ចារកម្ម​អ៊ុយក្រែន៖ កូរ៉េខាងជើងពេល​នេះ​កំពុងដាក់​ពង្រាយ​ខែល​អាកាស Pantsir របស់រុស្ស៊ី

ប្រមុខចារកម្ម​យោធា​អ៊ុយក្រែន លោក Kyrylo Budanov បានបង្ហាញថា ប្រទេសកូរ៉េខាងជើងកំពុង​ដាក់ពង្រាយ​ប្រព័ន្ធការពារដែនអាកាស Pantsir-S1 ដែលផលិតដោយរុស្ស៊ីរួចហើយ ទាំង​នៅ​ក្នុង​និង​ជុំវិញទីក្រុងព្យុងយ៉ាង។

យោង​តាម​ការ​ចុះផ្សាយ​នា​​ថ្ងៃ​ទី​២​ខែ​កក្កដា​របស់​សារព័ត៌មាន Kyiv Independent ប្រព័ន្ធ​ការពារ​ដែន​អាកាស​នេះ​ គឺ​ជាផ្នែកមួយនៃសំណងរបស់រុស្ស៊ី សម្រាប់ការគាំទ្រផ្នែកយោធារបស់កូរ៉េខាងជើងនៅអ៊ុយក្រែន ដែល​បង្ហាញពី​ភាព​​កាន់​តែស៊ីជម្រៅជាយុទ្ធសាស្ត្រ​រវាង​សម្ព័ន្ធភាព​ទាំង​ពីរ។

លោក Budanov បានកត់សម្គាល់ថា ព័ត៌មាននេះបានលេចឡើងក្នុងអំឡុងពេល«ការផ្ទេរបច្ចេកវិទ្យា និងឧបករណ៍» យ៉ាងទូលំទូលាយពីប្រទេសរុស្ស៊ីទៅកាន់ប្រទេសកូរ៉េខាងជើង ដែលរួមមាន យាន​ការពារដែនអាកាសចល័តរបស់ Pantsir ឧបករណ៍សង្គ្រាមអេឡិចត្រូនិច និងប្រព័ន្ធណែនាំមីស៊ីល។ លោកក៏បានរាយការណ៍ផងដែរថា រុស្ស៊ីបានផ្តល់បច្ចេកវិទ្យា​ឲ្យ​កូរ៉េ​ខាង​ជើង សម្រាប់​ផលិត​យន្តហោះគ្មានមនុស្សបើក Shahed KPI។

Pansir S-1 គឺជា​ប្រព័ន្ធ​ការពារ​ដែនអាកាស​ដូចគ្នា​ដែល​រុស្ស៊ី​ប្រើ​ ដើម្បី​យាម​កន្លែង​យោធា និង​ឧស្សាហកម្ម​របស់ខ្លួន។ វា​មាន​តម្លៃ​ប៉ាន់ស្មាន​ប្រហែល ១៥លាន​ដុល្លារ។ Pantsir ជា​ខែលការពារដែនអាកាសដ៏ទំនើប រយៈចម្ងាយខ្លីទៅមធ្យម ដែលមានសមត្ថភាពស្ទាក់ចាប់យន្តហោះ ដ្រូន និងមីស៊ីល​​គ្រូស។

លោក Budanov បាន​បន្ថែម​ថា កូរ៉េខាងជើង «កំពុងបង្កើនអំណាចយោធារបស់ខ្លួនយ៉ាងខ្លាំងនាពេលបច្ចុប្បន្ន» តាមរយៈកិច្ចសហប្រតិបត្តិការដោយផ្ទាល់ជាមួយរុស្ស៊ី។ កូរ៉េ​ខាង​ជើង កំពុង​ទទួលបានអត្ថប្រយោជន៍ពីការផ្ទេរបច្ចេកវិទ្យា​ពី​ក្រុង​មូស្គូ និង​«បទពិសោធន៍ប្រយុទ្ធពិតប្រាកដ» នៅ​​លើ​សមរភូមិ​រួម​គ្នា​ជាមួយកងទ័ពរុស្ស៊ីប្រឆាំងនឹងអ៊ុយក្រែន ។

រុស្សីក៏បានផ្តល់​ឲ្យ​កូរ៉េខាងជើងនូវ​ប្រព័ន្ធ​សង្គ្រាមអេឡិចត្រូនិចទំនើបៗ ជួយសាងសង់​នាវាចម្បាំង​ទំនើប និងកែលម្អ​មីស៊ីល​​បាលិស្ទិក​ KN-23៕

ដោយ៖ ឈាង