារាសាស្ត្រ Ishigakijima ដែលមានទីតាំងនៅទីក្រុង Ishigaki លើខ្សែសង្វាក់កោះ អូគីណាវ៉ា បានបញ្ជាក់ថា ពួកគេក៏ប្រទះឃើញពន្លឺភ្លើងនៅលើមេឃ នាភាគខាងជើងវេលាម៉ោង៨:៣៣នាទីយប់ដែរ។

ថ្វីបើវត្ថុនោះមិនទាន់ត្រូវបានបញ្ជាក់ច្បាស់ថាជាអ្វីក៏ដោយ ប៉ុន្តែក្រុមអង្កេត Ishigakijima បានផ្តល់ការពន្យល់ដែលអាចជឿជាក់បានថា នោះអាចជាបំណែកពីគ្រាប់រ៉ុកកែតរបស់ចិន ដែលបាញ់បង្ហោះកាលពីខែវិច្ឆិកាឆ្នាំមុន៕

ប្រែសម្រួល៖ Vann Vann

ប្រភព៖ RT

ចុចអាន៖ ជប៉ុន ព្រមានថា គ្រោះរញ្ជួយដីដ៏ខ្លាំងក្លា នឹងវាយប្រហារក្នុងពេលឆាប់ៗនេះ