សន្តិសុខសង្គម

មន្ទីរប្រឆាំងគ្រឿងញៀន បញ្ជូនជនសង្ស័យម្នាក់ និងថ្នាំញៀនជាង ៤ គីឡូក្រាម ទៅតុលាការ

បានផុស

១១ ខែ មុន

នៅ

ថ្ងៃចន្ទ ១៦ មិថុនា ២០២៥

ដោយ

អ៊ិន ពិសី

ជនសង្ស័យម្នាក់ និងវត្ថុតាងគ្រឿងញៀនជាង ៤ គីឡូក្រាម ត្រូវបាននគរបាលប្រឆាំងគ្រឿងញៀន បញ្ជូនទៅកាន់តុលាការ ដើម្បីកាត់ទោស។

ជាក់ស្ដែងនៅរសៀលថ្ងៃទី ១៦ ខែមិថុនា ឆ្នាំ ២០២៥ នេះ ជនសង្ស័យម្នាក់ ដែលពាក់ព័ន្ធជាមួយគ្រឿងញៀន ជាង ៤ គីឡូក្រាម ត្រូវបានកម្លាំងជំនាញបញ្ជូនទៅកាន់តុលាការ ក្រោយបញ្ចប់ការសាកសួរ។

តាមប្រភពពីនគរបាលជំនាញ នៃមន្ទីរប្រឆាំងបទល្មើសគ្រឿងញៀន បានឲ្យដឹងថា កាលពីវេលាម៉ោង ៤ រសៀល ថ្ងៃទី ១៣ ខែមិថុនា ឆ្នាំ ២០២៥ ដោយសហការជាមួយស្នងការដ្ឋានរាជធានីភ្នំពេញ និងដោយមានការដឹកនាំ សម្របសម្រួល ពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក គឹម ហុងសាន បានចុះស្រាវជ្រាវស៊ើបអង្កេតរហូតឈានដល់ការបង្ក្រាបករណី រក្សាទុក ដឹកជញ្ជូន និងជួញដូរ ដោយខុសច្បាប់នូវសារធាតុញៀន ស្ថិតនៅចំណុចផ្លូវបេតុង ៥០ ម៉ែត្រ ភូមិប្រការ សង្កាត់ព្រៃ.ស ខណ្ឌដង្កោ រាជធានីភ្នំពេញ។

ក្នុងរង្វង់ប្រតិបត្តិការនេះដែរ នគរបាល បានចាប់ជនសង្ស័យ ១ នាក់ ភេទប្រុស ជនជាតិខ្មែរ អាយុ ៣២ ឆ្នាំ និងដកហូតវត្ថុតាងគ្រឿងញៀនប្រភេទកេតាមីន (Ketamine) ទម្ងន់ ៧០៧.៥៩ ក្រាម , គ្រឿងញៀនប្រភេទអ៊ិចស្តាស៊ី (MDMA) ទម្ងន់ ២០៦៦,០៥ ក្រាម , គ្រឿងញៀនប្រភេទ មេតំហ្វេតាមីន (WY,ICE) ទម្ងន់ ១២៩២.០៥ ក្រាម សរុបរួមសារធាតុញៀនទម្ងន់ជាង ៤ គីឡូក្រាម។

បច្ចុប្បន្ន ជនល្មើស និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

អត្ថបទ ៖ រដ្ឋា