ព័ត៌មានអន្ដរជាតិ

ពិធីអភិសេក១០ថ្ងៃរបស់ព្រះរាជបុត្រ Mateen ធ្វើឲ្យសណ្ឋាគារនៅព្រុយណេរកកន្លែងស្នាក់នៅគ្មាន

បានផុស

២ years មុន

នៅ

ថ្ងៃចន្ទ ៨ មករា ២០២៤

ដោយ

ប្រភពព័ត៌មាន RTB ពីប្រទេសព្រុយណេបានបញ្ចាក់ឲ្យដឹងថា សណ្ឋាគារនៅក្នុងរាជធានីកំពុងមើលឃើញការកើនឡើងនៃការកក់សម្រាប់រយៈពេលនៃព្រះរាជពិធីរៀបអភិសេករវាងព្រះអង្គម្ចាស់ Abdul Mateen និង Anisha Isa Kalebic ដែលចាប់ផ្តើមពិធីសាសនាដំបូងគេ Majilis Istiadat Bersuruh Diraja កាលពីថ្ងៃម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ ភ្ញៀវកិត្តិយសបរទេសដែលបានអញ្ជើញមកចូលរួមក្នុងព្រះរាជពិធីនេះ ក៏ដូចជាអ្នកស្រុកចង់ទស្សនាព្រះរាជពិធីដង្ហែព្រះបរមរាជវាំងនៅថ្ងៃទី ១៤ ខែមករា បានសម្រុកកក់សណ្ឋាគារយ៉ាងច្រើនលើសលុប រហូតធ្វើឲ្យបន្ទប់គ្មានសល់កន្លែងទំនេរ។

លោក Andy Goh ដែលធ្វើការជាអ្នកគ្រប់គ្រងទូទៅនៅសណ្ឋាគារក្នុងស្រុកមួយក្នុងរាជធានីបាននិយាយថា បន្ទប់សម្រាប់ថ្ងៃនៃព្រះរាជពិធីគឺពេញហើយ ដោយជនជាតិព្រុយណេមកពីទូទាំងប្រទេស បានកក់កន្លែងស្នាក់នៅច្រើនថ្ងៃ។

ក្នុងនោះផងដែរ លោកបាននិយាយបន្ថែមទៀតថា “ភ្ញៀវបានធ្វើការកក់បន្ទប់នៅដើមខែតុលាឆ្នាំមុន ហើយបច្ចុប្បន្នបន្ទប់ទាំងអស់របស់យើងត្រូវបានកក់ទុក”។ ជាពិសេស ព្រឹត្តិការណ៍នេះជាពេលដែលគេទន្ទឹងរង់ចាំយ៉ាងខ្លាំង ហើយមនុស្សជាច្រើនចង់បានកន្លែងដ៏ល្អមួយ ដើម្បីឃើញគូស្នេហ៍រាជវង្សដែលនឹងត្រូវឆ្លងកាត់ក្នុងពេលដង្ហែ។

ដោយឡែក លោកស្រី Molly Bong នាយកផ្នែកប្រតិបត្តិការនៅសណ្ឋាគារមួយផ្សេងទៀតបាននិយាយថា ព្រះរាជពិធីសែរាជវង្សកំពុងទាក់ទាញភ្ញៀវមកពីគ្រប់ទិសទីនៃពិភពលោក។ នាងបានចែករំលែកថា ស្ថានទូតបានរៀបចំនៅសណ្ឋាគារដើម្បីរង់ចាំភ្ញៀវមកពីប្រទេសរបស់ពួកគេរៀងៗខ្លួន។

ជាការពិតណាស់ មនុស្សជាច្រើនកំពុងរង់ចាំដោយអន្ទះសារសម្រាប់ពិធីរៀបអភិសេកលើកដំបូងនៅឆ្នាំនេះ ដែលពាក់ព័ន្ធនឹងព្រះអង្គម្ចាស់ដ៏ល្បីល្បាញ Abdul Mateen Bolkiah និង Anisha។ មនុស្សជាច្រើនចាត់ទុកទ្រង់ជាគូស្នេហ៍រាជសីហ៍មានរូបសង្ហា និងមានសម្រស់ស្រស់ស្អាតដូចគ្នា ទើបធ្វើឲ្យមនុស្សចលាចលចង់ទស្សនាព្រះរាជពិធីដ៏ឧឡារិកមួយនេះ។

សូមរម្លឹកដែរថា ពិធិរៀបអភិសេករបស់ព្រះរាជបុត្រព្រុយណេ Abdul Mateen និងគូដណ្ដឹងទ្រង់ Anisha Isa Kalebic បានសាយភាយពាសពេញពិភពលោក ខណៈដែលពិធីបានផ្ដើមប្រព្រឹត្តទៅចាប់ពីថ្ងៃទី០៧ រហូតដល់ថ្ងៃ១៦ ខែមករាឆ្នាំ២០២៤។ ក្នុងនោះមនុស្សទូទាំងពិភពលោកក៏កំពុងតែរង់ចាំមើលថា តើសែរាជវង្សប្រទេសណាខ្លះ និងឥស្សរជនសាធារណៈសំខាន់ៗដទៃទៀត ព្រមទាំងអ្នកនយោបាយរូបណា នឹងបង្ហាញវត្តមានក្នុងព្រះរាជពិធីរបស់ស្ដេចព្រុយណេ៕