ព័ត៌មានអន្ដរជាតិ

នៅជប៉ុន សេវាកម្មបុណ្យសពចល័តតាមរថយន្តក្រុង ផ្ទុះការចាប់អារម្មណ៍ខ្លាំង

បានផុស

២៣ វិនាទី មុន

នៅ

ថ្ងៃអង្គារ ២២ មេសា ២០២៥

ដោយ

នៅក្នុងប្រទេសជប៉ុន ឡានក្រុងទេសចរណ៍មួយចំនួនត្រូវបានគេប្រើប្រាស់ឡើងវិញដោយផ្តល់សេវាបុណ្យសព ក្រោមស្លាកថា «មេត្តាករុណា» ដែលអាចឲ្យក្រុមគ្រួសារបានទៅលេងកន្លែងដ៏មានអត្ថន័យ ជាមួយមនុស្សជាទីស្រលាញ់ដែលបានទទួលមរណភាព។

លោក Takao Muramoto ស្ថាបនិកឡានក្រុងសម្រាប់ដឹកសពធ្វើដំណើរ និងជានាយកប្រតិបត្តិនៃក្រុមហ៊ុន Memoir Holdings

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាធម្មតា ប្រពៃណីក្នុងប្រទេសជប៉ុន នៅក្នុងពិធីបុណ្យសព អ្នកស្លាប់ត្រូវបានដឹកតាមឡានមួយប្រភេទឈ្មោះថា Hearse ទៅកាន់បូជនីយដ្ឋាន គឺ«កន្លែងបូជាសព ឬទីបញ្ចុះសព» ដោយមានអ្នកកាន់ទុក្ខតាមដង្ហែ។ ទោះជាយ៉ាងណា នៅកោះហុកកៃដូប្រទេសជប៉ុន រថយន្តក្រុងដឹកមឈូស ទទួលបានប្រជាប្រិយភាពក្លាយជាជម្រើសពិធីបុណ្យតែមួយគត់សម្រាប់គ្រួសារសព។

Hokuto Funeral Home in Sapporo ជាក្រុមហ៊ុនផ្តល់សេវាកម្មជួលឡានក្រុង ដោយការដាក់តម្លៃតាមចម្ងាយនៃការធ្វើដំណើរ។ សម្រាប់ការធ្វើដំណើរក្នុងចម្ងាយ ១០គីឡូម៉ែត្រ តម្លៃគឺ ១៧,៧៨០ យ៉េន (១២៥ ដុល្លារអាមេរិក) ជាមួយនឹងតម្លៃប្រែប្រួលខុសៗគ្នា អាស្រ័យលើរដូវរដូវរងា និងរដូវក្តៅ។ ការកក់ទុកអាចធ្វើឡើងតាមរយៈទូរស័ព្ទ ឬតាមរយៈគេហទំព័រ ហើយសេវាកម្មនេះមានលក់ផ្តាច់មុខនៅក្នុងកោះហុកកៃដូប៉ុណ្ណោះ។

ទោះបីយ៉ាងណា បើតាមក្រុមហ៊ុន រថយន្តក្រុងមាន៧ប្រភេទ អាចផ្ទុកមនុស្សបាន៤០នាក់ និងមឈូសមួយ។ នៅក្នុងឡានក្រុងដែលមាន ១៥កៅអី សាច់ញាតិអាចអង្គុយក្បែរមឈូស ខណៈដែលទីតាំងធំមួយមានបន្ទប់ពិសេសសម្រាប់ដាក់មឈូស។ នៅថ្ងៃបុណ្យសព ក្រុមគ្រួសារ និងមិត្តភ័ក្តិអាចឡើងឡាន ដើម្បីទៅមើលទីតាំងដែលរក្សាទុកនូវអនុស្សាវរីយ៍ដ៏ស្និទ្ធស្នាលជាមួយអ្នកស្លាប់។

ដោយឡែក លោក Takao Muramoto ស្ថាបនិកឡានក្រុងសម្រាប់ដឹកសពធ្វើដំណើរ និងជានាយកប្រតិបត្តិនៃក្រុមហ៊ុន Memoir Holdings បានសង្កត់ធ្ងន់ដែរថា ការរៀបចំពិធីបុណ្យសព ជារឿយៗអាចមានច្រើនលើសលប់ ដែលធ្វើឲ្យក្រុមគ្រួសារមានឱកាសតិចតួច ក្នុងការនិយាយលាគ្នាឲ្យបានត្រឹមត្រូវ។

លោក Muramoto បន្ថែមថា «មនុស្សជាច្រើនដែលបានទទួលមរណភាពបានធ្លាក់ខ្លួនឈឺ និងដេកលើគ្រែក្នុងរយៈពេលយូរ ហើយខ្ញុំជឿថា ពួកគេក៏ប្រាថ្នាចង់ជួបនូវភាពរីករាយដ៏សាមញ្ញនៃជីវិត ដូចជាការឃើញផ្កាសាគូរ៉ាជាដើម»។

ក្រុមហ៊ុន Memoir Holdings បាននិយាយបន្ថែមទៀតថា វាអាចធ្វើទៅបានសម្រាប់ក្រុមគ្រួសារដើម្បីគោរពតាមបំណងប្រាថ្នាទាំងនេះ ដោយផ្តល់ជូននូវបទពិសោធន៍ពិធីបុណ្យសពការធ្វើដំណើរេពេញមួយថ្ងៃ។ ជាងនេះទៅទៀត សេវាកម្មនេះបានផ្ដល់ជូននូវតម្លៃ ៥២៨,០០០ យ៉េន (៣៧០០ ដុល្លារអាមេរិក) រួមមានឡានក្រុង សេវាបុណ្យសព និងបូកបញ្ចូលកញ្ចប់អាហារ។ សម្រាប់ថ្លៃបន្ថែមទៀត គ្រួសារអាចកក់ឡានក្រុងសម្រាប់គេងរួមគ្នា ជាមួយសពបានដូចគ្នា។ ការធ្វើដំណើររួមមានទីតាំងសំខាន់ៗ ដូចជាស្រុកកំណើត កន្លែងធ្វើការ សាលារៀន ឬកន្លែងដែលពួកគេប្រាថ្នាចង់ទៅលេងជាមួយអ្នកស្លាប់។

យ៉ាងណាមិញ ពិធីបុណ្យសពធ្វើដំណើររបស់កោះហុកកៃដូ បានទាក់ទាញការចាប់អារម្មណ៍យ៉ាងខ្លាំងនៅលើប្រព័ន្ធផ្សព្វផ្សាយសង្គម ជាពិសេសប្រទេសជប៉ុន។ អ្នកប្រើបណ្ដាញសង្គមម្នាក់បានកត់សម្គាល់ថា ដំណើរលាគ្នានេះជាមួយអ្នកស្លាប់ ក៏អាចបម្រើជាបទពិសោធន៍ព្យាបាលអ្នកដែលនៅរស់រានមានជីវិត។ តាមអ្វីដែលពួកគេបានឮ ពិធីបុណ្យសពធ្វើដំណើរ គឺជាអ្វីដែលអ្នកអាចរកបានតែនៅក្នុងកោះហុកកៃដូ។ ពួកគេក៏សង្ឃឹមថា នឹងឃើញសេវាពិធីបុណ្យសពប្រកបដោយភាពមេត្តាបែបនេះ នៅកន្លែងផ្សេងទៀត៕