មីយ៉ាន់ម៉ា សុំ ថៃ បើកផ្លូវឲ្យយន្តហោះយោធាចូលយកទាហានជាង ៤៧០ នាក់ដែលបាក់ទ័ពចាញ់ក្រុមប្រឆាំង

រដ្ឋាភិបាលយោធាមីយ៉ាន់ម៉ាបានស្នើសុំដល់ភាគីថៃអនុញ្ញាតឲ្យយន្តហោះយោធារបស់ខ្លួនចុះចតនៅអាកាសយានដ្ឋានក្នុងខេត្ត Tak ដើម្បីចូលយកមន្ត្រីយោធាជាន់ខ្ពស់ បន្ទាប់រត់គេចខ្លួនចេញពីខេត្ត Myawaddy ដែលត្រូវបានវាយដណ្ដើមកាន់កាប់ដោយក្រុមប្រឆាំងកាលពីយប់ថ្ងៃអាទិត្យកន្លងទៅ ។ នេះបើយោងតាមការចេញផ្សាយដោយសារព័ត៌មាន Thai PBS នៅថ្ងៃទី៨ ខែមេសានេះ ។

ការ​ស្នើសុំដើម្បី​ចុះ​ចតយន្តហោះ​រហូតដល់​ថ្ងៃ​ទី៩ ខែ​មេសា ត្រូវ​បាន​ធ្វើ​ឡើង​តាម​រយៈ​ក្រសួង​ការ​បរទេស​ថៃ ខណៈសំណើនេះកើតមានឡើង បន្ទាប់ពីសម្ព័ន្ធក្រុមប្រដាប់អាវុធជនជាតិភាគតិចវាយដណ្ដើមបានបន្ទាយទ័ពចំនួន ៧ និងទីបញ្ជាការរដ្ឋាភិបាលយោធាមួយកន្លែងក្នុងខេត្ត Myawaddy ដែលមានព្រំប្រទល់ជាប់ស្រុក Mae Sot នៃប្រទេសថៃ ក្រោយការបាញ់បោះដាក់គ្នាយ៉ាងខ្លាំងក្លាអស់រយៈពេល ៤ ថ្ងៃ ។

ប្រសិនបើសំណើនេះត្រូវបានរដ្ឋាភិបាលថៃអនុញ្ញាតនោះ ជនជាតិមីយ៉ាន់ម៉ាចំនួន ៦១៧ នាក់ រួមទាំងមន្ត្រីយោធាចំនួន ៦៧ នាក់ មន្ត្រីមិនជាប់កិច្ចសន្យាចំនួន ៤១០ នាក់ និងសមាជិកគ្រួសារចំនួន ៨១ នាក់ នឹងឡើងជិះយន្តហោះត្រឡប់ទៅរដ្ឋធានីមីយ៉ាន់ម៉ាវិញ ស្របពេលដែលក្រុម​នេះ​កំពុង​នៅ​ស្ពាន​មិត្ត​ភាព ​ថៃ​-​មី​យ៉ាន់​ម៉ា រង់ចាំការ​អនុញ្ញាត​ចូលខេត្ត Tak ។

យោងតាមការចេញផ្សាយដោយកាសែត Bangkok Post បានឲ្យដឹងដែរ កាលពីរាត្រីថ្ងៃទី៧ ខែមេសាកន្លងទៅ ក៏មានយន្តហោះរបស់ក្រុមហ៊ុនអាកាសចរណ៍ពាណិជ្ជកម្មមីយ៉ាន់ម៉ាបានចុះចតនៅអាកាសយានដ្ឋាន Tak ផងដែរ ហើយក្រោយមកបានហោះចាកចេញទៅវិញ ប៉ុន្តែនៅពេលនោះ គេមិនឃើញមានជនជាតិមីយ៉ាន់ម៉ានៅឯអាកាសយានដ្ឋាននោះទេ ។

ពាក់ព័ន្ធនឹងបញ្ហានេះដែរ អភិបាលខេត្ត Tak លោក Somchai Kitcharoenrungroj បានចេញបញ្ជាឲ្យអាជ្ញាធរប្រុងជើងការ ក៏ដូចជាតាមដានស្ថានការណ៍នៅតាមព្រំដែនយ៉ាងដិតដល់ផងដែរ ក្នុងករណីដែលជនជាតិមីយ៉ាន់ម៉ាប៉ុនប៉ងរត់ភៀសខ្លួនចេញពីជម្លោះផ្ទៃក្នុងចូលមកកាន់ខេត្ត Tak ។

ក្នុងរយៈពេលប៉ុន្មានខែចុងក្រោយនេះ កងកម្លាំងរបស់រដ្ឋាភិបាលយោធាមីយ៉ាន់ម៉ាកាន់តែបាក់ទ័ព ដោយសារតែកងទ័ពអារ៉ាកាន់ (AA) ព្រួតដៃជាមួយកងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា (MNDAA) និងកងទ័ពរំដោះជាតិ Ta’ang (TNLA) ហើយចាប់តាំងពីផ្ទុះប្រតិបត្តិការ Operation 1027 ថ្ងៃទី២៧ ខែតុលាឆ្នាំមុនមក ក្រុមទ័ពព្រៃទាំងបីនេះវាយដណ្តើមយកបន្ទាយទ័ពជាង ៥០០ កន្លែង និងទីក្រុងចំនួន ២០ ពីកងទ័ពរដ្ឋាភិបាលយោធាមីយ៉ាន់ម៉ា ក្រោយពេលដែលការប្រយុទ្ធគ្នាបានរាលដាលដល់ភាគខាងកើត និងភាគខាងលិចរដ្ឋ Shan ។

គួរបញ្ជាក់ថា យោងតាមរបាយការណ៍ពី UN មនុស្សជាង ១,៥០០ នាក់ស្លាប់បាត់បង់ជីវិត ចាប់តាំងពីរដ្ឋប្រហារយោធា និងការបង្ក្រាបដោយហិង្សាលើអ្នកគាំទ្រលទ្ធិប្រជាធិបតេយ្យក្នុងរយៈពេល ៣ ឆ្នាំមកនេះ ។ ក្នុងនោះពលរដ្ឋជាង ២.៣ លាននាក់ត្រូវបង្ខំចិត្តចាកចេញពីផ្ទះសម្បែង ខណៈជិត ២៦,000 នាក់ត្រូវចាប់ឃុំខ្លួនដោយហេតុផលនយោបាយ និងជិត ២០,០០០ នាក់រងការធ្វើទារុណកម្ម និងការរំលោភបំពាននៅក្នុងមន្ទីរឃុំឃាំង ៕

ដោយ ៖ សុខ ជីវ័ន្ត

ចុចអាន ៖ UN តែងតាំងអតីតរដ្ឋមន្ត្រីការបរទេស អូស្ត្រាលី ជាបេសកជនពិសេសទទួល បន្ទុកនៅ មីយ៉ាន់ម៉ា