UN ឲ្យ មីយ៉ាន់ម៉ា វិលទៅរកការគ្រប់គ្រងតាមបែបលទ្ធិប្រជាធិបតេយ្យ និងមានការបោះឆ្នោតត្រឹមត្រូវ

អង្គការសហប្រជាជាតិ (UN) កាលពីថ្ងៃចន្ទបានទាមទារភ្លាមៗឲ្យប្រទេសមីយ៉ាន់ម៉ាវិលត្រឡប់ទៅរកការគ្រប់គ្រងតាមបែបលទ្ធិប្រជាធិបតេយ្យវិញ និងកុំពន្យារពេលបោះឆ្នោត ក្រោយពេលដែលយោធាបានប្រកាសបន្តដាក់ប្រទេសក្នុងស្ថានភាពអាសន្នរយៈពេល ៦ ខែទៀត ។

អ្នកនាំពាក្យរងរបស់អង្គការសហប្រជាជាតិ (UN) លោក Farhan Haq បានប្រាប់អ្នកសារព័ត៌មានថា “យើងនៅតែបន្តប្រឆាំងនឹងរដ្ឋប្រហារយោធា ហើយយើងចង់ឲ្យប្រទេសមីយ៉ាន់ម៉ាវិលត្រឡប់ទៅការគ្រប់គ្រងតាមបែបប្រជាធិបតេយ្យវិញ ឲ្យបានឆាប់តាមដែលអាចធ្វើទៅបាន” ។

រហូតមកដល់ពេលនេះ ​យោធា​មីយ៉ាន់ម៉ាដែលដឹកនាំដោយលោក មីន អ៊ុងឡាំង បាន​បន្ត​ដាក់​ប្រទេស​ក្នុង​ស្ថានភាពអាសន្ន​ជា​លើក​ទី​ ៤ ​ហើយ បន្ទាប់​ពីអស់សុពលភាពកាលពី​ថ្ងៃ​ទី ៣១ ខែ​កក្កដា ចាប់​តាំង​ពី​កម្លាំងយោធា​បាន​ធ្វើ​រដ្ឋប្រហារកាលពី​ ២ ឆ្នាំមុន ។

ទន្ទឹមនោះ ក្រុមប្រឹក្សាការពារជាតិ និងសន្តិសុខរបស់មីយ៉ាន់ម៉ា ក៏បានពិភាក្សាអំពីការពន្យារពេលបោះឆ្នោតនៅក្នុងប្រទេសផងដែរ បន្ទាប់ពីប្រទេសអាស៊ីអាគ្នេយ៍មួយនេះបានស្ថិតក្នុងភាពចលាចល ចាប់តាំងពីយោធាបានផ្តួលរំលំរដ្ឋាភិបាលរបស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ ២០២១ ។

យោងតាមអង្គការសហប្រជាជាតិ (UN) បានឲ្យដឹងថា មនុស្សជាង ១.៥ លាននាក់ត្រូវបានផ្លាស់ទីលំនៅក្នុងភាពចលាចលនៃសង្គ្រាមស៊ីវិលរបស់មីយ៉ាន់ម៉ា ក្នុងរយៈពេល ២ ឆ្នាំចុងក្រោយនេះ ខណៈកុមារជាង ៥ លាននាក់ត្រូវការជំនួយមនុស្សធម៌យ៉ាងខ្លាំង ។

ស្របពេលជាមួយគ្នានេះ ទិន្នន័យរបស់អង្គការសហប្រជាជាតិ (UN) ក៏បានបង្ហាញដែរថា យ៉ាងហោចណាស់មនុស្ស ២,៨៩០ នាក់បានបាត់បង់ជីវិតក្រោមកណ្តាប់ដៃរបស់យោធា និងអ្នកដែលនៅក្រោមឱវាទរបស់ពួកគេ ខណៈដែលប្រជាជន ៧៦៧ នាក់ត្រូវបានចាប់ខ្លួន ចាប់តាំងពីយោធាឡើងកាន់អំណាច ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖អ្នកនយោបាយ ថៃ ៣ រូបវិភាគពីការវិលត្រឡប់ចូលស្រុករបស់លោក ថាក់ស៊ីន