សុខភាព

គួរចាប់អារម្មណ៍ការឈឺចាប់នៅអាងត្រគាក ដែលស្ត្រីជួបប្រទះញឹកញាប់!

បានផុស

៥ years មុន

នៅ

ថ្ងៃព្រហស្បតិ៍ ៣ មិថុនា ២០២១

ដោយ

ការឈឺចាប់នៅអាងត្រគាក ជារឿងជួបប្រទះញឹកញាប់ជាងគេក្នុងជីវិតរស់នៅរបស់ស្ត្រី។ ស្ត្រីគួរចាប់អារម្មណ៍ថា ការឈឺចាប់នេះមួយចំណែកជារឿងធម្មជាតិរបស់ស្ត្រី (Physiological menses)ប៉ុន្តែមួយភាគធំ វាជារឿងមិនធម្មតា និងកើតឡើងដោយសារបញ្ហា និងជំងឺផ្សេងៗ៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១) ការឈឺចាប់ជាខ្លាំង ដែលពុំធ្លាប់មាន (Acute pelvic pain)៖

នេះជាសញ្ញាដែលគួរឲ្យចាប់អារម្មណ៍លើមូលហេតុ ដែលបណ្តាលមកពីជំងឺផ្សេងៗ ហើយចាំបាច់ត្រូវធ្វើការព្យាបាលជាបន្ទាន់។ ជំងឺទាំងអស់នោះមានដូចជា៖

– ជំងឺដុំដៃស្បូន (Ovarian cyst): ដុំដៃស្បូនអាចរមូល ឬក៏បែកដែលបណ្តាលឲ្យហូរឈាមពេញពោះ។

– ជំងឺរលាកអាងត្រគាក (Pelvic inflammatory disease): វាបង្ករោគឡើងដោយបាក់តេរីនៅលើសរីរាង្គបន្តពូជស្ត្រី (ស្បូន ដៃស្បូន អូវែរ)។

– អាចជាជំងឺរលាកខ្នែងពោះវៀន (Appendicitis): ជាទូទៅវាឈឺនៅផ្នែកអាងត្រគាកខាងក្រោម និងផ្នែកខាងស្តាំ។

– ជំងឺរលាកស្រោមពោះ (Peritonitis): ជំងឺនេះវាមានសភាពធ្ងន់ធ្ងរ ដែលចាំបាច់ត្រូវការព្យាបាលជាបន្ទាន់ បើពុំនោះទេវាអាចគ្រោះថ្នាក់ដល់អាយុជីវិត។

– ជំងឺរលាកផ្លូវបង្ហូរនោម (Urinary tract infection): ជំងឺនេះជាទូទៅឈឺចាប់នៅអាងត្រគាក ហើយរាលដាលទៅផ្នែកខាងក្រោយ ជាពិសេសនៅពេលយើងបន្ទោបង់ទឹកនោម និងបណ្តាលឲ្យយើងនោមញឹក។

– ជំងឺទល់លាមក (Constipation or bowel spasm): ជំងឺនេះកើតឡើងម្តងម្កាល ជាករណីកម្រ ប៉ុន្តែវាអាចធ្ងន់ធ្ងរដែលបណ្តាលឲ្យស្ទះពោះវៀន។

– ជំងឺអាប់សែអាងត្រគាក (Pelvic abscess): វាបង្កឡើងដោយសារមានខ្ទុះនៅក្នុងអាងត្រគាក ជាពិសេសនៅដៃស្បូន តួស្បូន និងទ្វារមាស ដែលចាំបាច់ត្រូវមកសម្រាកពេទ្យ និងព្យាបាលជាបន្ទាន់។

២) ការឈឺចាប់អាងត្រគាករ៉ាំរ៉ៃ (Persistent or recurrent pelvic pain)៖

ការឈឺចាប់នេះជាទូទៅពាក់ព័ន្ធនឹងវដ្តរដូវរបស់ស្ត្រី ជាពិសេសឈឺចាប់នៅពេលមានរដូវ ទៅតាមស្ត្រីម្នាក់ៗ និងអាចបណ្តាលមកពីជំងឺរួមផ្សំមួយចំនួនទៀតដូចជា៖

– ជំងឺអង់ដូមេទ្រីយ៉ូស (Endometriosis): ជំងឺនេះធ្វើឲ្យស្ត្រីមានការឈឺចាប់ជារឿយៗ រាល់ពេលមានវដ្តរដូវ។

– ការរលាកអាងត្រគាករ៉ាំរ៉ៃ (Pelvic inflammatory disease): ភាគច្រើនបង្ករោគដោយមេរោគផ្សេងៗនៅលើសរីរាង្គបន្តពូជរបស់ស្ត្រី ដូចជា Chlamydia ឬក៏ Gonorrhoea ដែលតម្រូវឲ្យព្យាបាលដោយថ្នាំផ្សះ។

