មិនត្រឹមមន្ទីរពេទ្យ ឥឡូវសូម្បីប៉ុស្តិ៍ប៉ូលិស Samsen ក្នុងទីក្រុងបាងកក ក៏ប្រឈមបាក់ដែរ

ហេតុការណ៍បាក់ផ្លូវ Samsen ក្នុងទីក្រុងបាងកកប្រទេសថៃកាលពីថ្ងៃពុធទី២៤ខែកញ្ញាឆ្នាំ២០២៥ បានបង្កភាពភ្ញាក់ផ្អើលយ៉ាងខ្លាំង ហើយភ្លាមៗ មានការព្រមានអំពីហានិភ័យបាក់មន្ទីរពេទ្យ Vajira ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង ឥឡូវបើតាមការផ្សាយរបស់ Khaosod, សូម្បីប៉ុស្តិ៍ប៉ូលិស Samsen នៅជាប់នោះក៏កំពុងរងហានិភ័យបាក់ផងដែរ ព្រោះតែឥទ្ធិពលនៃបំណាក់ផ្លូវជម្រៅ៥០ម៉ែត្រ។

លោក Amorn Pimanmas ប្រធានសមាគមវិស្វករសំណង់ថៃបានព្រមានថា បន្ទាប់ពីការពិនិត្យសំណង់ អគារប៉ូលិស Samsen ក៏ប្រឈមការបាក់រលំផងដែរ ព្រោះផលប៉ះពាល់ខ្លះដល់សសរគ្រឹះ។

មុននេះ មន្ទីរពេទ្យ Vajira បានជម្លៀសអ្នកជំងឺចេញរួចទៅហើយ ដោយសារតែហានិភ័យបាក់រលំ។ ក្រៅពីអ្នកជំងឺ ពលរដ្ឋរស់នៅជុំវិញនោះ ក៏ត្រូវជម្លៀសចេញផងដែរ ស្របពេលរដ្ឋបាលក្រុងបាងកក បានប្រកាសដាក់តំបន់នោះជាតំបន់ហាមចូល ព្រោះតែគ្រោះថ្នាក់។

សូមជម្រាបជាថ្មី ផ្នែកមួយនៃផ្លូវ Samsen ទល់មុខមន្ទីរពេទ្យ Vajira ក្នុងខ័ណ្ឌ Dusit នៃទីក្រុងបាងកក បានបាក់ស្រុត​នាវេលាម៉ោង៧ និង៣០នាទីព្រឹកថ្ងៃពុធ​ទី​២៤​ខែ​កញ្ញា​ឆ្នាំ​២០២៥។

មន្ត្រីសាលាខ័ណ្ឌ Dusit បានឲ្យដឹងថា ការបាក់ស្រុតនេះ បណ្តាលមកពី​​ផ្ទុះ​បំពង់​ទឹក ធ្វើឲ្យប៉ះពាល់ដល់ផ្ទៃ​ខាង​លើ​នៃ​ផ្លូវ៕

អត្ថបទ៖ សុខ សុវណ្ណ

ចុចអាន៖ ក្រោយបាក់ផ្លូវ ឥឡូវអ្នកជំងឺត្រូវជម្លៀសចេញជាបន្ទាន់ ដោយសារ​ហានិភ័យបាក់មន្ទីរពេទ្យនៅ បាងកក