ហ្សេលេនស្គី៖ ការពិភាក្សាដោយផ្ទាល់ជាមួយ ពូទីន ជាផ្លូវ«ដ៏មានប្រសិទ្ធភាពបំផុត» ដើម្បីសន្តិភាព

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានអំពាវនាវជាថ្មីម្តងទៀត​ឲ្យ​​មាន​ជំនួប​ដោយផ្ទាល់ជាមួយសមភាគីរុស្ស៊ីលោក វ្ល៉ាឌីមៀរ ពូទីន ដោយបញ្ជាក់ថា វាជា «មធ្យោបាយឆ្ពោះទៅមុខដ៏មានប្រសិទ្ធភាពបំផុត» ដើម្បីបញ្ចប់​សង្គ្រាម។

ថ្លែង​ក្នុង​ពិធី​បុណ្យ​ឯករាជ្យ​ជាតិ​អ៊ុយក្រែន​នៅ​ថ្ងៃ​ទី២៤​ខែ​សីហា លោក ហ្សេលេនស្គី បាន​សន្យា​ថា​នឹង«ជំរុញ​រុស្ស៊ី​ឆ្ពោះ​ទៅ​រក​សន្តិភាព»។ លោក​បាន​បញ្ជាក់​ថា ទាំង​សហរដ្ឋ​អាមេរិក និង​អឺរ៉ុប​យល់​ស្រប​ថា អ៊ុយក្រែន «មិន​ទាន់​ឈ្នះ​ទាំង​ស្រុង​នៅ​ឡើយ​ទេ ប៉ុន្តែច្បាស់​ណាស់​ក៏​​មិន​ចាញ់​ដែរ»។

ការជំរុញ​សម្រាប់កិច្ចប្រជុំកំពូលទ្វេភាគី កើតឡើងបន្ទាប់ពីកិច្ចខិតខំប្រឹងប្រែងការទូតរបស់ប្រធានាធិបតីអាមេរិក ដូណាល់ ត្រាំ ជាមួយ​លោក ពូទីន នៅរដ្ឋ​អាឡាស្កា និងការជួបជាមួយលោក ហ្សេលេនស្គី និងមេដឹកនាំអឺរ៉ុបនៅទីក្រុងវ៉ាស៊ីនតោន។ លោក ត្រាំ បានបង្ហាញពីក្តីសង្ឃឹមនៃការរៀបចំកិច្ចប្រជុំពូទីន-ហ្សេលេនស្គី និងក្រោយ​មក​គឺ​ជំនួប​ត្រីភាគី ដោយ​រួម​បញ្ចូល​ទាំង​វត្តមាន​របស់​គាត់។

ទោះជាយ៉ាងណាក៏ដោយ ការរំពឹងទុកសម្រាប់កិច្ចប្រជុំកំពូលភ្លាមៗនៅមានភាពស្រពិចស្រពិលនៅឡើយ។ រដ្ឋមន្ត្រីការបរទេសរុស្ស៊ីលោក Sergei Lavrov បានច្រានចោលលទ្ធភាពនេះ ដោយចោទប្រកាន់លោកខាងលិចថាកំពុងស្វែងរក «លេសដើម្បីរារាំងការចរចា» និងរិះគន់​លោក ហ្សេលេនស្គី ដែល​ចង់​បាន​កិច្ចប្រជុំ«ទាំង​ដៃ​ទទេ»។ លោក Lavrov បានកំណត់លក្ខខណ្ឌជាមុនសម្រាប់កិច្ចចរចា ដូចជា អ៊ុយក្រែនត្រូវ​បោះបង់មហិច្ឆតាចូល​អង្គការណាតូ និងយល់ព្រមពិភាក្សាបញ្ហាកាត់​ទឹក​ដី៕

ដោយ៖ ឈាង