ថៃបង្ក្រាបថ្នាំញៀនប្រភេទម៉ាទឹកកក ជាង១តោន នៅខេត្តសុងខ្លា

ថ្នាំញៀនប្រភេទម៉ាទឹកកកទម្ងន់ជាង១តោន ត្រូវបានកម្លាំងនាយកដ្ឋានប្រឆាំងគ្រឿងញៀន ធ្វើការស្រាវជ្រាវ និងចុះបង្ក្រាប​ដល់លំនៅឋាន ប៉ុន្តែចៃដន្យមិនមានមុខសញ្ញានៅក្នុងផ្ទះម្នាក់ឡើយ។

យោងតាមការផ្សាយរបស់គេហទំព័រ NEWS បានបញ្ជាក់ថា កិច្ចប្រតិបត្តិការរបស់កម្លាំងពិសេស គឺបានធ្វើឡើងនៅរសៀលថ្ងៃទី២៦ ខែឧសភា ឆ្នាំ២០២៣ នៅចំណុចផ្ទះនៅក្នុងចម្ការស្លាមួយកន្លែង ក្នុងភូមិ៥ ឃុំធំុខាមីន ស្រុកណាមុំ ខេត្តសុងខ្លា ប្រទេសថៃ។

ព័ត៌មានបានបន្តថា ពេលសមត្ថកិច្ចចុះទៅដល់ គឺមិនមានមុខសញ្ញាណាម្នាក់នៅក្នុងផ្ទះនោះឡើយ ទើបសមត្ថកិច្ចចាប់ផ្តើមកិច្ចប្រតិបត្តិការរុករកសារធាតុញៀនដោយការប្រុងប្រយ័ត្ន ទីបំផុតក៏បានរកឃើញថ្នាំញៀនប្រភេទម៉ាទឹកកក នៅក្នុងផ្ទះផង និងនៅក្នុងបាតក្រោមរថយន្តផង ដែលគេបានកែច្នៃធ្វើជាកន្លែងលាក់ថ្នាំញៀនសរុបទម្ងន់ ១.២០០ គីឡូក្រាម បើគិតជាទឹកប្រាក់ចំនួន ១៤៤ លានបាត។

សមត្ថកិច្ចជំនាញបានអះអាងថា ថ្នាំញៀនទាំងនេះ គឺមុខសញ្ញាត្រៀមបញ្ជូនចេញទៅប្រទេសម៉ាឡេសុី ហើយបើគិតជាទឹកប្រាក់នៃការលក់ ទិញនៅក្នុងតំបន់នោះ ក្នុង១kg ស្មើនឹងតម្លៃ១២មុឺនបាត ប៉ុន្តែបើគេនាំចេញដល់ប្រទេសម៉ាឡេសុី ក្នុង១kg តម្លៃ ២៤ មុឺនបាត គឺទ្វេគុណ។

បច្ចុប្បន្នសមត្ថកិច្ចថៃបាននាំថ្នាំញៀនទាំងនេះទៅរក្សាទុក ហើយក៏កំពុងធ្វើការស្រាវជ្រាវ ទៅតាមស្លាកលេខរថយន្តដែលចតនៅទីនោះចំនួន៣គ្រឿង ដើម្បីតាមរកមុខសញ្ញាយកមកផ្តន្ទាទោសទៅតាមផ្លូវច្បាប់៕

អត្ថបទ៖ សោ និយមរ័ត្ន