អ្នកនយោបាយ ថៃ ៣ រូបវិភាគពីការវិលត្រឡប់ចូលស្រុករបស់លោក ថាក់ស៊ីន

អ្នកនយោបាយថៃចំនួន ៣ រូបដែលរួមមានអតីតមេដឹកនាំអាវក្រហម និងមេធាវី សុទ្ធតែបង្ហាញការវិភាគផ្សេងៗគ្នាអំពីការប្រកាសវិលត្រឡប់ចូលស្រុកវិញរបស់អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា នៅថ្ងៃទី១០ ខែសីហាខាងមុខនេះ ។

លោក Jatuporn Prompan អតីតមេដឹកនាំចលនាអាវក្រហម បាននិយាយនៅក្នុងការ Live តាម Facebook កាលពីពេលថ្មីៗនេះថា លោកមិនជឿទេដែលលោក ថាក់ស៊ីន ត្រៀមខ្លួនរួចជាស្រេចក្នុងការជាប់ពន្ធនាគាររយៈពេល ១០ ឆ្នាំនោះ ដូច្នេះ​ហើយ​លោកដាក់ក្ដី​រំពឹង​ថា អតីត​នាយក​រដ្ឋមន្ត្រី​ដែលកំពុងរស់នៅនិរទេសខ្លួន ​នឹង​លុប​ចោល​គម្រោង​វិល​ត្រឡប់ចូលស្រុក​វិញ​នៅ​ថ្ងៃ​ទី​១០ ខែ​សីហានេះ ។ លោក ថាក់ស៊ីន នឹងមិនត្រឡប់ចូលស្រុកវិញនោះទេ ព្រោះនៅពេលនេះ គាត់មិនអាចប្រាកដចិត្តនៅឡើយទេថា នឹងទទួលបានការលើកលែងទោសពីព្រះមហាក្សត្រសម្រាប់ការផ្តន្ទាទោសពីបទពុករលួយរបស់គាត់នោះ ។

លោក Jatuporn បានចង្អុលបង្ហាញថា លោក ថាក់ស៊ីន បានព្យាយាមចូលស្រុកចំនួន ២០ ដងមកហើយក្នុងរយៈពេល ១៧ ឆ្នាំចុងក្រោយនេះ សម្រាប់ការចរចាលើកលែងទោសពីព្រះមហាក្សត្រ ដើម្បីសុំកុំឲ្យគាត់ជាប់ពន្ធនាគារ ប៉ុន្តែទោះយ៉ាងណាក៏ដោយ ការប៉ុនប៉ងទាំង ២០ លើកនោះសុទ្ធតែបរាជ័យ ។

ចំណែកលោកមេធាវី Paisal Puechmongkol ដែលជាអតីតជំនួយការរងរបស់លោកឧត្តមសេនីយ Prawit Wongsuwan បាននិយាយថា ការវិលត្រឡប់របស់លោក ថាក់ស៊ីន នៅថ្ងៃទី១០ ខែសីហា គ្រាន់តែជាការប្រកាសប៉ុណ្ណោះ ហើយគណបក្សភឿថៃអាចយកបញ្ហានេះដើម្បីធ្វើជាល្បែងនយោបាយ ។

លោក​ Puechmongkol ក៏​បាន​លើកឡើងផងដែរ​ថា បើ​តាម​ហោរាសាស្ត្រ ការ​វិល​ត្រឡប់​របស់​លោក ថាក់ស៊ីន នឹង​ត្រូវ​បញ្ជាក់​ក្រោយ​ថ្ងៃ​ទី២០ ខែ​សីហា ប៉ុន្តែលោក​មិន​បាន​ផ្ដល់ពីព័ត៌មាន​លម្អិតណាមួយ​ឡើយ ។

ជាមួយគ្នានេះដែរ លោក Chuwit Kamolvisit ដែលជាអ្នកនយោបាយ និងជាអតីតសមាជិកសភាតំណាងរាស្ត្រប្រទេសថៃបានសរសេរបង្ហោះនៅលើបណ្ដាញសង្គម Facebook កាលពីថ្ងៃអាទិត្យថា ប្រសិនបើលោក ថាក់ស៊ីន សុខចិត្តជាប់ពន្ធនាគារមែននោះ លោកនឹងវិលត្រឡប់ចូលស្រុកវិញជាយូរយារណាស់មកហើយ ។

អ្នកនយោបាយវ័យ ៦១ ឆ្នាំរូបនេះបាននិយាយថា “អ្នកណាដែលគិតថា លោក ថាក់ស៊ីន នឹងត្រលប់ចូលស្រុកវិញនៅថ្ងៃទី១០ ខែសីហា ស្របពេលដែលប៉ូលិស និងមន្ត្រីកែប្រែ នៅរង់ចាំចាប់គាត់ដាក់ពន្ធនាគាររយៈពេល ១០ ឆ្នាំ គឺជាការគិតខុសទាំងស្រុងហើយ ព្រោះបើលោក ថាក់ស៊ីន ពិតជាចង់ត្រឡប់មកជាន់ដីថៃវិញនោះ លោកមិនមែនអង្គុយរង់ចាំរហូតដល់ ១៥ ទៅ ១៦ ឆ្នាំឡើយ” ។

ទន្ទឹមនោះ លោក Chuwit ជឿជាក់ថា លោក ថាក់ស៊ីន មានរបៀបវារៈលាក់កំបាំងសម្រាប់ពេលវេលានៃការវិលត្រឡប់ចូលស្រុករបស់គាត់ ខណៈពេលដែលប្រទេសនេះកំពុងស្ថិតក្នុងដំណើរការបង្កើតរដ្ឋាភិបាលថ្មី ។ ប៉ុន្តែទោះជាយ៉ាងណា លើកនេះលោក ថាក់ស៊ីន ក៏នឹង​ពន្យារ​ពេល​​វិល​ត្រឡប់​មកម្តង​ទៀតផងដែរ ប្រសិន​បើ​គណបក្ស​ភឿថៃ​មិន​អាច​បង្កើត​រដ្ឋាភិបាល​ថ្មីបាន ។

គួរបញ្ជាក់ថា ចាប់តាំងពីត្រូវបានផ្ដួលរំលំដោយរដ្ឋប្រហារយោធានៅថ្ងៃទី១៩ ខែកញ្ញា ឆ្នាំ ២០០៦ មក លោក ថាក់ស៊ីន បានរស់នៅនិរទេស លើកលែងតែដំណើរទស្សនកិច្ចរយៈពេលខ្លីមកកាន់ប្រទេសថៃក្នុងឆ្នាំ ២០០៨ ប៉ុណ្ណោះ ខណៈក្នុងអំឡុងពេលអវត្តមានរបស់លោកនៅពេលនោះដែរ នាយកដ្ឋានព្រហ្មទណ្ឌនៃតុលាការកំពូលសម្រាប់អ្នកកាន់តំណែងនយោបាយ បានកាត់ទោសលោកឲ្យជាប់ពន្ធនាគាររយៈពេល ១០ ឆ្នាំនៅក្នុងសំណុំរឿងក្ដីសំខាន់ៗចំនួន ៣ ករណី ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ កាន់តែច្បាស់ពីម៉ោងពេលដែលលោក ថាក់ស៊ីន នឹងជាន់ទឹកដី ថៃ សាជាថ្មី

ចុចអាន ៖ ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស