​ក្រសួងការបរទេសរុស្ស៊ី ចោទ​ អ៊ុយក្រែន​ជួញដូរ​សរីរាង្គ​គ្រឿងក្នុង​មនុស្ស​​​​​

ខណៈពេលដែល​សង្គ្រាម​កំពុង​បន្ត​ដ៏ខ្លាំងក្លា​និង​បណ្តាលឲ្យ​យុទ្ធជន​​រាប់សែន​នាក់​បាន​បាត់​បង់​ជីវិត ​ក្រសួងការ​បរទេស​បាន​ចោទ​​ប្រកាន់​​​អ៊ុយក្រែន​ថា បាន​និង​កំពុង​ជូន​ដូរ​សរីរាង្គ​​ (​organ) ​​របស់​​​​ទាហាន​ដែលបានពាលីជីវិត​ក្នុងសមរភូមិ។​

​យោង​តាម​ទីភ្នាក់​ងារ​ព័ត៌មាន​រុស្ស៊ី TASS ​​ដោយ​ដកស្រង់​បន្តពី​​ទូរទស្សន៍ REN TV ផ្សាយនៅថ្ងៃទី​២៤ខែ​​មករានេះ អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយនៅក្នុងបទអត្ថាធិប្បាយមួយ​ថា ទីក្រុង​កៀវ(Kiev)បានចាប់ផ្តើមគម្រោងការជួញដូរសរីរាង្គ ក្នុងប្រទេសអ៊ុយក្រែន គឺ​ជា​សរីរាង្គរបស់មនុស្សដែលយកចេញពីសមរភូមិត្រូវបានលក់តាមអ៊ីនធឺណិត។

​​លោកស្រី​អ្នក​នាំពាក្យ បាន​អះអាងថា ការ​​ធ្វើបែបនេះ​ទៅ​បាន​របស់​ភាគី​អ៊ុយក្រែន គឺ​​ដោយសារ​មានការជួយជ្រោមជ្រែងពីពួក​​បស្ចឹមប្រទេស​។​

អ្នកការទូតបាននិយាយថា​៖«​នៅក្នុងប្រទេសអ៊ុយក្រែន ជាពិសេសនៅកន្លែងដែលការប្រយុទ្ធ​កំពុងកើតឡើង និងកន្លែងដែលទាហាននៃកងកម្លាំងប្រដាប់អាវុធអ៊ុយក្រែន កងវរសេនាតូចជាតិ​តាំង​នៅ​ទីនោះ​​ សាកសព និងអដ្ឋិធាតុរបស់មនុស្សត្រូវបានរកឃើញដោយមានសញ្ញាច្បាស់លាស់ថាសរីរាង្គរបស់ពួកគេត្រូវបានដកចេញ»។

លោកស្រី Zakharova ​បាន​អះអាង​​ផងដែរ​ថា មន្ទីរពិសោធន៍​​​​ជីវៈ (Biolabs) ​​របស់​ក្រសួង​ការពារជាតិ​​សហរដ្ឋអាមេរិក​ (​មន្ទីរបញ្ចកោណ) ត្រូវបានពង្រី​​ក​សកម្មភាព​ ក្រោមការ​គាំទ្រ​​​​របស់ក្រសួងសុខាភិបាលអ៊ុយក្រែន។

តាមការ​ចុះ​ផ្សាយ​នោះ លោកស្រី​អ្នកនាំពាក្យ បាននិយាយថា៖​«​ជា​បន្តបន្ទាប់ អ៊ុយក្រែនប្រែទៅជាមូលដ្ឋាន​សាកល្បង​​សម្រាប់ការពិសោធន៍គុណភាពណាមួយជាមួយ​​​​​​មន្ទីរ​ពិសោធន៍សរីរៈ​​ ជាក់ស្តែងជាមួយនឹងការជួញដូរសរីរាង្គ»​។

​ទោះបីជា​បែបណាក្តី​ តាមរយៈ​ការស្រាវជ្រាវ​​​​ ពុំមានឃើញ​​ព័ត៌មាន​​អំពី​ការ​បដិសេធ​របស់ភាគី​អ៊ុយក្រែន​ និង​មិ​នមាន​ឃើញ​​នូវការ​ចុះ​ផ្សាយ​​ទូលំទូលាយ​​អំពីរឿងនេះ​ដែរ​។

Zakharova បានចង្អុលបង្ហាញពីការពិតដែលថា «អ្នកចូលរួមនៅក្នុងគ្រោងការណ៍ដ៏គួរឱ្យភ័យខ្លាចទាំងនេះបានជួញដូរសរីរាង្គតាមរយៈអ៊ីនធឺណិត ហើយវាថែមទាំងអាចបញ្ជាទិញអ្វីដែលចាំបាច់»។

អ្នកតំណាងផ្លូវការនៃក្រសួងការបរទេសក៏បានទាក់ទាញការយកចិត្តទុកដាក់ចំពោះការពិតដែលថា៖«របបរបស់ Zelensky បានអនុម័តជាបន្ទាន់នូវសកម្មភាពនីតិប្បញ្ញត្តិមួយចំនួនសម្រាប់នីតិវិធីសាមញ្ញដែលកាត់បន្ថយការប្រើប្រាស់នីតិវិធីត្រួតពិនិត្យនិងបញ្ជាក់ណាមួយសម្រាប់ប្រតិបត្តិការបែបនេះ។

លោកស្រី​​អ្នក​នាំពាក្យ​ធ្លាប់​ចេញ​​ផ្សាយអត្ថបទ​​​ចោទប្រកាន់​បែប​​នេះ​ក្នុង​ខែមិថុនាឆ្នាំ២០២៣​ ដោយបាន​ចោទ​ថា ​តំណាងក្រសួងសុខាភិបាល​ នៃប្រទេសមួយក្នុងចំណោមប្រទេសណាតូបានឈានដល់កិច្ចព្រមព្រៀង​ជាមួយភាគីអ៊ុយក្រែនដើម្បីផ្គត់ផ្គង់​​​​​ទូរក្លាសេ​​ជាមួយសរីរាង្គមនុស្ស និងផ្នែករាងកាយដែល​ត្រូវបានគេប្រើញឹកញាប់បំផុតក្នុងការប្តូរសរីរាង្គ រួមមាន កែវភ្នែក ឆ្អឹងជាក់លាក់ ជាលិកាភ្ជាប់ បេះដូង និងថ្លើម។

​អត្ថបទ voxukraine.org ដែល​ចុះ​ផ្សាយ​កាល​ពី​​សីហា​ឆ្នាំ​២០២៣​ ដោយ​អះអាង​ថា​ខ្លួនបាន​ប្រើ​ប្រើ​វិធី​ Fact-checking ឃើញថា ការ​​ចោទ​ប្រកាន់​របស់​​​​លោកស្រី​ Zakharova ជារឿង​មិនពិត​ទេ។

ប្រធានាធិបតី​សហរដ្ឋអាមេរិក លោក ដូណាល់ ត្រាំ កាល​ថ្ងៃ​​ទី​២១​ខែ​​មករានេះ បានទម្លាយ​ឲ្យដឹងថា ក្នុងសង្គ្រាមជិត​៣ឆ្នាំនេះ យោធា​​អ៊ុយក្រែន​ជាង​៧០ម៉ឹននាក់​បានស្លាប់ ខណៈយោធា​រុស្ស៊ី​​​ជាង​១លាន​នាក់​បាន​បាត់​បង់​ជីវិត​៕​

ដោយ រ៉ាន់ រើយ​