ព័ត៌មានអន្ដរជាតិ

មេបញ្ជាការជាន់ខ្ពស់កូរ៉េខាងជើងម្នាក់ រងរបួសក្នុងសង្គ្រាមអ៊ុយក្រែន-រុស្ស៊ី

បានផុស

៨ ខែ មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

Chheang

មេបញ្ជាការជាន់ខ្ពស់របស់កូរ៉េខាងជើងម្នាក់ បានរងរបួសនៅក្នុងការវាយប្រហាររបស់អ៊ុយក្រែននៅក្នុងតំបន់ Kursk របស់រុស្ស៊ី។ នេះបើយោងតាមរបាយការណ៍ចេញផ្សាយដោយកាសែត Wall Street Journal កាលពីថ្ងៃទី២១ខែវិច្ឆិកាឆ្នាំ២០២៤។

ទាហានកូរ៉េខាងជើង/ រូបតំណាង (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ បានបង្ហាញ វាជាលើកដំបូងហើយដែលមន្ត្រីលោកខាងលិច បានអះអាងថា មន្ត្រីជាន់ខ្ពស់នៃយោធាក្រុងព្យុងយ៉ាង បានក្លាយជាជនរងគ្រោះនៅក្នុងសង្គ្រាមរវាងអ៊ុយក្រែន-រុស្ស៊ី ចាប់តាំងពីលេចឮនូវដំណឹងពីការបញ្ជូនទ័ពកូរ៉េខាងជើងច្រើនជាង ១ម៉ឺននាក់ទៅជួយរុស្ស៊ីកាលពីខែមុន។

យ៉ាងណាមិញ កាសែត Wall Street Journal ពុំបានរាយការណ៍ពីឈ្មោះមន្ត្រីជាន់ខ្ពស់កូរ៉េខាងជើងរូបនោះ ឬការរងរបួសធ្ងន់ធ្ងរយ៉ាងណានោះឡើយ។

សូមបញ្ជាក់ថា លោក Volodymyr Zelensky ប្រធានាធិបតីអ៊ុយក្រែន ធ្លាប់បាននិយាយកាលពីដើមខែវិច្ឆិកានេះថា មានទាហានកូរ៉េខាងជើងមួយចំនួនបានស្លាប់និងរងរបួសរួចមកហើយក្នុងការច្បាំងគ្នានៅតំបន់ Kursk៕

ដោយ៖ ឈាង