ហ្សេលេនស្គី៖ អ៊ុយក្រែនសង្ឃឹម​រស់​តិច បើ​គ្មាន​ការ​គាំទ្រ​ពី​អាមេរិក

ប្រធានាធិបតីអ៊ុយក្រែន លោក វ៉្លាឌីមៀ ហ្សេលេនស្គី បានឲ្យដឹងថា អ៊ុយក្រែនអាចមានអនាគតមិនច្បាស់លាស់​សង្ឃឹម​រស់​តិច​ណាស់ បើមិនមានការគាំទ្រ​បន្តពីសហរដ្ឋអាមេរិក ក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។

ក្នុងសម្ភាសន៍ជាមួយកម្មវិធី Meet the Press របស់ NBC ​កាល​ពី​ថ្ងៃ​ទី​១៤​កុម្ភៈ លោក ហ្សេលេនស្គី បាន​និយាយ​ថា «ស្ថានការណ៍កំពុងពិបាកខ្លាំងណាស់» ហើយការគាំទ្រដោយផ្នែកយោធា និងហិរញ្ញវត្ថុពី​​អាមេរិក គឺជាកត្តាសំខាន់សម្រាប់ការរស់រានមានជីវិតរបស់អ៊ុយក្រែន។

នៅកិច្ចប្រជុំទីក្រុង Munich អនុប្រធានាធិបតីអាមេរិក លោក JD Vance បានជួបពិភាក្សាជាមួយលោក ហ្សេលេនស្គី អំពីដំណោះស្រាយការទូតសម្រាប់សង្គ្រាម។ លោក ហ្សេលេនស្គី បានលើក​ឡើង​ថា អ៊ុយក្រែនត្រូវតែទទួលបាន«ការធានាសន្តិសុខ» មុនពេលចូលរួមក្នុងការចរចាជាមួយរុស្ស៊ី ដើម្បីចៀសវាងការឈ្លានពានបន្ថែម​ទៀត។

រដ្ឋបាលថ្មីរបស់​​​លោក ដូណាល់ ត្រាំ អាចនឹងដាក់លក្ខខណ្ឌលើជំនួយយោធាបន្ថែម ដោយផ្អែកលើផលប្រយោជន៍សេដ្ឋកិច្ច សម្រាប់សហរដ្ឋអាមេរិក។ ជា​ឧទាហរណ៍ លោក ត្រាំ អាចនឹងទាមទារ​ឲ្យ​អ៊ុយក្រែនផ្តល់សិទ្ធិប្រើប្រាស់ធនធានរ៉ែដ៏មានតម្លៃ។

សូម​បញ្ជាក់​ថា ចាប់តាំង​ពី​ឆ្នាំ​២០២២​មក ​អាមេរិកបាន​សន្យា​ផ្ដល់​ជំនួយយោធាចំនួនប្រមាណ ៤៥​ពាន់លានដុល្លារ ដោយរួមបញ្ចូលនូវប្រព័ន្ធអាវុធ ការបណ្តុះបណ្តាល និងការគាំទ្រព័ត៌មានសម្ងាត់។ ទោះយ៉ាងណា តាមសេចក្តីថ្លែងការណ៍ថ្មីៗពីលោក ត្រាំ និងមន្រ្តី​អាមេរិក ការបន្តផ្តល់ជំនួយអាចមិនត្រូវបានធានា​ទៀត​ទេ ដែលអាចធ្វើឲ្យស្ថានភាពសង្គ្រាមនៅអ៊ុយក្រែនកាន់តែអាសន្ន៕

ដោយ៖ ឈាង