ក្រៅពីបទឈប់បាញ់កម្ពុជា-ថៃ, លោក អាន់វ៉ា ក៏ធ្លាប់ជួយរកសន្តិភាពនៅភាគខាងត្បូង ហ្វីលីពីន ដែរ

នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម គឺជាបុគ្គលម្នាក់ដែលខិតខំខ្នះខ្នែងជាទីបំផុត ក្នុងការនាំយកបទបាញ់មកឲ្យកម្ពុជានិងថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជានាយករដ្ឋមន្ត្រីម៉ាឡេស៊ី និងជាប្រធានអាស៊ានប្តូរវេនឆ្នាំ២០២៥ លោក អាន់វ៉ា បានប្រើប្រាស់ឥទ្ធិពលការទូតរបស់លោកដើម្បីសម្របសម្រួលជម្លោះនេះ ហើយលោកគឺជាកម្លាំងចលករមួយក្នុងការសម្របសម្រួលកិច្ចចរចារវាងមេដឹកនាំកម្ពុជា-ថៃ ដើម្បីស្វែងរកដំណោះស្រាយសន្តិភាព។

មិនត្រឹមប៉ុណ្ណឹង ម៉ាឡេស៊ីថែមទាំងធ្វើជាម្ចាស់ផ្ទះនៃកិច្ចប្រជុំគណៈកម្មាធិការព្រំដែនទូទៅ (GBC) នៅទីក្រុងគូឡាឡាំពួ ដែលជាជំនួបនាំមេដឹកនាំយោធានិងការទូតកម្ពុជា-ថៃឲ្យមកពិភាក្សាគ្នាដោយផ្ទាល់ទៀតផង។

ក្រៅពីជួយសម្របសម្រួលឲ្យកម្ពុជា-ថៃ លោក អាន់វ៉ា ក៏ធ្លាប់ដើរតួនាទីដ៏សំខាន់ ក្នុងការជួយដោះស្រាយជម្លោះអាយុកាលរាប់ទសវត្សរ៍នៅកោះ មីនដាណាវ នៃប្រទេសហ្វីលីពីន ផងដែរ។

លោកគាំទ្រយ៉ាងខ្លាំងដល់ដំណើរការសន្តិភាពនោះ ដើម្បីបញ្ចប់ជម្លោះរវាងរដ្ឋាភិបាលហ្វីលីពីននិងក្រុមបះបោរមូស្លីម (MILF) នៅភាគខាងត្បូង។ ក្នុងនាមជាប្រទេសជិតខាង ម៉ាឡេស៊ីបានជួយសម្របសម្រួលកិច្ចចរចាជាច្រើនលើកច្រើនសា ហើយចុងក្រោយក៏នាំឲ្យមានកិច្ចព្រមព្រៀងសន្តិភាពដ៏សំខាន់មួយនៅឆ្នាំ២០១៤។

ជាលទ្ធផលនៃកិច្ចព្រមព្រៀង CAB, តំបន់ស្វយ័ត Bangsamoro ត្រូវបានបង្កើតឡើងនៅភាគខាងត្បូងប្រទេសហ្វីលីពីន ដែលបញ្ចប់ជម្លោះប្រដាប់អាវុធដ៏យូរអង្វែង និងបាននាំមកនូវសន្តិភាពដល់តំបន់។

យោងតាមរបាយការណ៍ពីស្ថាប័នអន្តរជាតិមួយចំនួន ដូចជាធនាគារពិភពលោក, តួលេខមនុស្សស្លាប់ក្នុងជម្លោះប្រដាប់អាវុធដ៏រ៉ាំរ៉ៃមួយនេះ មានចន្លោះពី ១២០ ០០០ ទៅ ១៥០ ០០០ នាក់៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ថា បទឈប់បាញ់កម្ពុជា-ថៃ ជាសមិទ្ធផលដ៏ធំមិនធ្លាប់មាន សម្រាប់អាស៊ាន