Connect with us

សុខភាព

ថៃ កំពុងប្រយ័ត្ន ថ្នាំទឹកសេរ៉ូ ៤ប្រភេទ ដែលសម្លាប់កុមារជាង ១០០នាក់

បានផុស

នៅ

រដ្ឋបាលចំណីអាហារ និងឱសថថៃ (FDA) បានទទួលការព្រមានពីអង្គការសុខភាពពិភពលោក (WHO) អំពីថ្នាំទឹកសេរ៉ូក្អក ដែលផលិតដោយប្រទេសឥណ្ឌាចំនួន ៤ប្រភេទ ពាក់ព័ន្ធនឹងការស្លាប់កុមារសរុប១៦៥នាក់ នៅក្នុងប្រទេសហ្គាំប៊ី និងឥណ្ឌូណេស៊ី។

FDA និយាយថា ផលិតផលដែលផលិតដោយក្រុមហ៊ុន Maiden Pharmaceutical ទាំងនេះ មិនត្រូវបាននាំចូលក្នុងប្រទេសថៃទេ ប៉ុន្តែពួកគេមានការប្រុងប្រយ័ត្នខ្ពស់ ចំពោះការគំរាមកំហែង និងកំពុងតាមដានបញ្ហានេះយ៉ាងដិតដល់ជាទីបំផុត។

លោកវេជ្ជបណ្ឌិត Surachok Tangwiwat អគ្គលេខាធិការរង FAD បាននិយាយថា សារធាតុគីមីពុល អាចបណ្តាលឲ្យកុមារស្លាប់។ រោគសញ្ញារួមមាន ឈឺពោះ ក្អួត រាគ នោមទាស់ ឈឺក្បាល ផ្លាស់ប្តូរស្ថានភាពផ្លូវចិត្ត និងខ្សោយតម្រងនោម។

ថ្នាំទឹកសេរ៉ូទាំង៤ប្រភេទ ដែល WHO ហាមឃាត់រួមមាន Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។

អាជ្ញាធរហ្គាំប៊ីបានរាយការណ៍កាលពីដើមខែកញ្ញាថា កុមាររាប់សិបនាក់ បានស្លាប់ដោយសារជំងឺខ្សោយតម្រងនោមក្នុងអំឡុងខែមិថុនាដល់ខែសីហា ហើយថាមូលហេតុ គឺទាក់ទងទៅនឹងថ្នាំទឹកសេរ៉ូក្អក។

(រាប់ពីឆ្វេងទៅស្តាំ) ថ្នាំសេរ៉ូ Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup

ការធ្វើតេស្តមន្ទីរពិសោធន៍បានបង្ហាញថា សារធាតុគីមី diethylene glycol និង ethylene glycol ដែលត្រូវបានរកឃើញនៅក្នុងថ្នាំទឹកសេរ៉ូក្អក គឺបានបណ្តាលឲ្យកុមារចំនួន ៦៦ នាក់ស្លាប់។ ការស្លាប់បានកើតឡើងក្នុងរយៈពេលពីរទៅបីថ្ងៃ ក្រោយផឹកថ្នាំ។

ចំណែក យោងតាមក្រសួង​សុខាភិបាល​សាធារណៈ​ឥណ្ឌូណេស៊ី​, ​កុមារ​ចំនួន ៩៩ នាក់​បាន​ស្លាប់​បន្ទាប់​ពី​ផឹក​ថ្នាំទឹកសេរ៉ូ​ក្អក​ដែល​ផលិត​ដោយក្រុមហ៊ុន​ឱសថ Maiden Pharmaceuticals។ ចាប់តាំងពីខែមករាមក កុមារឥណ្ឌូណេស៊ីចំនួន២០៦នាក់ បានរងរបួសតម្រង់នោមស្រួចស្រាវ ដែលភាគច្រើនជាកុមារមានអាយុក្រោម៥ឆ្នាំ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ WHO ចេញការព្រមានចំពោះថ្នាំសេរ៉ូផ្តាសាយ ៤ប្រភេទ បន្ទាប់ពីកុមារ ៦៦នាក់ស្លាប់ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម