លោក អាន់វ៉ា អ៊ីប្រាហ៊ីម ត្រៀមខ្លួន ដោះស្រាយជម្លោះនៅភាគខាងត្បូងប្រទេសថៃ

ឆ្លើយតបទៅនឹងការអំពាវនាវឲ្យលោក អាន់វ៉ា អ៊ីប្រាហ៊ីម ចូលខ្លួនដោះស្រាយជម្លោះនៅភាគខាងត្បូងប្រទេសថៃ នាយករដ្ឋមន្ត្រីម៉ាឡេស៊ីរូបនេះបានឲ្យដឹងថា លោកត្រៀមរួចជាស្រេចដើម្បី ដើម្បីជួយសម្របសម្រួលក្នុងជម្លោះមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអាន់វ៉ា អ៊ីប្រាហ៊ីម គឺជាបុគ្គលដ៏សំខាន់មួយរូបដែលនាំឲ្យមានបទឈប់បាញ់រវាងកម្ពុជានិងថៃ ហើយឥឡូវ ពាក់ព័ន្ធជម្លោះនៅព្រំដែនភាគខាងត្បូងប្រទេសថៃ នាយករដ្ឋមន្ត្រីម៉ាឡេស៊ី បញ្ជាក់ថា លោកពិភាក្សាបញ្ហានេះរួចហើយ ជាមួយរដ្ឋាភិបាលទីក្រុងបាងកក។

ថ្លែងប្រាប់អ្នកសារព័ត៌មាននៅរដ្ឋ Johor កាលពីចុងសប្តាហ៍ លោក អាន់វ៉ា អ៊ីប្រាហ៊ីម និយាយថា «បញ្ហានៅភាគខាងត្បូងប្រទេសថៃ គឺជាបញ្ហាផ្ទៃក្នុងរបស់រដ្ឋាភិបាលថៃ ហើយខ្ញុំបានទាក់ទងពួកគេ ដែលបង្ហាញឆន្ទៈក្នុងការបន្តព្យាយាមបញ្ឈប់ភាពតានតឹង ជាពិសេសអំពើហិង្សាលើភាគីទាំងពីរ។ ខ្ញុំ​មាន​ទំនុក​ចិត្ត​ថា មេដឹក​នាំ​ថៃនឹង​ខិត​ខំ​ស្វែង​រក​សន្តិភាពនិង​សន្តិសុខ​ ហើយ​បន្ត​ធ្វើ​ឲ្យ​តំបន់​នេះ​មាន​ការ​អភិវឌ្ឍ ពង្រឹង​ការ​សិក្សាឥស្លាមនិង​ភាសា​ម៉ាឡេ»។

សូមជម្រាបជាថ្មី នាយករដ្ឋមន្ត្រីម៉ាឡេស៊ីរូបនេះ គឺជាបុគ្គលម្នាក់ដែលខិតខំខ្នះខ្នែងជាទីបំផុត ក្នុងការនាំយកបទបាញ់មកឲ្យកម្ពុជានិងថៃ។

ក្នុងនាមជានាយករដ្ឋមន្ត្រីម៉ាឡេស៊ី និងជាប្រធានអាស៊ានប្តូរវេនឆ្នាំ២០២៥ លោក អាន់វ៉ា បានប្រើប្រាស់ឥទ្ធិពលការទូតរបស់លោកដើម្បីសម្របសម្រួលជម្លោះនេះ ហើយលោកគឺជាកម្លាំងចលករមួយក្នុងការសម្របសម្រួលកិច្ចចរចារវាងមេដឹកនាំកម្ពុជា-ថៃ ដើម្បីស្វែងរកដំណោះស្រាយសន្តិភាព។

មិនត្រឹមប៉ុណ្ណឹង ម៉ាឡេស៊ីថែមទាំងធ្វើជាម្ចាស់ផ្ទះនៃកិច្ចប្រជុំគណៈកម្មាធិការព្រំដែនទូទៅ (GBC) នៅទីក្រុងគូឡាឡាំពួ ដែលជាជំនួបនាំមេដឹកនាំយោធានិងការទូតកម្ពុជា-ថៃឲ្យមកពិភាក្សាគ្នាដោយផ្ទាល់ទៀតផង។

ក្រៅពីជួយសម្របសម្រួលឲ្យកម្ពុជា-ថៃ លោក អាន់វ៉ា ក៏ធ្លាប់ដើរតួនាទីដ៏សំខាន់ ក្នុងការជួយដោះស្រាយជម្លោះអាយុកាលរាប់ទសវត្សរ៍នៅកោះ មីនដាណាវ នៃប្រទេសហ្វីលីពីន ផងដែរ៕

អត្ថបទ៖ សុខ សុវណ្ណ

ចុចអាន៖ ក្រៅពីបទឈប់បាញ់កម្ពុជា-ថៃ, លោក អាន់វ៉ា ក៏ធ្លាប់ជួយរកសន្តិភាពនៅភាគខាងត្បូង ហ្វីលីពីន ដែរ