អ្នករស់រានមានជីវិតពីសង្គ្រាមរបស់លោក Kissinger រៀបរាប់ហេតុការណ៍​ដែល អាមេរិក ទម្លាក់គ្រាប់បែក មកលើ កម្ពុជា

អ្នករស់រានមានជីវិតនៅភូមិខ្មែរចំនួន ១៣ នៅតាមបណ្តោយព្រំដែនវៀតណាមរៀបរាប់បានប្រាប់ទីភ្នាក់ងារ The Intercept អំពីការវាយប្រហារដោយការទម្លាក់គ្រាប់បែករបស់សហរដ្ឋអាមេរិកមកលើកម្ពុជា ដែលបានសម្លាប់សាច់ញាតិ និងអ្នកជិតខាងរាប់រយនាក់ ដោយសារតែការបញ្ជារបស់លោក Henry Kissinger ក្រោមការកាន់កាប់របស់លោកប្រធានាធិបតី Richard Nixon ។

ក្នុងកិច្ចសម្ភាសន៍ជាមួយសាក្សីនៅកម្ពុជា និងអ្នករស់រានមានជីវិតពីជំនាន់សង្គ្រាមរបស់អាមេរិកជាង ៧៥ នាក់ ពួកគេសុទ្ធតែបានបង្ហាញយ៉ាងលម្អិតអំពីការរងរបួសទាំងផ្លូវកាយ និងផ្លូវចិត្តដូចៗគ្នា ។

អ្នកស្រី មាស លន អ្នករស់រានមានជីវិតម្នាក់បានរៀបរាប់ថា ហេតុការណ៍ទម្លាក់គ្រាប់បែករបស់អាមេរិកមកលើកម្ពុជា ចន្លោះឆ្នាំ ១៩៦៩ និងឆ្នាំ ១៩៧៣ គឺពិតជារន្ធត់ និងតក់ស្លុតជាងគោលនយោបាយដែលដាក់ចេញដោយលោក Kissinger ទៅទៀត ពីព្រោះភូមិទាំងនោះមិនត្រឹមតែត្រូវបានទម្លាក់គ្រាប់បែកប៉ុណ្ណោះទេ ប៉ុន្តែថែមទាំងរងការវាយប្រហារដោយគ្រាប់កាំភ្លើងបាញ់ចេញពីឧទ្ធម្ភាគចក្រ ក៏ដូចជាមានការលួចដុតភូមិ និងការលួចទ្រព្យសម្បត្តិពីសំណាក់កងទ័ពសហរដ្ឋអាមេរិក និងសម្ព័ន្ធមិត្តផងដែរ ។

ក្នុងហេតុការណ៍ទម្លាប់គ្រាប់បែកដែលមានលោក Kissinger ជាអ្នកនៅពីក្រោយ និងបានសម្លាប់ប្រជាពលរដ្ឋស្លូតត្រង់របស់កម្ពុជាប្រមាណ ៥ ម៉ឺននាក់ និងជនស៊ីវិលផ្សេងទៀត ក្នុងអំឡុងសតវត្សរ៍ឆ្នាំ ១៩៧០ នោះ ទាហាន​អាមេរិក​ដែល​ជាប់​ពាក់ព័ន្ធ​នឹងព្រឹត្តិការណ៍ដ៏ឃោរឃៅនេះ គឺមិនទទួល​បាន​ការ​ដាក់​ទណ្ឌកម្មណាមួយនោះទេ ។

នៅពេលនោះលោក Kissinger បានបញ្ជាឲ្យមានការទម្លាក់គ្រាប់បែកចំនួន ៣ ដង ហើយគ្រាន់តែក្នុងឆ្នាំ ១៩៧៣ យន្តហោះទម្លាក់គ្រាប់បែកបានទម្លាក់គ្រាប់បែកជាង ២៥៧,០០០ តោនមកលើប្រទេសកម្ពុជា ហើយរាប់ចាប់តាំងពីប្រឡូកក្នុងឆាកនយោបាយមក អ្នកការទូតអាមេរិករូបនេះបានបញ្ជាឲ្យមានសកម្មភាពទម្លាក់គ្រាប់បែកក្នុងសម័យសង្គ្រាមសរុបចំនួន ៣,៨៧៥ លើក ។

ពាក់ព័ន្ធនឹងបញ្ហានេះដែរ លោក Ben Kiernan អាជ្ញាធរជាន់ខ្ពស់មួយរូបក្នុងយុទ្ធនាការផ្លូវអាកាសរបស់សហរដ្ឋអាមេរិកនៅកម្ពុជា បានឲ្យដឹងថា លោក Kissinger គឺជាអ្នកទទួលបន្ទុកយ៉ាងសំខាន់ចំពោះការវាយប្រហារនៅក្នុងប្រទេសកម្ពុជា ដែលបានសម្លាប់ជនស៊ីវិលរហូតដល់ ១៥ ម៉ឺននាក់ ។

សរុបមកអតីតរដ្ឋមន្ត្រីការបរទេសដែលឈានចូលដល់វ័យ ១០០ ឆ្នាំកាលពីថ្ងៃទី២៧ ខែឧសភា និងជាអ្នកបញ្ជាឲ្យមានការទម្លាក់គ្រាប់បែកនៅកម្ពុជា និងឡាវ ក្រោមលេសដេញវៀតណាម ក៏ដូចជាអំពើភេរវកម្មផ្សេងៗទៀតលើពិភពលោក បានទទួលស្គាល់ថា ជនស៊ីវិលយ៉ាងហោចណាស់ ៣ លាននាក់បានស្លាប់ក្រោមកណ្ដាប់ដៃរបស់លោក ៕

ប្រែសម្រួលដោយ ៖ ជីវ័ន្ត

ប្រភព ៖ Madras Tribune

ចុចអាន ៖ លោក Henry Kissinger ជាអ្នកនៅពីក្រោយការទម្លាក់គ្រាប់បែករបស់ អាមេរិក សម្លាប់ប្រជាជនកម្ពុជា ៥ ម៉ឺននាក់