ព័ត៌មានអន្ដរជាតិ

រុស្ស៊ី ថា ដណ្ដើមយកបានភូមិចំនួន២ របស់អ៊ុយក្រែន

បានផុស

២ years មុន

នៅ

ថ្ងៃចន្ទ ១ កក្កដា ២០២៤

ដោយ

Chheang

កងកម្លាំងរុស្ស៊ី បានវាយដណ្ដើមកាន់កាប់បានភូមិចំនួន២ គឺភូមិ Spirne និងភូមិ Novooleksandrivka ក្នុងតំបន់ Donetsk ដែលស្ថិតនៅភាគខាងកើតប្រទេសអ៊ុយក្រែន។ នេះបើយោងតាមការប្រកាសរបស់ក្រសួងការពារជាតិរុស្ស៊ី នៅក្នុងសេចក្ដីថ្លែងការណ៍សង្ខេបមួយ កាលពីថ្ងៃទី៣០ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ី ថា ក្រោយវាយដណ្ដើមបាន កងកម្លាំងក្រុងមូស្គូបានដាក់ពង្រាយទ័ពនៅតាមជួរមុខនៃភូមិ Spirne និងភូមិ Novooleksandrivka ដើម្បីពង្រឹងតំណែងរបស់ខ្លួនសម្រាប់ទីតាំងឈរជើងថ្មីទាំងនេះ។ ចម្ងាយពីភូមិ Spirne ទៅកាន់ភូមិ Novooleksandrivka មានប្រវែងប្រមាណ ១៣០គីឡូម៉ែត្រ។

ពាក់ព័ន្ធនឹងការអះអាងនេះ ខាងភាគីអ៊ុយក្រែនមិនទាន់មានការបញ្ជាក់ពីការបាត់បង់អ្វីនោះទេ ប៉ុន្តែបើតាមរបាយការណ៍សមរភូមិប្រចាំថ្ងៃរបស់អ៊ុយក្រែន កាលពីពេលថ្មីៗកន្លងទៅ បានឲ្យដឹងថា រុស្ស៊ីបានបើកការវាយប្រហារទ្រង់ទ្រាយធំនៅជុំវិញភូមិទាំង២នោះ។

តំបន់ Donetsk គឺជាតំបន់មួយ ក្នុងចំណោមតំបន់ចំនួន៤ ស្ថិតនៅភាគខាងកើត និងខាងត្បូងប្រទេសអ៊ុយក្រែន ដែលរដ្ឋាភិបាលរុស្ស៊ីអះអាងថាជាតំបន់ដែលត្រូវកាត់ចូលឧបសម្ព័ន្ធរបស់ក្រុងមូស្គូ កាលពីចុងឆ្នាំ២០២២។ តំបន់ទាំង៤ ដែលរុស្ស៊ីដណ្ដើមបាន តែមិនទាន់អាចកាន់កាប់បានទាំងស្រុង មានដូចជា តំបន់ Donetsk, តំបន់ Kherson, តំបន់ Luhansk និងតំបន់ Zaporizhzhia។ ការដណ្ដើម និងកាន់កាប់តំបន់ទាំងនេះរបស់រុស្ស៊ី ត្រូវបានបណ្ដាប្រទេសភាគច្រើននៅក្នុងមហាសន្និបាតអង្គការសហប្រជាជាតិ ធ្វើការថ្កោលទោស និងចាត់ទុកថាជាទង្វើខុសច្បាប់៕

ដោយ៖ ឈាង