កម្របំផុត! ចិន-តៃវ៉ាន់ ចាប់ដៃគ្នាធ្វើបេសកកម្ម ជួយសង្គ្រោះកប៉ាល់នេសាទ

ជារឿងកម្របំផុត ដែលនៅថ្ងៃព្រហស្បតិ៍ទី១៤ខែមីនា កោះតៃវ៉ាន់និងប្រទេសចិន បានបញ្ជូនក្រុមក្នុងបេសកកម្មរួមគ្នា ទៅជួយសង្គ្រោះកប៉ាល់មួយគ្រឿង ដែលលិចជិតកោះ Kinmen ខណៈភាពតានតឹងនៅច្រកសមុទ្រតៃវ៉ាន់ ហាក់មិនបង្ហាញសញ្ញាធូរស្បើយឡើយ។ នេះបើតាមការចុះផ្សាយរបស់ Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍មួយ ឆ្មាំសមុទ្រតៃវ៉ាន់និយាយថា កម្លាំងមកពីភាគីទាំងពីរ បានបញ្ចេញទូកជួយសង្គ្រោះ បន្ទាប់ពីកប៉ាល់នេសាទចិនមួយគ្រឿង លិចនៅព្រឹកព្រលឹមថ្ងៃព្រហស្បតិ៍។ សេចក្តីរាយការណ៍ដដែលបន្តថា មនុស្ស​ពីរ​នាក់​ត្រូវ​ប្រទះ​ឃើញ​ស្លាប់ ហើយពីរ​នាក់​​សង្គ្រោះបាន ចំណែក​ពីរ​នាក់​ទៀត​កំពុង​បាត់​ខ្លួន នៅឡើយ។

យោងតាមមន្ត្រីជាន់ខ្ពស់តៃវ៉ាន់ដែលសុំមិនបញ្ចេញឈ្មោះ, ទីក្រុងតៃប៉ិ បានបញ្ជូនទូកឆ្មាំសមុទ្រ ដើម្បីទៅចូលរួមជួយសង្រ្គោះ បន្ទាប់ពីអាជ្ញាធរចិនសុំជំនួយពួកគេ។ កប៉ាល់នេសាទចិន បានលិចនៅចម្ងាយជិត២គីឡូម៉ែត្រ ក្នុងសមុទ្រភាគខាងលិចនៃកោះ Dongding របស់តៃវ៉ាន់ ហើយស្របពេលជាមួយគ្នានោះ កងកម្លាំងប្រដាប់អាវុធតៃវ៉ាន់ ដែលឈរជើងនៅលើកោះនោះ ក៏ចូលរួមក្នុងការជួយសង្រ្គោះដែរ។

ទោះបីជាយ៉ាងណាក៏ដោយ ភាគីតៃវ៉ាន់ មិនបានបញ្ជាក់អ្វីឲ្យលម្អិតជាងនេះទេ ដោយគ្រាន់តែអះអាងថា ខ្លួន​បាន​បញ្ជូន​ទូក​ឆ្មាំចំនួន៤​គ្រឿង ចំណែក​សមភាគី​ចិន​ បញ្ជូនទូក៦គ្រឿង​សម្រាប់​ជួយ​សង្គ្រោះ។

សូមបញ្ជាក់ ទីក្រុងប៉េកាំង ចាត់ទុកតៃវ៉ាន់ ជាផ្នែកនៃទឹកដីអធិបតេយ្យរបស់ចិន ហើយបានព្រមានជាច្រើនលើកច្រើនសាថា ការប៉ុនប៉ងប្រកាសខ្លួនជារដ្ឋឯករាជ្យ គឺស្មើនឹងការប្រកាសសង្គ្រាម។

ស្ថិតនៅចម្ងាយប្រហែល១៨០គីឡូម៉ែត្រពីចិនដីគោក កោះនេះធ្លាប់ត្រូវបានគេស្គាល់ឈ្មោះថា Formosa។ ចិន បានប្រគល់កោះនេះទៅឲ្យជប៉ុននៅឆ្នាំ១៨៩៥ ហើយយកមកវិញបន្ទាប់ពីការចាញ់សង្គ្រាមរបស់ទីក្រុងតូក្យូក្នុងឆ្នាំ១៩៤៥។ នៅពេលក្រុមអ្នកជាតិនិយមចិន ចាញ់សង្រ្គាមស៊ីវិលក្រោមដៃពួកកុម្មុយនិស្តរបស់លោកម៉ៅ ក្នុងឆ្នាំ១៩៤៩ ពួកគេបានជម្លៀសទៅកាន់កោះនេះដោយមានជំនួយពីសហរដ្ឋអាមេរិក និងបានប្រកាសទីក្រុងតៃប៉ិ ជារដ្ឋធានីនៃសាធារណរដ្ឋចិន។

លុះមកដល់ឆ្នាំ១៩៧១ អង្គការសហប្រជាជាតិ បានទទួលស្គាល់រដ្ឋាភិបាលនៅទីក្រុងប៉េកាំងថាជារដ្ឋាភិបាលស្របច្បាប់របស់ចិន ដែលនាំឲ្យប្រទេសជាច្រើន មិនទទួលស្គាល់តៃវ៉ាន់។ មកដល់ឆ្នាំ១៩៧២ សហរដ្ឋអាមេរិក ក៏ទទួលយកជំហររបស់ទីក្រុងប៉េកាំង ដែលថាមានប្រទេសចិនតែមួយគត់ ហើយតៃវ៉ាន់គឺជាផ្នែកនៃប្រទេសចិន៕

អត្ថបទ៖ សុខ សុវណ្ណ

ចុចអាន៖ លោក ស៊ី ព្រមានប្រើគ្រប់មធ្យោបាយ ដើម្បីទប់ស្កាត់ការបំបែកខ្លួន តៃវ៉ាន់