ព័ត៌មានអន្ដរជាតិ

បាងកក ជួបព្យុះភ្លៀង បណ្តាលឲ្យបាក់ដើមឈើសង្កត់ផ្ទះនិងកម្ទេចយានយន្តជាច្រើនគ្រឿង

បានផុស

៧ ខែ មុន

នៅ

ថ្ងៃសុក្រ ៣ តុលា ២០២៥

ដោយ

ទីក្រុងបាងកកនៃប្រទេសថៃបានជួបព្យុះភ្លៀង ដោយឥទ្ធិពលរបសវាបង្កជាខ្យល់កន្ត្រាក់និងខ្យល់កួចបោកបំប៉ើងដំបូងសំណង់នានា និងផ្តួលរំលំដើមឈើបាក់សង្កត់ផ្ទះនិងយានយន្តជាច្រើនគ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, ព្យុះបានវាយប្រហារខ័ណ្ឌចតុចក្រ នាវេលាម៉ោង៥:៣០នាទីព្រឹកសុក្រទី៣ខែតុលាឆ្នាំ២០២៥ បណ្តាលឲ្យមានការបំផ្លាញបំផ្លាញ ដោយដើមឈើធំៗបានបាក់សង្កត់ផ្ទះសម្បែងនិងម៉ូតូរថយន្តជាច្រើនគ្រឿ បង្កការកកស្ទះ ប៉ុន្តែមិនមានរបាយការណ៍អំពីមនុស្សរងរបួសទេ។

មិនមែនតែនៅបាងកកទេ ដើមឈើដ៏ធំមួយដើម ក៏បាក់សង្កត់លើរថយន្តជាច្រើនគ្រឿងនៅស្រុក Pak Kret នៃខេត្ត Nonthaburi ផងដែរ ដោយបង្កការបំផ្លិចបំផ្លាញនិងខូចខាត ធ្ងន់ធ្ងរ។

គ្រោះធម្មជាតិនេះវាយប្រហារបន្ទាប់ពីអភិបាលក្រុងបាងកក លោក Chadchart Sittipunt ព្រមានថា រាជធានីថៃ អាចប្រឈមនឹងទឹកជំនន់ដ៏ធំក្នុងអំឡុងថ្ងៃទី៩ដល់ថ្ងៃទី១០ខែតុលា ដោយសារតែការកើនឡើងនៃកម្ពស់ទឹកក្នុងទន្លេចៅប្រាយ៉ា រួមជាមួយនឹងភ្លៀងធ្លាក់ និងការបញ្ចេញទឹកពីទំនប់ទឹកខាងលើ។

ការិយាល័យធនធានទឹកជាតិរបស់ថៃ (ONWR) ព្យាករថា ចាប់ពីថ្ងៃទី៣ដល់ថ្ងៃទី៦ខែតុលា កម្ពស់ទឹកនៅតាមដងទន្លេចៅប្រាយ៉ា ទន្លេថាជីន និងទន្លេមេក្លង នឹងកើនឡើង គួបផ្សំជាមួយជំនោរខ្ពស់ ដោយអាចរុញច្រានកម្ពស់ទឹក ១.៧០ ទៅ ១.៩០ម៉ែត្រពីលើនីវ៉ូសមុទ្រ ប្រហែល ០.២០ម៉ែត្រលើកម្រិតគ្រោះថ្នាក់។

យ៉ាងណា ទីក្រុងបាងកកមិនទាន់ឃើញមានភ្លៀងធ្លាក់ខ្លាំងនៅឡើយទេ ប៉ុន្តែគេរំពឹងថា ទឹកភ្លៀងនឹងកើនឡើងនៅសប្តាហ៍ក្រោយ។ លោក Chadchart ក៏ព្រមានដែរថា សង្កាត់ដែលជាតំបន់ទំនាប និងតាមមាត់ទន្លេមួយចំនួននៅខាងក្រៅទំនប់ធំៗ អាចនឹងរងគ្រោះទឹកជំនន់ ឬទឹកហូរខ្លាំង។