UN ព្រមាន​ពី​ការ​កើនឡើង​គួរ​ឱ្យ​ព្រួយបារម្ភ​ចំពោះ​កុមារខ្វះ​អាហារូបត្ថម្ភ​ធ្ងន់ធ្ងរ​នៅ​​ហ្គាហ្សា

អង្គការសហប្រជាជាតិបានចេញការព្រមានអំពីការកើនឡើងយ៉ាងខ្លាំង​នៃកង្វះអាហារូបត្ថម្ភធ្ងន់ធ្ងរក្នុងចំណោមកុមារអាយុក្រោម ៥ឆ្នាំ នៅតំបន់ហ្គាហ្សា ដោយមានកុមារជាង ២៧០០ នាក់ទៀតទើបតែធ្វើរោគវិនិច្ឆ័យឃើញ​​នាពេលថ្មីៗនេះ។ នេះបើយោងតាមការចេញផ្សាយរបស់សារព័ត៌មាន Al Jazeera កាលពីថ្ងៃទី០៦ខែឧសភា។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) រាយការណ៍ថា កុមារតូចៗជាង ១៦៥០០នាក់ បានទទួលការព្យាបាលសម្រាប់កង្វះអាហារូបត្ថម្ភធ្ងន់ធ្ងរចាប់តាំងពីខែមករា​ដើមឆ្នាំនេះ​។ ទោះយ៉ាងណាក៏ដោយ មានតែមជ្ឈមណ្ឌលព្យាបាលចំនួន ៤ប៉ុណ្ណោះ នៅហ្គាហ្សាសម្រាប់​ព្យាបាលកុមារដែលមានកង្វះអាហារូបត្ថម្ភធ្ងន់ធ្ងរ ហើយ ២ ​​ក្នុងចំណោមនោះបានបិទ​ទៅហើយ​។ នេះមានន័យថា កុមារជាច្រើនមិនអាចទទួលបានជំនួយវេជ្ជសាស្រ្តសង្គ្រោះជីវិតដែលពួកគេត្រូវការទៀតទេ។

ចំពេលភាពអត់ឃ្លានរីករាលដាលនៅទូទាំងតំបន់ហ្គាហ្សា អង្គការសុខភាពពិភពលោក (WHO) ក៏បានព្រមានថាប្រព័ន្ធសុខភាពរបស់ហ្គាហ្សាកំពុងដួលរលំ។ មន្ទីរពេទ្យដែលដំណើរការចុងក្រោយចំនួនពីរគឺ Nasser Medical Complex និង Al-Amal ឥឡូវនេះក៏មានហានិភ័យមិនដំណើរការដែរ។ WHO អំពាវនាវជាបន្ទាន់ឱ្យមានការការពារមន្ទីរពេទ្យទាំងនេះ ដោយសង្កត់ធ្ងន់ថា ការវាយប្រហារលើកន្លែងថែទាំសុខភាពត្រូវតែបញ្ឈប់។

អ្នកជំនាញរបស់អង្គការសហប្រជាជាតិ និងក្រុមមនុស្សធម៌បានចោទប្រកាន់កងកម្លាំងអ៊ីស្រាអែលថា បានកំណត់គោលដៅដោយចេតនាលើហេដ្ឋារចនាសម្ព័ន្ធវេជ្ជសាស្រ្តរបស់ហ្គាហ្សា ដោយបង្កើតលក្ខខណ្ឌហៅថា«មិនអាចរស់បាន» សម្រាប់ប្រជាជនស៊ីវិល៕

អត្ថបទ៖ ប៊ុន សុភាព