រថភ្លើងធ្លាក់ផ្លូវនៅ​ថៃ បណ្ដាល​ឲ្យ​មាន​អ្នក​រង​របួស​ច្រើន​នាក់

រថភ្លើងល្បឿនលឿនពិសេសដែលធ្វើដំណើរពី​ក្រុង Sungai Kolok ទៅកាន់ក្រុង​ Thep Aphiwat (បាងកក) បានធ្លាក់ផ្លូវ​កាលពីព្រឹកថ្ងៃទី​៩ខែ​សីហា​ឆ្នាំ​២០២៥នេះ នៅជិតស្ថានីយ៍ Kuiburi ក្នុងខេត្ត Prachuap Khiri Khan បណ្តាលឲ្យអ្នកដំណើរជាច្រើននាក់រងរបួស ក្នុង​នោះ​ក៏​មាន​ទាំង​ក្មេងៗ​ផង​ដែរ។

ហេតុការណ៍​នេះ​ បាន​កើតឡើង​កាលពី​វេលា​ម៉ោង​៥​និង​១៥​នាទី​ទៀប​ភ្លឺ នៅ​ពេល​ទូ​​រថភ្លើង​ទី​​១០, ១១ និង ១២ បាន​បើក​ធ្លាក់​ផ្លូវ។ ភ្លាមៗនោះសមត្ថកិច្ចបានចុះទៅដល់កន្លែងកើតហេតុ ដើម្បីជួយសម្រួលដល់អ្នកដំណើរដែលរងរបួស និង​ដឹកបញ្ជូនទៅកាន់មន្ទីរពេទ្យក្បែរនោះ ដើម្បីព្យាបាល។

ក្រុមហ៊ុន​ផ្លូវដែករដ្ឋនៃប្រទេសថៃ បានចេញ​សុំទោសជាសាធារណៈចំពោះហេតុការណ៍​ដ៏អាក្រក់​នេះ ខណៈ​ការស៊ើបអង្កេតលើមូលហេតុនៃការធ្លាក់ផ្លូវកំពុងដំណើរការ។

នេះជាឧប្បត្តិហេតុមួយទៀតក្នុងរយៈពេល​ប៉ុន្មានឆ្នាំថ្មីៗនេះ ដែលបង្ហាញពីបញ្ហាប្រឈមផ្នែកហេដ្ឋារចនាសម្ព័ន្ធផ្លូវដែកដ៏ចាស់របស់ប្រទេសថៃ។ អាជ្ញាធរ​បាន​សន្យា​ពិនិត្យ​យ៉ាង​ហ្មត់ចត់​លើ​ពិធីការ​សុវត្ថិភាព​នៅ​តាម​បណ្តោយ​ផ្លូវ​ភាគ​ខាង​ត្បូង​​ប្រទេស​ដ៏​សំខាន់​​មួយ​នេះ៕

ដោយ៖ ឈាង