បក្សភឿថៃ គំរាមដកខ្លួនចេញពីក្រុមចម្រុះ បើមិនបានតំណែងកំពូលមួយនេះ

គណបក្សភឿថៃបាននិយាយចំៗថា ចង់បានតំណែងជាប្រធានសភា បើមិនដូច្នោះទេ គណបក្សមួយនេះអាចនឹងប្រកាសដកខ្លួនចេញពីក្រុមចម្រុះដែលដឹកនាំដោយគណបក្សចលនាឆ្ពោះទៅមុខ ។

ដៃគូសម្ព័ន្ធភាពដែលមានសក្តានុពលមួយនេះបានប្រកាសថា វានឹងមានភាពអយុត្តិធម៌ ប្រសិនបើគណបក្សចលនាឆ្ពោះទៅមុខ ដែលដឹកនាំដោយអនាគតនាយករដ្ឋមន្ត្រីលោក Pita Limjaroenrat សម្រេចចិត្តដឹកនាំទាំងអំណាចប្រតិបត្តិ និងនីតិបញ្ញត្តិរបស់រដ្ឋាភិបាល ។

សមាជិកកំពូល ២ រូបនៃគណបក្សភឿថៃបានសម្តែងការខកចិត្តបែបនេះ ពោលមួយថ្ងៃ បន្ទាប់ពីលោក Piyabutr Saengkanokkul អតីតអគ្គលេខាធិការគណបក្សអនាគតឆ្ពោះទៅមុខ បាននិយាយនៅក្នុងការបង្ហោះលើហ្វេសប៊ុកថា គណបក្សចលនាឆ្ពោះទៅមុខ មិនត្រឹមតែជាប់តំណែងនាយករដ្ឋមន្ត្រីប៉ុណ្ណោះទេ សមាជិកបក្សនេះក៏ត្រូវតែទទួលបានតំណែងប្រធានសភាផងដែរ ។

បន្ទាប់ពីដឹងរឿងរ៉ាវនេះដែរ មេដឹកនាំគណបក្សភឿថៃ លោក Cholnan Srikaew បានឆ្លើយតបទៅវិញថា ទស្សនៈរបស់លោក Piyabutr អាចនឹងមានផលប៉ះពាល់ដល់កិច្ចសហប្រតិបត្តិការ ឬកិច្ចពិភាក្សាជុំវិញមុខតំណែងនាយករដ្ឋមន្ត្រីរបស់លោក Pita ។

គណបក្សភឿថៃកាលពីថ្ងៃចន្ទបានចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយគណបក្សចលនាឆ្ពោះទៅមុខ និងគណបក្សចំនួន ៦ ផ្សេងទៀតដើម្បីបង្កើតរដ្ឋាភិបាលចម្រុះ ខណៈក្រុមចម្រុះនេះនឹងលើកមេដឹកនាំបក្សចលនាឆ្ពោះទៅមុខលោក Pita Limjaroenrat ជានាយករដ្ឋមន្ត្រី ។

ជាចុងក្រោយសមាជិកសភាគណបក្សភឿថៃដែលជាប់ឆ្នោតរូបនេះបានបញ្ជាក់ថា ប្រសិនបើគណបក្សចលនាឆ្ពោះទៅមុខ ចង់កាន់តំណែងទាំងនាយករដ្ឋមន្ត្រី និងប្រធានសភាផងនោះ, គណបក្សគួរតែទទួលបានអាសនៈ ៣៧៧ នៅក្នុងសភាជាន់ទាប ដូចដែលគណបក្សថៃរ៉ាក់ថៃ ធ្លាប់ធ្វើបានកាលពីឆ្នាំ ២០០៦ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោកស្រី យីងឡាក់ និយាយយ៉ាងណាខ្លះ ក្រោយបោះឆ្នោត?