គ្រូពេទ្យនៅហ្គាហ្សា បង្ខំចិត្តប្រើពិលបញ្ចាំង និងគ្មានថ្នាំស្ពឹកចាក់ ពេលវះកាត់សម្រាលកូន

តាមសេចក្តីរាយការណ៍បានឲ្យដឹងថា ស្ត្រីមានផ្ទៃពោះនៅតំបន់ហ្គាហ្សា ត្រូវគ្រូពេទ្យប្រើពិលបញ្ចាំងឲ្យភ្លឺ និងគ្មានចាក់ថ្នាំស្ពឹកឡើយ អំឡុងពេលវះកាត់សម្រាលកូន ខណៈការទម្លាក់គ្រាប់បែករបស់អ៊ីស្រាអែលនៅតែបន្តកើតមាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Soraida Hussein-Sabbah អ្នកឯកទេសខាងផ្នែកយេនឌ័រ និងតស៊ូមតិនៅ អង្គការ ActionAid UK ដែលមានមូលដ្ឋាននៅទីក្រុង Ramallah នៃតំបន់ West Bank បាននិយាយថា “ភាពចលាចលនិងភាពភ័យរន្ធត់ដែលបានកើតឡើងនៅក្នុងតំបន់ហ្គាហ្សា កំពុងធ្វើឲ្យប៉ះពាល់ដល់ស្ត្រីខ្លាំងជាទីបំផុត។ ស្ថានភាពនៅក្នុងមន្ទីរពេទ្យគឺមានគ្រោះថ្នាក់ណាស់ ការសម្រាលកូនដោយវះកាត់ និងការវះកាត់នានា កំពុងធ្វើឡើងដោយប្រើត្រឹមពិល ឬ Flash ទូរសព្ទដើម្បីផ្តល់ពន្លឺ ហើយពេលពួកគេកំពុងអនុវត្តនីតិវិធីវេជ្ជសាស្ត្រទាំងនេះ គ្រាប់បែកកំពុងធ្លាក់នៅជុំវិញពួកគេផងដែរ”។

របាយការណ៍ខាងលើអះអាងទៀតថា ស្ត្រីមានផ្ទៃពោះម្នាក់ ត្រូវបង្ខំចិត្តបញ្ជូនចេញពីបន្ទប់ ក្រោយសម្រាលកូនបានត្រឹមតែបីម៉ោងប៉ុណ្ណោះ ដើម្បីទុកកន្លែងឲ្យអ្នកផ្សេង។

សូមបញ្ជាក់ ស្ត្រីមានផ្ទៃពោះប្រហែល ៥ ម៉ឺននាក់ កំពុងរស់នៅតំបន់ហ្គាហ្សាស្ទ្រីប ហើយស្ថិតក្នុងចំណោមក្រុមងាយរងគ្រោះដែលកំពុងរងទុក្ខ ដោយសារកង្វះឧបករណ៍វេជ្ជសាស្ត្រ ស្បៀងអាហារ និងទឹក។

យោងតាមមូលនិធិប្រជាជនរបស់អង្គការសហប្រជាជាតិ (UNFPA) បានឲ្យដឹងថា ជាងពាក់កណ្តាលនៃចំនួនប្រជាជន ២.១ លាននាក់របស់តំបន់ហ្គាហ្សាគឺជាកុមារ ខណៈទារកប្រហែល ១៦០ នាក់ ត្រូវបានគេប៉ាន់ស្មាន កើតជារៀងរាល់ថ្ងៃ ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទីបំផុត ក្រុមហាម៉ាស់ បើកច្រកព្រំដែន ឲ្យអ្នករបួសនិងជនបរទេស ចាកចេញពីហ្គាហ្សា