កូរ៉េ​ខាង​ជើង លែង​យក​តង់​បាំង​នាវា​ចម្បាំងដែលលិច ក្រោយ​ស្រង់​ចេញពី​ទឹក​បាន​ពាក់កណ្ដាល​មក​វិញ

ប្រទេសកូរ៉េខាងជើង កំពុង​ស្រង់​​​នាវាពិឃាត Choe Hyon-class បាន​ពាក់កណ្ដាល​មក​វិញ​ហើយ​ បន្ទាប់​ពី​នាវា​ទម្ងន់ ៥ ០០០​តោន​​​នេះ​បាន​​លិចក្នុងអំឡុង​ការ​សម្ពោធនៅឯកំពង់ផែ Chongjin កាលពីថ្ងៃទី​២២​​ខែឧសភា។ រូបភាពពីផ្កាយរណបកាលពីថ្ងៃទី​២​ខែមិថុនា បង្ហាញថា នាវា​ចម្បាំង​កូរ៉េ​ខាង​ជើងពាក់កណ្ដាល​ស្ថិត​នៅក្រោមទឹក ហើយពាក់កណ្តាល​ទៀត​នៅលើគោក និង​លែង​មាន​​តង់​គ្រប​ពី​លើ​ដូច​កាល​ពី​២​សប្ដាហ៍​មុន។

កម្មវិធី​វិភាគ​ព្រឹត្តិការណ៍​នៅ​កូរ៉េ​ខាង​ជើង ហៅ​ថា 38 North បាននិយាយនៅក្នុងរបាយការណ៍របស់ខ្លួនថា «រូបភាពផ្កាយរណបពាណិជ្ជកម្មបង្ហាញកម្មករនៅកំពង់ផែ Chongjin បានបោះជំហានដ៏សំខាន់មួយឆ្ពោះទៅរកគោលដៅ (ស្ដារ​ឡើង​វិញ​នូវ​នាវា​ មុន​កិច្ចប្រជុំ​បក្ស​កាន់​អំណាច​នៅ​ក្នុង​ខែ​មិថុនា​នេះ)»។ របាយការណ៍​ដដែល បន្ថែម​ថា «ទោះជាយ៉ាងណាក៏ដោយ ពួកគេនៅតែត្រូវការរំដោះកប៉ាល់ចេញពីស្ថានភាពដែលជាប់គាំងបច្ចុប្បន្ន មុនពេលវាអាចត្រូវបានផ្លាស់ទីទៅចត​កន្លែង​អណ្តែតទឹក ឬចត​កន្លែង​ស្ងួតសម្រាប់ជួសជុល។ រោងចក្រ​ផលិត​នាវា Chongjin មិនមានគ្រឿងបរិក្ខារបែបនេះទេ»។

សូម​រឭក​ថា ក្រោយ​ហេតុការណ៍​លិច​នាវា​ចម្បាំង កូរ៉េខាងជើង​បានឃុំខ្លួនមន្ត្រីចំនួន៣នាក់ ដែលមានម្នាក់ជាប្រធានវិស្វករនៃរោងចក្រផលិតនា​វា Chongjin ភាគខាងជើង, ម្នាក់ជាមេផ្នែកផលិតនាវា និងម្នាក់ទៀតជាប្រធានរដ្ឋបាលប្រចាំទីនោះ។

ទោះបីជាយ៉ាងណាក៏ដោយ គេនៅមិនទាន់ដឹងទេថាតើ អ្នកទាំង៣នឹងត្រូវទទួលទោសអ្វី និងធ្ងន់កម្រិតណា ប៉ុន្តែ​មេ​ដឹក​នាំ​ គីម ជុងអ៊ុន បានហៅហេតុការណ៍លិចនាវា ថាជា «ឧទ្ទវហេតុធ្ងន់ធ្ងរបំផុត» និងជាអំពើឧក្រិដ្ឋកម្មដែលមិនត្រូវបណ្តោយឲ្យកើតមាន និងមិនអាចអត់ឱនឲ្យបានឡើយ៕

ដោយ៖ ឈាង

ចុចអាន៖ កូរ៉េខាងជើង ឃុំខ្លួនមន្ត្រី៣នាក់ ជុំវិញហេតុការណ៍លិចនាវាចម្បាំង