ចំនួនប្រជាជន វៀតណាម នឹងធ្លាក់មកនៅ ៧២ លាននាក់ក្នុងឆ្នាំ ២១០០

បចុប្បន្ន វៀតណាមមានប្រជាជនជិត ១០០ លាននាក់ ប៉ុន្តែចំនួនប្រជាជននេះត្រូវបានគេរំពឹងថា នឹងកើនឡើងដល់ ១០៧​ លាននាក់ក្នុងឆ្នាំ ២០៤៤ ប៉ុន្តែនឹងធ្លាក់ចុះវិញនៅសល់ត្រឹម ៧២ លាននាក់ប៉ុណ្ណោះក្នុងឆ្នាំ ២១០០ ដោយសារតែអត្រាកំណើតទាប ។

លោក Ha Anh Duc ប្រធានការិយាល័យក្រសួងសុខាភិបាលបាននិយាយថា តាមរយៈការសិក្សាអន្តរជាតិដែលបានចេញផ្សាយនៅឆ្នាំ ២០២០ ចំនួនប្រជាជនក្នុងប្រទេសចំនួន ២៣ រួមមាន វៀតណាម ចិន ជប៉ុន កូរ៉េខាងត្បូង និងថៃ នឹងត្រូវកាត់បន្ថយពាក់កណ្តាលនៅឆ្នាំ ២១០០ ។

លោក Ha Anh Duc បញ្ជាក់ថា ទោះជាយ៉ាងណា ប្រជាជនវៀតណាមអាចនឹងកើនឡើងដល់ ១០៧ លាននាក់ក្នុងឆ្នាំ ២០៤៤ មុនពេលធ្លាក់ចុះដល់ ៧២ លាននាក់ក្នុងឆ្នាំ ២១០០ ប្រសិនបើមិនមានវិធានការបង្កើនអត្រាកំណើតទេនោះ ។

ជាក់ស្ដែងក្នុងរយៈពេលប៉ុន្មានទសវត្សរ៍កន្លងមកនេះ វៀតណាមមានអត្រាកំណើតធ្លាក់ចុះខ្លាំងមែនទែន ពោលស្ត្រីម្នាក់ធ្លាប់មានកូនចាប់ពី ៦.៥ នាក់កាលពីទសវត្សរ៍ឆ្នាំ ១៩៦០ ធ្លាក់មកត្រឹម ២.០៥ នាក់ក្នុងឆ្នាំ ២០២០ ។

ចំណែកបើតាមលោក Mai Trung Son អាជ្ញាធរប្រជាជនវៀតណាមបានលើកឡើងថា អត្រាកំណើតមានភាពខុសប្លែកគ្នាយ៉ាងខ្លាំងរវាងតំបន់នានារបស់វៀតណាម ខណៈក្រុងហូជីមីញ មានអត្រាកំណើតទាបបំផុត ពោលសម្រាប់ស្ត្រីម្នាក់ក្នុងវ័យពពោះមានលទ្ធភាពយកកូនតែ ១.៣៩ នាក់ប៉ុណ្ណោះ ។

ជារៀងរាល់ឆ្នាំនៅវៀតណាម មានប្តីប្រពន្ធប្រមាណ ១ លានគូ ឬស្មើនឹង ៧.៧ ភាគរយនៃប្ដីប្រពន្ធទាំងអស់មិនអាចមានកូនតាមបែបជីវសាស្រ្ត ហើយក្នុងចំណោមពួកគេប្រហែលពាក់កណ្តាល គឺជាអ្នកដែលមានអាយុក្រោម ៣០ ឆ្នាំ ។

គួរឲ្យដឹងថា សេចក្តីព្រាងច្បាប់ស្តីពីបញ្ហាប្រជាជននៅវៀតណាម កំពុងដាក់ស្នើទៅតំបន់ដែលមានអត្រាកំណើតទាប ដើម្បីផ្តល់ជំនួយហិរញ្ញវត្ថុសម្រាប់ស្ត្រីដែលកើតកូនទីពីរ ក៏ដូចជាការផ្តល់ការលើកលែងថ្លៃសិក្សាដល់កុមារផងដែរ ៕​

ប្រែសម្រួល៖ នាង រតនៈ

ប្រភព៖ VN Express