កូរ៉េ​ខាង​ជើង ចោទ​ប្រធានាធិបតី​កូរ៉េ​ខាង​ត្បូង​ថា​បង្ក​ហានិភ័យ​នៃ​សង្គ្រាម​នុយក្លេអ៊ែរ

ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានចុះ​ផ្សាយ​​នៅ​ថ្ងៃ​​ទី​៣​ខែ​​វិច្ឆិកា​នេះ​​ដោយចោទប្រកាន់ប្រធានាធិបតីកូរ៉េខាងត្បូង លោក Yoon Suk Yeol ពីការ​ទាញ​​ឲ្យ​ប្រទេសរបស់​លោក​ចូល​ទៅ​ក្នុង​គ្រោះថ្នាក់នៃសង្គ្រាមនុយក្លេអ៊ែរ តាមរយៈគោលនយោបាយ ចំពោះកូរ៉េខាងជើង។

KCNA បានរិះគន់​​ថា លោក Yoon មិន​បាន​កត់​សម្គាល់​ដោយ​ប្រុង​ប្រយ័ត្ន​អំពី​ការ​បង្ក​សង្គ្រាម បោះបង់​​គោលការណ៍​គ្រឹះ​នៃកិច្ចព្រមព្រៀងអន្តរកូរ៉េ ចូលរួមក្នុងការធ្វើផែនការសង្គ្រាមនុយក្លេអ៊ែរជាមួយសហរដ្ឋអាមេរិក និងស្វែងរកទំនាក់ទំនងកាន់តែជិតស្និទ្ធជាមួយជប៉ុន និង​អង្គការ​ណាតូ។

KCNA បាន​បន្ត​ថា៖ «វិធានការ​យោធាដែលកាន់តែយ៉ាប់យ៉ឺនមិនធ្លាប់មាន បាន​បង្ក​លទ្ធផលត្រឹម​ជាផលវិបាកនៃការជំរុញ [កូរ៉េខាងជើង] ឲ្យ​ស្តុកទុកអាវុធនុយក្លេអ៊ែររបស់ខ្លួនក្នុងអត្រាកាន់​តែ​ច្រើន​ឡើងៗ និងអភិវឌ្ឍសមត្ថភាពវាយប្រហារនុយក្លេអ៊ែរបន្ថែមទៀត»។

រដ្ឋបាលរបស់លោក Yoon បានស្តីបន្ទោសកូរ៉េខាងជើងចំពោះការបង្កើនភាពតានតឹងជាមួយនឹងការសាកល្បងអាវុធ និងការផ្តល់ជំនួយយោធា និងកងទ័ពដើម្បីជួយដល់សង្គ្រាមរបស់រុស្ស៊ីនៅអ៊ុយក្រែន។

ចំណែក​ឯ​​​ក្រុងព្យុងយ៉ាងបាននិ​ង​កំពុងចាត់វិធានការដើម្បីបំបែកទំនាក់ទំនងអន្តរកូរ៉េ ដោយកំណត់ឡើងវិញ​ថា​​ប្រទេស​កូរ៉េ​ខាង​ត្បូង​ជារដ្ឋខ្មាំងសត្រូវ។ កាល​ពី​ពេល​ថ្មីៗ​កន្លង​​ទៅ មេ​ដឹក​នាំ​កូរ៉េ​ខាង​ជើង លោក គីម ជុងអ៊ុន បានប្រកាសថា ក្រុង​សេអ៊ូល​ គឺ​ជា «សត្រូវចម្បង» ហើយបាននិយាយថា ការបង្រួបបង្រួមមិនអាចមានទៀតទេ។

កូរ៉េទាំងពីរនៅតែស្ថិតក្នុងសង្គ្រាម​បើ​និយាយ​តាមបច្ចេកទេស ទោះ​សង្រ្គាមឆ្នាំ​១៩៥០-១៩៥៣​ របស់ពួកគេបានបញ្ចប់ក្នុងបទឈប់បាញ់​ក៏​ដោយ ព្រោះ​វា​មិនមែនជាសន្ធិសញ្ញាសន្តិភាព​នោះ​ទេ៕

ដោយ៖ ឈាង