សុខភាព

មិនចង់ឲ្យមានផលវិបាកដល់គភ៌ ម៉ាក់ៗពពោះកុំសូវនៅជិតសត្វឆ្មាពេក

បានផុស

៤ years មុន

នៅ

ថ្ងៃអង្គារ ១ កុម្ភៈ ២០២២

ដោយ

ពេលចាប់ផ្ដើមពពោះ ម៉ាក់ៗនឹងត្រូវចាស់ៗ ឬមិត្តភ័ក្ដិជុំវិញខ្លួនណែនាំគ្រប់សព្វបែបយ៉ាងតាំងពីរបបអាហារ សកម្មភាពប្រចាំ និងជំនឿខ្មែរបុរាណមួយចំនួនទៀត ដើម្បីថែទាំខ្លួន និងកូនក្នុងផ្ទៃបានល្អ កុំឲ្យថ្លោះធ្លោយ។ ក្នុងនោះដែរ ក៏មានការហាមឃាត់ម៉ាក់ៗពពោះមិនឲ្យនៅជិតសត្វឆ្មាដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុអ្វីស្ត្រីពពោះនៅជិតសត្វឆ្មាអត់បាន?

តាមពិតទៅ មិនមែនស្ត្រីពពោះនៅជិតសត្វឆ្មាមិនបាននោះទេ គ្រាន់តែថាម៉ាក់ៗមិនគួរប៉ះពាល់នឹងកាកសំណល់ឆ្មា (លាមក ឬទឹកនោម) ព្រោះម៉ាក់ៗងាយប្រឈមឆ្លងមេរោគ តុកសូប្លាស្មូស៊ីស (Toxoplasmosis)។ តុកសូប្លាស្មូស៊ីស ជាប៉ារ៉ាស៊ីត ដែលមានក្នុងលាមក ឬទឹកនោមឆ្មា។ មិនត្រឹមតែសត្វឆ្មាប៉ុណ្ណោះទេដែលផ្ទុកប៉ារ៉ាស៊ីតនេះ សូម្បីតែសត្វមួយចំនួនទៀត ឬអាហារដូចជា សាច់ឆៅ ឬចម្អិនមិនបានល្អ ក៏អាចផ្ទុកតុកសូប្លាស្មូស៊ីសនេះដែរ។

ប៉ារ៉ាស៊ីតមួយនេះមិនបង្កឲ្យម៉ាក់ៗឈឺធ្ងន់ធ្ងរទេ ប៉ុន្តែអាចបង្កគ្រោះថ្នាក់ដល់អាអូនក្នុងផ្ទៃបានដោយបំផ្លាញសរីរាង្គទារកដូចជា ខួរក្បាល តម្រងនោម មានទឹកដក់ក្នុងពោះទារក ឬរហូតអាចបណ្ដាលឲ្យរលូតកូនក៏ថាបាន។ យ៉ាងណាមិញ ក៏ជាសំណាងល្អដែរ ព្រោះឱកាសនៃការឆ្លងជំងឺតុកសូប្លាស្មូស៊ីសអំឡុងពេលមានផ្ទៃពោះមានកម្រិតទាប។

ផ្ទុយទៅវិញ ដើម្បីសុវត្ថិភាពកូន បើក្នុងផ្ទះមានចិញ្ចឹមឆ្មា ម៉ាក់ៗគួរតែឲ្យសមាជិកគ្រួសារសម្អាតលាមក ឬទឹកនោមឆ្មា ហើយព្យាយាមកុំនៅក្បែរវា។ ក្នុងករណី ម៉ាក់ៗចាំបាច់ត្រូវសម្អាតដោយខ្លួនឯង គួរប្រើស្រោមដៃឲ្យជិត ហើយលាងសម្អាតដៃរបស់ខ្លួនឲ្យស្អាតក្រោយពេលកើប ឬជូតកាកសំណល់សត្វរួច។

ជាចុងក្រោយ ម៉ាក់ៗពពោះត្រូវទៅពិនិត្យឲ្យទៀងទាត់ជាមួយគ្រូពេទ្យជំនាញទៅតាមការណាត់ជួប ជាពិសេសបើមានចម្ងល់ទាក់ទងនឹងការថែទាំសុខភាពពេលពពោះគួរសួរគ្រូពេទ្យ។ ចំពោះរបៀបរបបរស់នៅប្រចាំថ្ងៃ ម៉ាក់ៗត្រូវញ៉ាំអាហារឲ្យបានគ្រប់គ្រាន់ មានបន្លែ ផ្លែឈើ គ្រាប់ធញ្ញជាតិ សាច់គ្រប់មុខ ដើម្បីទទួលបានសារធាតុចិញ្ចឹមគ្រប់គ្រាន់ និងព្យាយាមធ្វើសកម្មភាពរាងកាយ ឬហាត់ប្រាណសមស្របទៅតាមត្រីមាសនៃការពពោះនីមួយៗ៕

អត្ថបទផ្ដល់ដោយ៖ Hello Krupet

ចុចអាន៖សម្រាលកូនហើយប៉ុន្មានខែ ទើបអាចចាក់វ៉ាក់សាំងកូវីដ-១៩ បាន?