– ការរលាកពោះវៀន (Irritable bowel syndrome) ដែលទាក់ទងនឹងប្រព័ន្ធរំលាយអាហារដែលធ្វើឲ្យឈឺពោះ ហើមពោះ រាករូស និងទល់លាមកជាដើម។

– ជំងឺគីសដៃស្បូន (Recurrent ovarian cysts): ដុំគីសនេះជាធម្មតាអាចកើតហើយបាត់ទៅវិញ អាស្រ័យទៅតាមអរម៉ូននៃវដ្តរដូវ។

– ជំងឺស្រុតស្បូន (Prolapse of the womb): ជាទូទៅសរីរាង្គបន្តពូជរបស់ស្ត្រី ជាពិសេសនៅពេលមានវ័យចំណាស់ ត្រូវធ្លាក់ចុះតាមទ្វារមាសខុសទីតាំងធម្មតាចេញមកក្រៅតិច ឬច្រើនទៅតាមកម្រិតនៃជំងឺ ដែលបង្កឲ្យមានការឈឺចាប់រ៉ាំរ៉ៃ និងរំខានដល់ជីវភាពប្រចាំថ្ងៃរបស់ស្ត្រី។

– ជំងឺដុំស្បូន (Fibroids or adenomyosis): ជំងឺនេះជាទូទៅ ឈឺស្ទុំៗ និងមានអារម្មណ៍តឹងណែននៅលើអាងត្រគាក ហើយអាចឈឺចាប់ខ្លាំងនៅពេលដុំនេះរមួល ដែលស្ត្រីត្រូវប្រញាប់ទៅជួបគ្រូពេទ្យជំនាញដើម្បីព្យាបាលឲ្យបានទាន់ពេលវេលា។

៣) ការឈឺចាប់នៅអាងត្រគាក ចំពោះស្ត្រីមានផ្ទៃពោះ (Pelvic pain in pregnant women)៖

ស្ត្រីមានផ្ទៃពោះទាំងឡាយ គួរចាប់អារម្មណ៍ការឈឺចាប់នេះ អាចបណ្តាលមកពីជំងឺទាំងឡាយដូចរៀបរាប់ខាងលើក្នុងកំឡុងពេលគាត់មានផ្ទៃពោះ ប៉ុន្តែដោយឡែកស្ត្រីក៏អាចបណ្តាលមកពីគភ៌របស់គាត់ដូចជាៈ

– ជំងឺកូនក្រៅស្បូន (Ectopic pregnancy): ជំងឺនេះកើតឡើងនៅត្រីមាសដំបូងនៃគភ៌ ហើយធ្វើឲ្យហូរឈាមនៅក្នុងពោះ ដែលបង្កឲ្យមានគ្រោះថ្នាក់ដល់អាយុជីវិត។

– ការរលូតកូន (Miscarriage threatening): កើតឡើងលើស្ត្រីមានផ្ទៃពោះ ដែលធ្វើឲ្យស្ត្រីមានការកន្ត្រាក់ស្បូន និងធ្លាក់ឈាមតាមទ្វារមាស។

– កូនស្លាប់ក្នុងពោះ (MFIU): ជាទូទៅស្ត្រីជាម្តាយមានការឈឺពោះ ហើយទារកក្នុងផ្ទៃមិនកម្រើក។ ស្ត្រីជាម្តាយត្រូវប្រញាប់មកជួបគ្រូពេទ្យឯកទេសផ្នែកសម្ភព និងរោគស្ត្រីជាបន្ទាន់ ដើម្បីពិនិត្យគភ៌របស់គាត់។

– ការសម្រាលកូនមុនខែ (Premature delivery): ជាទូទៅកើតនៅត្រីមាសចុងក្រោយ ដែលស្ត្រីមានការឈឺចាប់នៅអាងត្រគាក កន្ត្រាក់ស្បូន និងមានធ្លាក់ឈាម ឬក៏ហូរទឹកភ្លោះ នៅមុនថ្ងៃកំណត់នៃការសម្រាល។

ប្រសិនបើស្ត្រីដែលមានបញ្ហាដូចបានរៀបរាប់ខាងលើ សូមមេត្តារួសរាន់មកពិគ្រោះនិងពិនិត្យសុខភាព ជាមួយវេជ្ជបណ្ឌិតឯកទេសសម្ភពនិងរោគស្ត្រីនៃមន្ទីរពេទ្យកាល់ម៉ែត ដើម្បីទទួលការព្យាបាលទាន់ពេលវេលា៕

អត្ថបទ៖ រស្មី

សូមចុចអាន៖ មកយល់ដឹងពី ជំងឺស្ទះសរសៃឈាមបេះដូង!

Related Topics:សុខភាពស្ត្រី

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា