WHO ចេញការព្រមានចំពោះថ្នាំសេរ៉ូផ្តាសាយ ៤ប្រភេទ បន្ទាប់ពីកុមារ ៦៦នាក់ស្លាប់ (មានវីដេអូ)

អង្គការសុខភាពពិភពលោក (WHO) បានចេញសេចក្តីជូនដំណឹងមួយកាលពីថ្ងៃពុធទី៥ខែតុលា ជុំវិញថ្នាំសេរ៉ូផ្តាសាយនិងក្អកចំនួន៤ប្រភេទ ដែលផលិតដោយក្រុមហ៊ុនឱសថ Maiden Pharmaceuticals នៅក្នុងប្រទេសឥណ្ឌា ដោយព្រមានថា ថ្នាំសេរ៉ូទាំងនេះ អាចជាប់ពាក់ព័ន្ធនឹងការស្លាប់របស់កុមារចំនួន៦៦នាក់នៅក្នុងប្រទេសហ្គាំប៊ី។

ទីភ្នាក់ងារសុខភាពអង្គការសហប្រជាជាតិមួយនេះ ក៏បានព្រមានផងដែរថា ថ្នាំដែលមានមេរោគ អាចត្រូវបានគេចែកចាយនៅខាងក្រៅប្រទេសអាហ្វ្រិកខាងលិច ហើយមានលទ្ធភាពបង្កផលប៉ះពាល់ជាសកល។

ប្រមុខ WHO លោក Tedros Adhanom Ghebreyesus បានប្រាប់អ្នកយកព័ត៌មានថា ថ្នាំសេរ៉ូផ្តាសាយ និងក្អកចំនួន៤ប្រភេទ ត្រូវបានផ្សារភ្ជាប់ទៅនឹងការរងរបួសតម្រងនោមស្រួចស្រាវ និងការស្លាប់កុមារចំនួន៦៦នាក់។

លោក Tedros និយាយថា WHO ក៏កំពុងធ្វើការស៊ើបអង្កេតបន្ថែម ជាមួយក្រុមហ៊ុន និងអាជ្ញាធរគ្រប់គ្រងនៅក្នុងប្រទេសឥណ្ឌាផងដែរ។

យោងតាមការព្រមានអំពីផលិតផលវេជ្ជសាស្រ្តដែលចេញដោយ WHO កាលពីថ្ងៃពុធ, ផលិតផលទាំង៤នោះគឺ Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។

កាល​ពី​ថ្ងៃ​ព្រហស្បតិ៍ អាជ្ញាធរ​ហ្គាំប៊ី​ បាន​ចាប់​ផ្តើម​ប្រមូលមកវិញនូវ​ថ្នាំសេរ៉ូ​ប៉ារ៉ាសេតាម៉ុល និង​ប្រូមេតាហ្សីន ពីក្រុម​គ្រួសារនៅ​ជន​បទក្នុង​តំបន់​ឆ្នេរភាគ​ខាង​លិច និង​តំបន់​ទន្លេ​ខាង​លើ។

ការស៊ើបអង្កេតរបស់ក្រសួងសុខាភិបាលហ្គាំប៊ី ដែលចាប់ផ្តើមតាំងពីខែកក្កដាមក បានលើកឡើងពីបាក់តេរី E. coli ថាជាមូលហេតុនៅពីក្រោយការផ្ទុះជំងឺខ្សោយតម្រងនោមស្រួចស្រាវ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ប្រទេស ហ្គាំប៊ី ផ្អាកលក់ថ្នាំសេរ៉ូ ប៉ារ៉ាសេតាម៉ុល បន្ទាប់ពីមានកុមាររាប់សិបនាក់ ស្លាប់