វៀតណាម​ នឹងផ្ដល់វ៉ាក់សាំងការពារជំងឺប៉េស្តជ្រូកអាហ្វ្រិក ២ លានដូសទៅ ហ្វីលីពីន

វៀតណាមនឹងនាំចេញវ៉ាក់សាំងប្រឆាំងនឹងជំងឺប៉េស្តជ្រូកអាហ្រ្វិកចំនួន ២ លានដូសទៅកាន់ប្រទេសហ្វីលីពីននៅខែតុលា បន្ទាប់ពីវៀតណាមបានអនុម័តការប្រើប្រាស់វ៉ាក់សាំងក្នុងស្រុកជាលើកដំបូងសម្រាប់ប្រឆាំងនឹងជំងឺនេះ ។

រដ្ឋាភិបាលវៀតណាមបញ្ជាក់ថា វ៉ាក់សាំងដែលនឹងដឹកជញ្ជូនទៅកាន់ប្រទេសហ្វីលីពីន គឺជាប្រភេទវ៉ាក់សាំងដែលផលិតឡើងដោយក្រមហ៊ុន AVAC Vietnam JSC  ហើយក្រុមហ៊ុនក៏បានដឹកជញ្ជូន ៣ សែនដូសទៅហ្វីលីពីនរួចហើយផងដែរ ចាប់តាំងពីការអនុម័តឲ្យប្រើប្រាស់ផ្លូវការ ។

ក្នុងរយៈពេលជាច្រើនឆ្នាំមកនេះ ជំងឺប៉េស្តជ្រូកអាហ្រ្វិកបានបង្អាក់ដល់ទីផ្សារសាច់ជ្រូកពិភពលោកក្នុងតម្លៃរហូតដល់ ២៥០ ពាន់លានដុល្លារ ខណការផ្ទុះឡើងដ៏អាក្រក់បំផុតក្នុងឆ្នាំ ២០១៨ ដល់ ២០១៩ មានជ្រូកប្រហែលពាក់កណ្តាលនៃចំនួនជ្រូកសរុបនៅក្នុងប្រទេសចិន ដែលជាអ្នកផ្គត់ផ្គង់ធំបំផុតរបស់ពិភពលោក បានងាប់ និងបណ្ដាលឲ្យមានការខាតបង់ជាង ១០០ ពាន់លានដុល្លារ ។

គួរបញ្ជាក់ថា​ កាលពីចុងខែ​មុន វៀតណាមបានអនុម័តច្បាប់ពាណិជ្ជកម្មវ៉ាក់សាំងដល់ក្រុមហ៊ុន NAVET-ASFVAC និង AVAC ASF LIVE បន្ទាប់ពីវ៉ាក់សាំងជាង ៦៥០,០០០ ដូស ត្រូវបានធ្វើតេស្តលើជ្រូកក្នុងខេត្តចំនួន ៤០ ទូទាំងប្រទេស ហើយវាបង្ហាញអត្រាប្រសិទ្ធភាពការពារប្រឆាំងជំងឺប៉េស្តជ្រូកអាហ្វ្រិករហូតដល់ ៩៥ ភាគរយ ៕

ប្រែសម្រួល ៖​ នាង រតនៈ

ប្រភព ៖ VN Express

ចុចអាន ៖ ថៃ និង វៀតណាម នាំគ្នាសម្រុកប្រមូលទិញស្រូវពីប្រជាកសិករ