ព័ត៌មានអន្ដរជាតិ

តុលាការចិនកាត់ទោសប្រហារជីវិតបុរសដែលចាក់សម្លាប់សិស្សសាលាជប៉ុនកាលពីឆ្នាំមុន

បានផុស

៣ ខែ មុន

នៅ

ថ្ងៃអង្គារ ២២ មេសា ២០២៥

ដោយ

តុលាការចិនបានកាត់ទោសប្រហារជីវិតបុរសម្នាក់ដែលបានចាក់សម្លាប់ក្មេងប្រុសម្នាក់ ខណៈដែលក្មេងប្រុសកំពុងធ្វើដំណើរទៅសាលាជប៉ុននៅទីក្រុង Shenzhen ភាគខាងត្បូងប្រទេសចិនកាលពីខែកញ្ញាឆ្នាំមុន។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី២២ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមស្ថានទូតជប៉ុនប្រចាំទីក្រុងប៉េកាំង ស្ថានទូតជប៉ុនត្រូវបានជូនដំណឹងអំពីការកាត់ទោសប្រហារជីវិតនេះដោយក្រសួងការបរទេសរបស់ប្រទេសចិនកាលពីថ្ងៃចន្ទ។

តាមការេជូនដំណឹងនេះ លោក Zhong Changchun អាយុ៤០នាក់ ត្រូវបានកាត់ទោសប្រហារជីវិតកាលពីខែមករា ពីបទសម្លាប់ក្មេងប្រុស ដែលជាកូនប្រុសរបស់ឪពុកជនជាតិជប៉ុន និងម្តាយជាជនជាតិចិន នៅជិតសាលាជប៉ុនមួយក្នុងទីក្រុងភាគខាងត្បូង។ លោក មិនបានប្តឹងឧទ្ធរណ៍ចំពោះការកាត់ទោសនេះទេ។

គួររម្លឹកថា បុរសនេះមកពីខេត្ត Jiangxi បានទិញកាំបិតតាមប្រព័ន្ធអ៊ីនធឺណិតមុនធ្វើការចាក់សម្លាប់នេះនៅទីក្រុង Shenzhen ខេត្ត Guangdong បណ្ដាលឲ្យក្មេងប្រុសអាយុ១០ឆ្នាំបានស្លាប់នៅថ្ងៃបន្ទាប់ពីរងរបួស។

ការចាក់សម្លាប់នេះក៏បានកើតឡើងក្នុងខួបលើកទី៩៣ នៃការទម្លាក់គ្រាប់បែករបស់ជប៉ុនលើផ្លូវដែកក្បែរទីក្រុង Shenyang និងនាំឱ្យជប៉ុនឈ្លានពានភាគឦសាននៃប្រទេសចិន។

ជាមួយគ្នានេះកាលពីសប្តាហ៍មុន បុរសជនជាតិចិនម្នាក់ក៏ត្រូវបានកាត់ទោសប្រហារជីវិតផងដែរ ពីបទសម្លាប់ស្រ្តីជនជាតិចិនម្នាក់ និងរបួសជនជាតិជប៉ុនពីរនាក់ក្នុងការវាយប្រហារដោយកាំបិតកាលពីខែមិថុនាឆ្នាំមុននៅឯចំណតរថយន្តក្រុងរបស់សាលាជប៉ុននៅទីក្រុង Suzhou ក្បែរទីក្រុងសៀងហៃ។

គួរបញ្ជាក់ថាការវាយប្រហារដោយកាំបិតដ៏សាហាវចំនួនពីរនេះបានបង្កឱ្យមានការភ្ញាក់ផ្អើលពេញសហគមន៍ជប៉ុនក្នុងប្រទេសចិន ខណៈពួកគេនៅតែមិនច្បាស់ថាហេតុអ្វីបានជាកុមារដែលចូលរៀននៅសាលាជប៉ុនត្រូវបានគេកំណត់គោលដៅនៅក្នុងករណីទាំងពីរនេះ។ ទីក្រុងតូក្យូបានស្នើម្តងហើយម្តងទៀតឱ្យទីក្រុងប៉េកាំងធានាសុវត្ថិភាពរបស់ជនជាតិជប៉ុនដែលរស់នៅក្នុងប្រទេសចិន៕