ប៉ូលិសចាប់បានថ្នាំញៀនជាង៤.៨លានគ្រាប់រត់ពន្ធពីមីយ៉ាន់ម៉ាចូលថៃ

ប៉ូលិសនៅខេត្តឈៀងរ៉ៃ ប្រទេសថៃរឹបអូសបានថ្នាំគ្រាប់មេតំហ្វេតាមីនជាង ៤.៨ លានគ្រាប់ បន្ទាប់ពីជនរត់ពន្ធម្នាក់ទុករថយន្តភីកអាប់ចោលហើយរត់គេចខ្លួនដោយលោតចូលទន្លេមេគង្គកាលយប់ថ្ងៃព្រហស្បតិ៍។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី២៤ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប៉ូលិសថៃ ពួកគេបានទទួលព័ត៌មានថាការដឹកជញ្ជូនគ្រឿងញៀនដ៏ធំមួយពីប្រទេសមីយ៉ាន់ម៉ានឹងចូលទៅក្នុងស្រុក Chiang Saen។ ប៉ូលិសក៏បានបង្កើនប៉ុស្តិ៍ត្រួតពិនិត្យដើម្បីបញ្ឃប់រថយន្ត។ ក្រោយមកក៏បានឃើញរថយន្ត Nissan ពណ៌ប្រផេះមួយគ្រឿងដែលគ្មានស្លាកលេខកំពុងចាកចេញពីសណ្ឋាគារមួយ ហើយធ្វើដំណើរឆ្ពោះទៅកាន់តំបន់ត្រីកោណមាស ( ចំណុចប្រសព្វរវាង មីយ៉ាន់ម៉ា ថៃ និងឡាវ)។

នៅពេលយប់រថយន្តក៏បានបង្កើនល្បឿន ប៉ុន្តែសំបកកង់រថយន្តមួយបានផ្ទុះ បង្ខំឱ្យរថយន្តឈប់នៅជិតផ្សារ Si Phandin។ ដោយខ្លាចប៉ូលិសចាប់បាន អ្នកបើកបររថយន្តបានរត់ឆ្ពោះទៅកាន់ទន្លេ ហើយលោតចូលទៅក្នុងទឹកគេចខ្លួនបាត់។

ក្រោយការឆែកឆេរ ប៉ូលិសរកឃើញថង់ចំនួន ១៩ នៅក្នុងរថយន្ត ពោរពេញទៅដោយថ្នាំគ្រាប់មេតំហ្វេតាមីនជាង ៤.៨ លានគ្រាប់ ទម្ងន់ប្រហែល ៥៣៦ គីឡូក្រាម។ ថ្នាំញៀនទាំងនេះត្រូវបានយកទៅស្ថានីយ៍ប៉ូលិស ដើម្បីស៊ើបអង្កេតស្វែងរក និងចាប់ខ្លួនអ្នកដែលពាក់ព័ន្ធនឹងប្រតិបត្តិការរត់ពន្ធនេះ។

គួរបញ្ជាក់ថាប្រទេសថៃបានក្លាយជាផ្លូវឆ្លងកាត់ដ៏សំខាន់មួយសម្រាប់ការជួញដូរគ្រឿងញៀន ដោយក្រុមជួញដូរគ្រឿងញៀនប្រើប្រាស់ប្រទេសនេះដើម្បីដឹកជញ្ជូនគ្រឿងញៀន ជាពិសេសប្រភេទថ្នាំមេតំហ្វេតាមីន ពីកន្លែងផលិតនៅក្នុងតំបន់ត្រីកោណមាស ទៅកាន់ទីផ្សារនានាទូទាំងអាស៊ី និងលើសពីអាស៊ីទៅទៀត។ បើទោះបីជាមានការបង្ក្រាបជាបន្តបន្ទាប់ក៏ដោយ ប៉ុន្តែព្រំដែនដ៏វែងឆ្ងាយ និងមានទន្លេសម្រាប់ឆ្លងកាត់ បានធ្វើឱ្យប្រទេសថៃក្លាយជាតំណភ្ជាប់ដ៏សំខាន់មួយនៅក្នុងបណ្តាញជួញដូរគ្រឿងញៀនអន្តរជាតិ៕

អត្ថបទ៖ ប៊ុន សុភាព