ហេតុអ្វីធ្វើរោគវិនិច្ឆ័យរកវីរុសកូវីដ-១៩តែម្តងមិនគ្រប់គ្រាន់?

វីរុសកូរ៉ូណាថ្មីបានកើតឡើងលើកដំបូងនៅទីក្រុងអ៊ូហាន​ ប្រទេសចិនកាលពីខែធ្នូ​ ឆ្នាំ២០១៩ និងមានមនុស្សឆ្លងរហូតដល់រាប់ម៉ឺននាក់។ វីរុសនេះត្រូវបានអង្គការសុខភាពពិភពលោក (WHO) បានដាក់ ឈ្មោះជាផ្លូវការថា COVID-19។

លោក Charles Chiu អ្នកជំនាញខាងជំងឺឆ្លងនៅសាកលវិទ្យាល័យ UC San Francisco បានធ្វើការសិក្សាទៅលើវីរុសនេះតាំងពីមានការផ្ទុះឡើង និងផ្តល់នូវព័ត៌មានថ្មីៗអំពីវិធីចម្លង អាការៈអ្នកឆ្លង និងមូលហេតុអ្វីបានជា​ការធ្វើរោគវិនិច្ឆ័យតែម្តងមិនគ្រប់គ្រាន់។

វីរុសកូរ៉ូណាថ្មី​ (COVID-19) នេះអាចចម្លងបានតាមរយៈដំណក់វត្ថុរាវដែលចេញពីការកណ្ដាស់ ឬការក្អកជាដើម។ លោក Chiu បានលើកឡើងទៀតថា​ វីរុសនេះមិនឆ្លងតាមខ្យល់អាកាសទេ។ វីរុសកូរ៉ូណាថ្មី (COVID-19) អាចឆ្លងពីមនុស្សម្នាក់ទៅមនុស្សម្នាក់តាមរយៈការប៉ះពាល់អ្នកឆ្លងជំងឺនេះដូចជាការចាប់ដៃ ការប៉ះពាល់នូវវត្ថុណាមួយដែលប៉ះដោយអ្នកឆ្លង​ រួចយកមកប៉ះច្រមុះ ភ្នែក​ និងមាត់របស់ខ្លួន។ មកដល់ពេលនេះមិនទាន់មានទិន្នន័យច្បាស់លាស់ថាតើវីរុសនេះអាចនៅបរិយាកាសខាងក្រៅបានយូរប៉ុណ្ណាទេ​ ប៉ុន្តែយោងតាមវីរុសកូរ៉ូណាផ្សេងទៀតដូចជា SARS វីរុសកូរ៉ូណាអាចនៅបានរហូតដល់ពីរថ្ងៃនៅសីតុណ្ហភាពជាង២០​អង្សាសេ។ ម៉្យាងទៀត​ របាយការណ៍ថ្មីបានលើកឡើងថាវីរុសកូរ៉ូណាថ្មី​នេះអាចឆ្លងតាមការបន្ទោបង់ដូចជាការធ្លាយនូវប្រព័ន្ធបង្ហូរទឹកដែលករណីនេះធ្លាប់កើតមានពេលផ្ទុះជំងឺ SARS។

វីរុសកូរ៉ូណាថ្មី​ (COVID-19) មានអត្រាស្លាប់ទាបជាងជំងឺ SARS ប៉ុន្តែខ្ពស់ជាងជំងឺផ្តាសាយ ដែលគិតជាភាគរយត្រឹមតែពីរភាគរយប៉ុណ្ណោះ។ អត្រានៃការស្លាប់នេះអាចនឹងទាបជាងនេះ ប្រសិនជាមានទិន្នន័យច្បាស់លាស់របស់អ្នកឆ្លង​ ប៉ុន្តែដោយសារការមិនមានរោគសញ្ញាធ្វើឲ្យមានការពិបាកក្នុងការកំណត់។ លោក​Chiu បានបញ្ជាក់ថាការធ្វើរោគវិនិច្ឆ័យត្រឹមតែម្តងមិនអាចកំណត់ថាមនុស្សម្នាក់ឆ្លងវីរុសកូរ៉ូណាថ្មី​នេះទេ​ ឬអ្នកជំងឺបានជាពីជំងឺនេះដែរ​ ព្រោះមនុស្សមួយចំនួនបានឆ្លង និងមិនមានរោគសញ្ញា​ ឬអាការៈអ្វីទាល់តែសោះ។

ការវិវត្តនៃវីរុសកូរ៉ូណាថ្មី​ (COVID-19) នឹងមានរោគសញ្ញាក្រោយប្រាំថ្ងៃនៃការឆ្លង ឬអាចក្នុងចន្លោះពី ២ទៅ១១ថ្ងៃ។ រោគសញ្ញាអាចមានលក្ខណៈដូចទៅនឹងផ្តាសាយ ហើយអ្នកជំងឺអាចជាសះស្បើយដោយមិនមានអាការៈធ្ងន់ធ្ងរ។ ក្នុងករណីធ្ងន់ធ្ងរ បន្ទាប់ពីថ្ងៃទីបួននៃការចេញរោគសញ្ញា អ្នកជំងឺអាចមានអាការៈពិបាកដកដង្ហើម និងជំងឺរលាកសួតដំណាក់កាលដំបូង និងកាន់តែធ្ងន់ធ្ងរនៅថ្ងៃទីប្រាំពីរ។ បន្ទាប់ពីថ្ងៃទី១១ អ្នកជំងឺដែលមានអាការៈធូរស្រាលនឹងជាសះស្បើយ។

លោក​ Chiu បានបន្ថែមទៀតថា ទោះបីជាអ្នកធ្លាប់ឆ្លងជំងឺនេះមានប្រព័ន្ធភាពស៊ាំប្រឆាំងនឹងជំងឺនេះក៏ដោយ ប៉ុន្តែនៅ​តែប្រឈម​​នឹង​ការ​ឆ្លងជាថ្មី​៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ៣ សំណួរ ឆ្លើយជាមួយពល​រដ្ឋទាក់ទងវ៉ាក់សាំងកូវីដ១៩

ចុចអាន៖ កុំចាញ់បោក! កន្សែងសើមមិនអាចសម្លាប់កូវីដ-១៩បានទេ